Иоан 3 - Бур Юӧр 2019

¹ Иудейезлӧн веськӧтліссез коласын вӧлі Никодим нима фарисей.

² Никодимыс ойнас локтіс Исусыс дынӧ. Сія шуис: «Велӧтісь, мийӧ тӧдам: миянӧс велӧтны Тэнӧ ыстіс Еныс. Сэтшӧм адззывлытӧм керӧммесӧ некин оз вермы керны, оз кӧ ло сыкӧт Ен».

³ Исусыс сэтчӧ сылӧ висьталіс: «Тэныт быльсӧ веськыта висьтала: мортыс оз вермы адззывны Енлісь Юраланінсӧ, оз кӧ вились шогмы вылісянь».

⁴ Никодимыс шуис Сылӧ: «Кыдз вермас мортыс шогмыны пӧрисьувья? Вермас разь сія бӧр пырны мамыс кынӧмӧ да вились шогмыны?»

⁵ Исусыс висьталіс: «Тэныт быльсӧ веськыта висьтала: оз кӧ мортыс шогмы васянь да Ловсянь, сія оз вермы пырны Енлӧн Юраланінӧ.

⁶ Вывтырсянь шогмӧмыс ─ вывтыр. Ловсянь шогмӧмыс ─ лов.

⁷ Эн дивуйтчы эта висьталӧмӧсянь: тіянлӧ колӧ вились шогмыны вылісянь.

⁸ Тӧв пӧльтӧ, кытӧн сылӧ колӧ. Сылісь шысӧ кылан, но он тӧд, кысянь сія локтӧ, кытчӧ мунӧ. Сідз овлӧ и Ловсянь быд шогмӧм морткӧт».

⁹ Никодимыс Сылісь юаліс: «Кыдз сідз вермас лоны?»

¹⁰ Исусыс шуис: «Тэ Израильлӧн велӧтісь и сійӧ он тӧд?

¹¹ Тэныт быльсӧ веськыта висьтала: мийӧ баитам сы йылісь, мый тӧдам. Висьтасям сы йылісь, мый адззылім. Тійӧ тай миян висьталӧмӧ одӧ веритӧ.

¹² Ме тіянлӧ висьтала му вылісьыс йылісь, и тійӧ одӧ веритӧ. Сэк вермат разь веритны, висьтала кӧ тіянлӧ енӧжисьыс йылісь?

¹³ Енӧжын олісь да енӧжись лэдзчӧм Морт Зонся сэтчин некин эз на лэбтісьлы.

¹⁴ Кӧркӧ Моисейыс кушмуас бедь вылӧ лэбтӧм кыйӧс. Сідз лоас лэбтӧм и Морт Зон,

¹⁵ медбы Сылӧ быд веритісь морт эз кув, а сылӧн вӧлі пырся олан.

¹⁶ Еныс эд сідз радейтӧ му вылісь отирсӧ, нельки сетіс Ассис ӧтка Зонсӧ, медбы Сылӧ быд веритісь эз кув, а сылӧн вӧлі пырся олан.

¹⁷ Еныс эд Ассис Зонсӧ эз ысты му вылас отирсӧ судитны, а ыстіс мездыны.

¹⁸ Сылӧ веритісьсӧ озӧ пондӧ судитны. А кин оз верит, сія судитӧм ни. Сія эд эз верит Енлӧн ӧтка Зонлӧ.

¹⁹ Енлӧн судыс то мый понда: му вылас локтіс югытыс, отирыс тай асланыс лёк керӧммезныс кузя ӧддьӧнжык радейтісӧ пемытсӧ.

²⁰ Быд лёк керисьлӧ син вылӧ оз ков югытыс. Сія оз лок югытас, медбы сы лёк керӧм йылісь эзӧ пондӧ тӧдны.

²¹ Быльыс сьӧрті олісь морт мунӧ югытлань, медбы Ен отсӧтӧн керӧм уджыс сылӧн тыдаліс».

Исус йылісь Иоанлӧн висьталӧм

²² Сыбӧрын Исусыс велӧтчиссескӧт локтіс Иудея муӧ. Сэтчин Сія ныкӧт оліс да пыртіс отирсӧ.

²³ Сы коста Иоаныс пыртіс отирсӧ Енонын, матын Салим кар дынын. Сэтчин вӧлі уна ва. Отирыс вовлісӧ Иоаныс дынӧ пыртчыны.

²⁴ Сэк Иоансӧ абу на вӧлі пуксьӧтӧмась.

²⁵ Ӧтпыр Иоанлӧн велӧтчиссес иудейескӧт пондісӧ етшасьны мортлӧн сӧстӧммӧм йылісь.

²⁶ Велӧтчиссес локтісӧ Иоаныс дынӧ да висьталісӧ: «Велӧтісь, тэкӧт Иордан ю дорас вӧлі Морт, Кӧда йылісь Тэ висьтасин. Ӧні Сія пыртӧ отирсӧ и быдӧнныс мунӧны Сы дынӧ».

²⁷ Иоаныс нылӧ висьталіс: «Мортыс ас вылас босьтны нем оз вермы, абу кӧ сылӧ сетӧм енӧжсянь.

²⁸ Тійӧ эд асьныт кыліт месянь: ме абу Кристос-Мездӧтісь, ме ыстӧм Сы одзын мунны.

²⁹ Гӧтрасись зон сія, кӧдалӧн эм невеста. Зонлӧн ёртыс сулалӧ да кывзӧ сійӧ. Сылӧ гажся-гаж кывны гӧтрасись зонлісь баитӧмсӧ. Сэтшӧм ыджыт гажыс ӧні менам.

³⁰ Сылӧ колӧ быдмыны, а меным учӧтсявны.

³¹ Вылісянь Локтӧмыс быдӧннысся вылынжык. Му вылын олісьыс ─ дзир муись морт. Сія и баитӧ му вылісьыс йылісь. Енӧжись Локтӧмыс быдӧннысся вылынжык.

³² Мый Сія адззыліс да кыліс, сы йылісь и висьтасьӧ. Но отирыс Сылісь висьталӧмсӧ озӧ кывзӧ.

³³ Сылісь висьталӧмсӧ кывзісьыс мыччалӧ: Еныс быльсӧ висьталӧ.

³⁴ Енлӧн Ыстӧмыс висьталӧ Енлісь кыввесӧ. Еныс эд сетӧ Сылӧ Ловсӧ лыдтӧг.

³⁵ Айыс радейтӧ Зонсӧ, и быдӧс сетіс Сы киӧ.

³⁶ Зонлӧ веритісьлӧн эм пырся олан. Кин оз верит Зоныслӧ, сія пырся олансӧ оз адззыв. Сы вылын Енлӧн лӧгыс кольччас».