Иоан 6 - Бур Юӧр 2019

¹ Сэсся Исусыс муніс Галилея ты мӧдӧрись муэзӧ, мӧд моза сійӧ тысӧ шуӧны Тивериада.

² Сы бӧрсянь мунісӧ уна отир. Ны син одзын эд шогалісь отирсӧ веськӧтӧм коста Сія керис уна адззывлытӧмсӧ.

³ Исусыс кайис керӧсӧ. Сія вӧлі сэтчин Аслас велӧтчиссезкӧт.

⁴ Сибаліс Ыджыт лун ─ иудейезлӧн вежалун.

⁵ Исусыс лэбтіс юрсӧ да казяліс: Сы дынӧ локтӧ уна отир. Сія Филипыслӧ шуис: «Кытісь небам няньсӧ отирсӧ вердны?»

⁶ Сія сідз юаліс, медбы тӧдмавны-видзӧтны Филипыслісь веритӧмсӧ. Ачыс эд тӧдіс ни, мый мӧдӧ керны.

⁷ Филипыс Сылӧ шуис: «Кыксё динарий вылӧ босьтӧм няньыс быдыслӧ оз тырмы нельки кынымиськӧ курччӧвтыштны».

⁸ Ӧтлаын сэтӧн вӧлі Ӧндрей нима велӧтчись, Симон-Петралӧн вон. Сія шуис Исусыслӧ:

⁹ «Татӧн ӧтік зоночкалӧн эмӧсь вит ид нянь да кык чери, но тырмас разь сія сымда отирлӧ?»

¹⁰ Исус шуис: «Отирсӧ тшӧктӧ пуксьыны». Сэтӧн быдмис сук турун. Сэк отирыс пуксисӧ вит сюрс гӧгӧр.

¹¹ Исусыс босьтіс няннесӧ, буркывтіс Енсӧ да сетіс велӧтчиссеслӧ. Мӧддэс сеталісӧ няньсӧ отирыслӧ. Сідз сеталісӧ и черисӧ, кинлӧ мымда коліс.

¹² Быдӧнныс пӧтісӧ. Сэк Исусыс висьталіс Аслас велӧтчиссезлӧ: «Ӧктӧ кольччӧм нянь торресӧ, ась весись нем оз ӧш».

¹³ Нія ӧктісӧ кольччӧм нянь торресӧ. Вит ид няньсис ӧксис даскык ыджыт пестер.

¹⁴ Исуслісь адззывлытӧм керӧмсӧ адззыліссес шуисӧ: «Сія былись Енсянь Юӧртісьыс, Кӧдалӧ коліс локны му вылас».

¹⁵ Исусыс тӧдіс: отирыс мӧдӧны локны, Сійӧ кутны да сувтӧтны ӧксуӧн. Сэк Сія ӧтнас бӧра кайис керӧсӧ.

Исуслӧн ва вылӧт ветлӧтӧм

¹⁶ Сибаліс рыт. Сылӧн велӧтчиссес лэдзчисӧ ты дорӧ,

¹⁷ пуксисӧ пыжӧ да иньдӧтчисӧ ты мӧдӧрас, Капернаум карӧ. Пемдіс ни, а Исусыс эз на лок ны дынӧ.

¹⁸ Ты вылын пӧльтіс вына тӧв, васӧ нӧбӧтіс, койис.

¹⁹ Кыкдас вит али куимдас стадий мымда уйӧм бӧрын нія казялісӧ Исуссӧ. Сія веськыта тыыс кузя локтӧ пыжныс дынӧ. Нія повзисӧ.

²⁰ Сія нылӧ шуис: «Эд полӧ, этӧ Ме».

²¹ Нія мӧдісӧ пуксьӧтны Исуссӧ пыжас, но пыжныс локтіс ни, кытчӧ нылӧ коліс.

Исус ─ олан сетан нянь

²² Мӧд лунас ты мӧдӧрас кольччӧм отирыслӧ тӧдвыланыс усис: пыжыс вӧлі ӧтік, сэтчӧ пуксисӧ Исуслӧн велӧтчиссес, а Сія ныкӧт эз пуксьы. Велӧтчиссес иньдӧтчисӧ ӧтнаныс, а мӧдік пыж сэтӧн эз вӧв.

²³ Тивериада карись локтісӧ мӧдік пыжжез сэтчӧ, кытӧн Дӧсвидзисьыс Енсӧ буркывтӧмӧн вердіс отирсӧ няньнас.

²⁴ Отирыс казялісӧ, Исусыс велӧтчиссескӧт сэтӧн абу ни. Нія пуксисӧ пыжжезӧ да уйисӧ Капернаум карӧ кошшыны Исуссӧ.

²⁵ Адззисӧ Сійӧ ты мӧдӧрас да юалісӧ: «Велӧтісь! Кӧр нӧ Тэ локтін татчӧ?»

²⁶ Исус шуис нылӧ: «Тіянлӧ быльсӧ веськыта висьтала: тійӧ одӧ кошшӧ Менӧ адззывлытӧммесӧ видзӧтӧмныт кузя. Тійӧ кошшат Менӧ няньсӧ пӧттӧдз сёйӧмныт кузя.

²⁷ Эдӧ тӧждісьӧ тшыксян сёян понда, а тӧждісьӧ пырся олансӧ сетан сёян понда. Сійӧ сёянсӧ сетас тіянлӧ Морт Зон. Ен Айыс эд Сы вылӧ пуктіс Ассис пассӧ».

²⁸ Отирыс юалісӧ Исусыслісь: «Мый миянлӧ керны, медбы керӧмным вӧлі Еныс сьӧрті?»

²⁹ Исус нылӧ висьталіс: «Веритӧ Енсянь Ыстӧмлӧ. Сія керӧмыс Еныс сьӧрті».

³⁰ Сэк нія Исусыслісь юалісӧ: «Кытшӧм пас Тэ верман мыччавны, сійӧ адззылӧм бӧрын медбы мийӧ пондім веритны Тэныт? Мый мыччалан?

³¹ Миян айезным кушмуас сёйӧмась манна. Вежа Гижӧтас висьталӧм эд: "Няньсӧ сёйны Сія сетіс нылӧ енӧжсянь"».

³² Исус шуис нылӧ: «Тіянлӧ быльсӧ веськыта висьтала: Моисейыс эз сет тіянлӧ енӧжсянь няньсӧ. Менам Айӧ енӧжсяняс сетӧ тіянлӧ былись няньсӧ.

³³ Енлӧн няньыс ─ енӧжись Локтӧмыс. Сія отирлӧ сетӧ олан».

³⁴ Сэк шуисӧ Сылӧ: «Велӧтісь! Пыр сетав миянлӧ сэтшӧм няньсӧ».

³⁵ Исус висьталіс: «Ме ─ олан сетан нянь. Ме дынӧ локтӧм мортыс оз понды тшыгьявны. Меным веритісьлӧн некӧр оз понды косьмыны горшыс.

³⁶ Ме тіянлӧ висьтавлі ни: тійӧ и адззыліт Менӧ, да одӧ Меным веритӧ.

³⁷ Быдӧнныс, кӧднӧ Меным сетӧ Айӧ, Ме дынӧ локтасӧ. Ме дынӧ локтӧм мортсӧ ог вашӧт дынсим.

³⁸ Енӧжсяняс Ме эг лок керны, мый Меным колӧ. Ме локті керны сійӧ, мый колӧ Айӧлӧ. Сія эд Менӧ ыстіс.

³⁹ Менӧ ыстісь Айӧлӧн тшӧктӧмыс сэтшӧм: Сы сетӧммез коласісь ась ӧтік оз ӧш. Меным колӧ нійӧ медбӧрья лунас ловзьӧтны.

⁴⁰ Менӧ ыстіс Айӧ. Сылӧ колӧ, медбы Сылісь Зонсӧ адззылісь мортлӧн да Сылӧ веритісьлӧн вӧлі пырся олан, и Ме ловзьӧта сійӧ медбӧрья лунас».

⁴¹ Исуслӧн висьталӧмсянь «Ме ─ енӧжись лэдзчисьӧм нянь» иудейес лӧгасисӧ.

⁴² Нія баитісӧ: «Абу я Сія Ӧсиплӧн Исус зон? Мийӧ эд тӧдам сылісь ай-мамсӧ. Мыля нӧ Сія баитӧ, Ме пӧ лэдзчи енӧжись?»

⁴³ Исусыс нылӧ сэтчӧ шуис: «Ас коласаныт эд шушкӧтчӧ!

⁴⁴ Некин оз вермы локны Ме дынӧ, оз кӧ вайӧт сійӧ Менӧ ыстісь Айӧ. Сійӧ мортсӧ медбӧрья лунас Ме ловзьӧта.

⁴⁵ Енсянь юӧртіссес гижӧмась: "Еныс быдӧннысӧ велӧтас". Быдыс, кин Айӧс кывзӧ да Сысянь велӧтчӧ, локтӧ Ме дынӧ.

⁴⁶ Енсянь Локтӧмся Айсӧ некин эз адззыв. Дзир Сія адззыліс Айсӧ.

⁴⁷ Тіянлӧ быльсӧ веськыта висьтала: Меным веритісь мортлӧн эм пырся олан.

⁴⁸ Ме ─ олан сетан нянь.

⁴⁹ Тіян айезныт кушмуас сёйисӧ манна да кулісӧ.

⁵⁰ А енӧжись лэдзчӧм няньсӧ сёйисьыс оз кув.

⁵¹ Ме ─ ловья нянь, лэдзчи енӧжись. Сійӧ няньсӧ сёйисьыс пондас овны пыр. Менам сетӧм няньӧ ─ Менам Вывтырӧ. Сійӧ Ме сета отир олан понда».

⁵² Сэк иудейес ӧтамӧдныскӧт пондісӧ етшасьны: «Кыдз Сія вермас сетны Ассис Вывтырсӧ миянлӧ сёйны?»

⁵³ Исус висьталіс нылӧ: «Тіянлӧ быльсӧ веськыта висьтала: Одӧ кӧ пондӧ сёйны Морт Зонлісь Вывтырсӧ, одӧ кӧ пондӧ юны Сылісь Вирсӧ, тіян оз ло оланыс.

⁵⁴ Менчим Вывтырӧс сёйисьлӧн, Менчим Вирӧс юисьлӧн эм пырся олан, и Ме ловзьӧта сійӧ медбӧрья лунас.

⁵⁵ Менам Вывтырӧ ─ былись сёяныс. Менам Вирӧ ─ былись юаныс.

⁵⁶ Менчим Вывтырӧс сёйисьыс, Менчим Вирӧс юисьыс олӧ Ме пытшкын, а Ме ола сы пытшкын.

⁵⁷ Менӧ ыстіс ловья Айӧ. Менам оланӧ ─ Айӧсянь. Сідз и Менӧ сёйисьлӧн оланыс ─ Месянь.

⁵⁸ Сія ─ енӧжись лэдзчисьӧм нянь. Сія няньыс абу айезнытлӧн кодь. Тіян айезныт сёйисӧ манна да кулісӧ, а этӧ няньсӧ сёйисьыс пондас овны пыр».

⁵⁹ Быдӧс сійӧ Исусыс баитіс Капернаум карын, синагогаын велӧтӧм коста.

Пырся олан сетан кыввез

⁶⁰ Этӧ кывзӧм бӧрын велӧтчиссес унаӧн баитісӧ: «Кыввес нач вежӧрттӧмӧсь! Кин вермас Сійӧ кывзыны?»

⁶¹ Ачыс Исусыс тӧдіс велӧтчиссеслісь кылӧмныс йылісь шушкӧтчӧмнысӧ. Сія юаліс нылісь: «Нія кыввес тіянӧс падтӧны?

⁶² Адззылат кӧ Морт Зонлісь лэбтісьӧмсӧ сэтчин, кытӧн Сія вӧлі одзжык, мый сэк шуат?

⁶³ Лов сетӧ олан, а морт сійӧ керны оз вермы. Менам висьталӧм кыввезӧ сетӧны тіянлӧ лов да олан.

⁶⁴ Тіян коласісь мукӧдыс озӧ веритӧ». Исусыс эд одззасянь ни тӧдіс, кин оз верит Сылӧ да кин Сійӧ вузалас.

⁶⁵ Сэк Сія шуис: «Сы понда Ме и висьталі тіянлӧ, некин оз вермы локны Ме дынӧ, оз кӧ ло сылӧ сетӧм Айӧсянь».

⁶⁶ Эта бӧрын Сылӧн велӧтчиссез коласісь унаӧн мунісӧ Сы дынісь. Нія эзӧ ни сэсся пондӧ ветлӧтны Сыкӧт.

⁶⁷ Сэк Исусыс юаліс даскыкнан велӧтчисьлісь: «Одӧ я и тійӧ мӧдӧ мунны Ме дынісь?»

⁶⁸ Симон-Петра шуис Сылӧ: «Дӧсвидзисьӧ! Кин дынӧ миянлӧ мунны? Тэнат кыввет сетӧны пырся олан.

⁶⁹ Мийӧ веритам да тӧдам: Тэ ─ Кристос-Мездӧтісь, ловья Енлӧн Зон».

⁷⁰ Исусыс сэтчӧ шуис: «Ме Ачым тіянӧс даскыкӧ бӧрйи, но ӧтікыс тіян коласісь куль».

⁷¹ Сідз Сія баитіс Симон-Искариотлӧн Иуда зон йылісь. Сія эд лӧсьӧтчӧм ни вӧлі вузавны Исуссӧ. Иудаыс вӧлі Сылӧн даскык велӧтчись коласісь.