Иоан 4 - Бур Юӧр 2019

^1-2 Фарисейеслӧ кывсьӧм, Исуслӧн велӧтчиссес пӧ лоисӧ Иоанлӧнся унажык да и отирсӧ Сія пыртӧ пӧ сысся унажык. Но Ачыс Исусыс эз пырт, пыртісӧ Сылӧн велӧтчиссес. Этія йылісь фарисейеслӧ кывсьӧмсӧ пондіс тӧдны Исусыс.

³ Сэк Сія Иудеясис бӧр иньдӧтчис Галилея муӧ.

⁴ Сылӧ ковсис мунны Самария муӧт.

⁵ Самария муын Сія локтіс Сикар карӧ. Матын вӧлі му, кӧдӧ Яков кӧркӧ сетлӧм вӧлі аслас Ӧсип зонлӧ.

⁶ Сэтчин вӧлі Яковлӧн юкмӧс. Исусыс туйын мыдзис, пуксис юкмӧсыс дынӧ. Вӧлі луншӧр гӧгӧр.

⁷ Сэтчӧ васӧ гумыштны локтіс Самарияись инька. Исусыс шуис сылӧ: «Юктав Менӧ ванат!»

⁸ Исуслӧн велӧтчиссес сы коста мунісӧ карӧ небны сёян.

⁹ Самарияись инька шуис Сылӧ: «Тэ иудей, кыдз верман корны юны менчим, Самарияись инькалісь?» Иудейес озӧ вовлісьӧ Самарияись отиркӧт.

¹⁰ Исусыс сылӧ висьталіс: «Тэ он тӧд Еныслісь козинсӧ. Тэ он тӧд, Кин тэныт висьталіс этнӧ кыввесӧ: "Юктав Менӧ ванат!" Кӧбы тӧдін, сэк ачыт бы корин Сылісь, и Сія сетіс бы тэныт ловья ва».

¹¹ Инькаыс шуис Сылӧ: «Бур Мортӧй! Тэныт нельки гумыштны немӧн, а юкмӧсыс пыдын. Кытісь нӧ Тэнат ловья ваыс?

¹² Абу я Тэ ыджытжык миян Яков айся? Сія гарйыліс миянлӧ этӧ юкмӧссӧ. Сэтісь ачыс юис, юисӧ сылӧн челядьыс да подаыс».

¹³ Исусыс шуис сылӧ: «Этӧ васӧ юисьлӧн горшыс бӧра пондӧ косьмыны.

¹⁴ Кин пондас юны васӧ, кӧдӧ Ме сета, сылӧн некӧр оз понды косьмыны горшыс. Менам ваӧ мортыс пытшкын лоас ва петанінісь визывтан шорӧн, кӧда сетӧ пырся олан».

¹⁵ Инькаыс Сылӧ шуис: «Бур Мортӧй! Вай меным сійӧ васӧ, медбы менам горшӧ сэсся эз ни понды косьмыны. Сэк и васӧ ваявны оз понды ковны вовлыны татчӧ».

¹⁶ Исусыс висьталіс сылӧ: «Мун кор ассит жӧниктӧ да лок татчӧ».

¹⁷ Инькаыс висьталіс: «Менам абу жӧникӧ». Исусыс шуис сылӧ: «Тэ веськыта висьталін, абу тэнат жӧникыт.

¹⁸ Тэ олін виткӧт, и ӧні кӧдакӧт олан, сія абу тэнат жӧник. Сійӧ тэ веськыта висьталін».

¹⁹ Инькаыс шуис Сылӧ: «Бур Мортӧй! Адзза, Тэ Енсянь юӧртісь.

²⁰ Миян айезным копрасисӧ Еныслӧ эта керӧс вылын. Тійӧ тай шуат, Еныслӧ копрасьны колӧ пӧ дзир Ерусалимын».

²¹ Исусыс висьталіс: «Инька, верит Меным: сибалӧ кад, кӧр одӧ ни пондӧ копрасьны Айнымлӧ эта керӧсын да Ерусалимын.

²² Тійӧ одӧ тӧдӧ, кинлӧ копрасят, а мийӧ тӧдам, Кинлӧ копрасям. Мезмӧмыс эд локтӧ иудейезсянь.

²³ Локтас кад, кӧр былись копрасиссес пондасӧ кеймыны Айнымлӧ быль сьӧрті да Ловсянь. Сэтшӧм копрасиссезӧс Айным Аслыс кошшӧ. Сія кадыс и локтіс ни.

²⁴ Еныс ─ Лов, и Сылӧ колӧ кеймыны быльыс сьӧрті да Ловсянь».

²⁵ Инькаыс шуис Сылӧ: «Тӧда: локтас Кристос-Мездӧтісь. Сія локтас да миянлӧ быдӧс висьталас».

²⁶ Исусыс шуис сылӧ: «Сія ─ Ме, тэкӧт Баитісьыс».

²⁷ Сы коста локтісӧ Сылӧн велӧтчиссес. Нійӧ диво кутіс, мыля Сія баитӧ инькакӧт. Но ны коласісь ӧтік морт эз висьтав: «Мый Тэныт сысянь колӧ? Мый йылісь сыкӧт сёрнитан?»

²⁸ Сэк инькаыс колис ва дозсӧ да муніс карас. Сія отирыслӧ висьталіс:

²⁹ «Мунӧ, видзӧтӧ Мортсӧ. Сія быдӧс висьталіс, мый ме керлі. Абу я Сія Кристос-Мездӧтісьыс?»

³⁰ Отирыс петісӧ карсис да локтісӧ Исусыс дынӧ.

Вундан кад

³¹ Сы коста Сылӧн велӧтчиссес корисӧ Сійӧ: «Велӧтісь, лок сёйны!»

³² Сія шуис нылӧ: «Менам эм сёяныс. Сійӧ сёянсӧ тійӧ одӧ тӧдӧ».

³³ Велӧтчиссес сэк шуисӧ ӧтамӧдныслӧ: «Поди, Сылӧ кинкӧ вайис сёянсӧ?»

³⁴ Исусыс шуис нылӧ: «Менам сёяныс ─ быдӧс керны сідз, кыдз колӧ Менӧ Ыстісьлӧ да ештӧтны Сылісь уджсӧ.

³⁵ Одӧ я тійӧ шуӧ: нёль тӧлісь бӧрті лоас вундан кад? Ме тіянлӧ висьтала: лэбтӧ синнэзнытӧ, видзӧтӧ ыббес вылӧ. Нія вежӧтӧмась ни, вундан кад кежӧ воӧмась.

³⁶ Вундісьлӧ керӧм уджыс понда вештӧны. Сія ӧктӧ воӧмсӧ пырся оланӧ. Сійӧн кӧдзисьыс вундісьыскӧт ӧтлаын пондасӧ гажӧтчыны.

³⁷ Эстӧн лӧсялӧ эта веськыта висьталӧмыс: "Ӧтік кӧдзӧ, а мӧдік вундӧ".

³⁸ Ме тіянӧс ысті вундыны сэтчин, кытӧн тійӧ эдӧ мырсьӧ. Мырсисӧ мӧдіккез, а тійӧ ныкӧт ӧтвыв вундат».

Самарияись отирлӧн Исуслӧ веритӧм

³⁹ Инькаыс висьталӧм карас оліссезлӧ, Сія пӧ быдӧс висьталіс, мый ме керлі. Сы висьталӧмсянь Самарияись уна отир пондісӧ веритны Исусыслӧ.

⁴⁰ Сійӧн Исус дынӧ карсис локтӧм отирыс корисӧ Сійӧ мымдакӧ олыштны ны дынын. Исусыс вӧлі сэтчин кык лун.

⁴¹ Ассяняс кылӧм кыввезсянь эшӧ унажык отир пондісӧ веритны Сылӧ.

⁴² Инькаыслӧ нія висьталісӧ: «Ӧні мийӧ огӧ ни веритӧ дзир тэнат висьталӧмсянь. Мийӧ эд асьным кылімӧ да тӧдамӧ: Сія былись му вылісь отирсӧ Мездӧтісьыс, Сія Кристос».

Зонкаӧс веськӧтӧм

⁴³ Кык лун бӧрті Исусыс сэтчинісь муніс Галилея муӧ.

⁴⁴ Сія Ачыс баитіс: «Енсянь юӧртісьсӧ чужанінас озӧ бурӧ пуктӧ».

⁴⁵ Но кӧр Исусыс локтіс Галилея муӧ, сэтчин оліссес Сійӧ панталісӧ бура. Нія эд вежалунсӧ Ерусалимын чулӧтікӧ адззылісӧ Сылісь керӧммесӧ.

⁴⁶ Исусыс бӧра локтіс Галилея муись Кана карӧ. Сэтчин Сія кыдзкӧ пӧртіс васӧ винаӧ. Галилеяись Капернаум карын оліс ӧксулӧн ӧтік уджалісь. Сылӧн зоныс шогалӧм.

⁴⁷ Сылӧ кывсьӧм: Исусыс Иудея муись локтӧм пӧ Галилеяӧ. Сія локтіс Исусыс дынӧ да корис Сійӧ локны Капернаумас веськӧтны зонсӧ, кӧда вӧлӧм кулан дорын ни.

⁴⁸ Исусыс сылӧ висьталіс: «Тійӧ одӧ и пондӧ веритны, одӧ кӧ адззылӧ мыччалан пассэз да адззывлытӧм керӧммез».

⁴⁹ Ӧксулӧн уджалісьыс шуис Сылӧ: «Велӧтісь! Вовлы, кытчӧдз зонӧ менам ловья!»

⁵⁰ Исусыс шуис сылӧ: «Мун гортат, тэнат зоныт веськаліс». Мӧдыс веритіс Исуслӧн висьталӧмӧ да муніс гортас.

⁵¹ Туй вылас пантасисӧ сылӧн раббес да висьталісӧ: «Зоныт тэнат веськаліс».

⁵² Сія юаліс нылісь: «Кытшӧм кадӧ сылӧ лоис кокнитжык?» Сылӧ висьталісӧ: «Тӧн луннас, час гӧгӧр шогӧтыс лэдзис сійӧ».

⁵³ Сэк айыс вежӧртіс: сія кадӧ Исусыс висьталіс сылӧ зоныс веськалӧм йылісь. Сэксянь сія мортыс да сылӧн гортіссес пондісӧ веритны Исусыслӧ.

⁵⁴ Исусыслӧн эта вӧлі мӧдік адззывлытӧм керӧм Иудея мусис Галилеяӧ бертӧм бӧрын.