Иоан 5 - Бур Юӧр 2019

¹ Сыбӧрын иудейезлӧн вӧлі вежалун. Сэк Исусыс локтіс Ерусалимӧ.

² Сэтчин, Баля ыбӧс дорын, вӧлі ва видзанін. Иудейес сійӧ шуисӧ Вифезда. Сы гӧгӧрын вӧлісӧ вит вевттьӧм пыранін.

³ Сэтчин куйлісӧ унася-уна шогаліссез: синтӧммез, коктӧммез да параличӧн личкӧммез. Нія видзчисисӧ ваыслісь бергӧтӧмсӧ.

⁴ Мукӧдпыр Дӧсвидзисьлӧн ангел лэдзчывліс ва видзанінас вӧрзьӧтны васӧ. Бергалан ваас медодз пырисьыс веськавліс быдкодь шогӧтісь.

⁵ Сэтӧн вӧлі куимдас кыкьямыс во сьӧрна ни шогалісь морт.

⁶ Исусыс казяліс куйлісьсӧ. Сія тӧдіс сылісь дыр шогалӧмсӧ да юаліс: «Колӧ я тэныт веськавны?»

⁷ Шогалісьыс Сылӧ висьталіс: «Бур Мортӧй, веськала бы да некинлӧ менӧ лэдзны бергалан ваас! Ме ог на ешты локны ва дынас, сэтчӧ мӧдік пырӧм ни».

⁸ Исусыс шуис сылӧ: «Чеччы, босьт ольпасьтӧ да ветлӧт».

⁹ Мӧдыс сэтӧн жӧ веськаліс. Сія босьтіс ольпасьсӧ да пондіс ветлӧтны. Вӧлі сія шоччисян лунӧ.

¹⁰ Сійӧн иудейес баитісӧ веськалӧм мортлӧ: «Талун шоччисян лун. Тэныт оз позь ольпасьтӧ нуӧтны».

¹¹ Сія нылӧ висьталіс: «Менӧ Веськӧтісьыс висьталіс, босьт пӧ ольпасьтӧ да ветлӧт».

¹² Сылісь юалісӧ: «Кин сія Мортыс, Кӧда тэныт висьталіс, босьт пӧ ольпасьтӧ да ветлӧт?»

¹³ Веськӧтӧм мортыс эз и тӧд Веськӧтісьсӧ, Исусыс эд вӧлі сайӧвтчӧм ни отирыс коласын.

¹⁴ Сыбӧрын Исусыс панталіс сійӧ мортсӧ Вежа Керкуын да висьталіс: «Тэ веськалін. Эн кер сэсся умӧльсӧ, медбы тэныт мый умӧльжыкыс эз ло».

¹⁵ Сія мортыс муніс да висьталіс иудейеслӧ, сійӧ пӧ веськӧтӧм Исус.

¹⁶ Сэк иудейес шоччисян лунӧ сэтшӧмсӧ керӧм понда Исуссӧ пондісӧ дзескӧтны. Нія Сійӧ мӧдісӧ вийны.

¹⁷ Исусыс шуис нылӧ: «Менам Айӧ дугдывтӧг керӧ уджсӧ, сідз и Ме кера».

¹⁸ Сэк иудейес ӧддьӧнжык пондісӧ кошшыны, кыдз бы Сійӧ вийны. Сія эд керис сійӧ, мый оз туй керны шоччисян лунӧ. Енсӧ Сія шуис Аслас Айӧн, сідз Асьсӧ Еныскӧт ӧтвесьтӧ пуктіс.

Исус керӧ Айыс моз

¹⁹ Сэтчӧ Исусыс шуис: «Тіянлӧ быльсӧ веськыта висьтала: Зон нем оз вермы керны Ассяняс, оз кӧ адззыв Айыслісь керӧмсӧ. Айыс моз керӧ и Зоныс.

²⁰ Айыс Зонсӧ радейтӧ. Ассис быдӧс керӧмсӧ мыччалӧ Сылӧ. Сія мыччалас керӧммесӧ этнася ыджытжыккезӧ, кӧднасянь тіянӧс диво кутас.

²¹ Айыс ловзьӧтӧ кулӧммесӧ да сетӧ олан. Сідз и Зоныс ловзьӧтӧ, кинӧс Сылӧ колӧ.

²² Айыс ӧтік мортӧс оз судит. Сія Судитісьнас сувтӧтіс Зонсӧ,

²³ медбы Айсӧ моз быдӧнныс бурӧ пуктісӧ Зонсӧ. Мортыс оз кӧ бурӧ пукты Зонсӧ, сэк оз бурӧ пукты и Айсӧ, Кӧда ыстіс Зонсӧ.

²⁴ Тіянлӧ быльсӧ веськыта висьтала: мортыс кывзӧ кӧ Менчим кыввезӧс да веритӧ Менӧ Ыстісьлӧ, сылӧн эм пырся олан. Сія суд вылас оз ни шед. Сія вуджис ни кулӧмись оланӧ.

²⁵ Тіянлӧ быльсӧ веськыта висьтала: локтӧ кад, да и локтіс ни, кӧр кулӧммес кыласӧ Ен Зонлісь шысӧ. Сійӧ кыліссес ловзясӧ.

²⁶ Айыс сетӧ олан. Сія и Зоныслӧ сетіс вын сетны олансӧ.

²⁷ Айыс и судитан вынсӧ сетіс Зоныс киӧ, Сія эд Морт Зон.

²⁸ Тіянӧс ась оз кут диво висьталӧмӧсянь: локтӧ кад, кӧр кулӧммес кыласӧ Ен Зонлісь шысӧ

²⁹ да ловзясӧ. Бурсӧ кериссес ловзясӧ овны. Лёк кериссес ловзясӧ, медбы нійӧ суд вылын мыжйисӧ».

Исус висьталӧ Ас йывсис

³⁰ «Ме Ассяням нем ог вермы керны. Ме судита веськыта, Айӧ висьталӧм сьӧрті. Ог кер Ас сьӧртӧттям, кера Менӧ ыстісь Айӧ тшӧктӧм сьӧрті.

³¹ Ме кӧ Ас йывсим Ачым висьтала, лоас я сія былись висьталӧм?

³² Ӧні Ме йылісь Мӧдік висьталӧ быльсӧ. Ме тӧда: Сія оз бӧбӧт.

³³ Быльсӧ висьталіс и Иоаныс, кӧр тійӧ Сы дынӧ иньдыліт отирӧс юасьны Ме йылісь.

³⁴ Но Меным оз ков мортлӧн висьталӧмыс. Этадз баита, медбы тійӧ мезмит.

³⁵ Иоаныс вӧлі сотчан-югдӧтан би. Тійӧ тай мӧдіт кӧть недыр гажӧтчыны сы югдӧтӧм дырни.

³⁶ Ме йылісь висьталӧмыс Иоанлӧн висьталӧмся вынажык. Ме кера Айӧлісь сетӧм уджсӧ. Менам керӧмӧ мыччалӧ: Менӧ ыстіс Айӧ.

³⁷ Менӧ ыстісь Айӧ Ачыс висьталіс Ме йылісь. Тійӧ эд Сылісь шысӧ эдӧ кывлӧ, Сылісь чужӧмсӧ эдӧ адззывлӧ.

³⁸ Сылӧн кылыс оз йидж сьӧлӧманыт сійӧн, мыля одӧ веритӧ Сылӧн Ыстӧмлӧ.

³⁹ Тійӧ велӧтат Вежа Гижӧттэсӧ, ны пыр кошшат босьтны пырся олансӧ, а ныын эд гижӧм Ме йылісь.

⁴⁰ Но тійӧ одӧ мӧдӧ локны Ме дынӧ, медбы босьтны олансӧ.

⁴¹ Меным оз ков отирлӧн ошкӧмыс.

⁴² Ме тӧда тіянӧс: тійӧ одӧ радейтӧ Енсӧ.

⁴³ Ме локті Айӧ нимсянь, тійӧ тай Менӧ одӧ кывзӧ. Локтас кӧ мӧдік аслас нимсянь, сійӧ кывзатӧ.

⁴⁴ Кыдз тійӧ вермат Меным веритны, тійӧ эд ӧтамӧднытсянь видзчисят ошкӧмсӧ, а ӧтка Еныслісь ошкӧмсӧ одӧ кошшӧ?

⁴⁵ Юраныт эд видзӧ: Ме пӧ понда тіян вылӧ Айӧ одзын умӧльсӧ висьтавлыны. Тійӧ эд надейтчат Моисей вылӧ. Сія и лоас тіян вылӧ умӧльсӧ висьтавлісьыс.

⁴⁶ Тійӧ одӧ веритӧ Моисейыслӧ. Веритіт бы сылӧ, сэк веритіт бы и Меным. Сія эд гижис Ме йылісь.

⁴⁷ Тійӧ одӧ кӧ веритӧ сы гижӧттэзын висьталӧмӧ, кыдз сэк пондат веритны Менам кыввезӧ?»