Иоан 20 - Бур Юӧр 2019

¹ Шоччисян лун бӧрын асъяпоннас Магдала Мария локтіс дзебсяніныс дынӧ. Ӧтӧрас абу на вӧлі югдӧм. Сія казяліс: пыранінсӧ пӧдналан изыс вӧлі вештӧм.

² Марияыс котӧрӧн муніс Симон-Петра дынӧ да Исуслӧн мӧдік велӧтчись дынӧ, кӧдӧ Исусыс радейтіс. Марияыс нылӧ висьталіс: «Дӧсвидзисьсӧ нуӧтӧмась дзебсянінсис. Кытчӧ Сійӧ воштӧмась, огӧ тӧдӧ».

³ Сэк Петраыс да мӧд велӧтчисьыс котӧрӧн мунісӧ дзебсяніныс дынӧ.

⁴ Мӧд велӧтчисьыс котӧртіс перытжыка и дзебсяніныс дынӧ локтіс Петраысся одзжык.

⁵ Сія мышкыртчис видзӧтны да казяліс шой каттян дӧраэсӧ, но пытшкас эз пыр.

⁶ Сы бӧрын локтіс Симон-Петраыс. Сія пырис дзебсянінас да казяліс дзир каттян дӧраэсӧ.

⁷ Юрсӧ кӧрталан чышьяныс кӧсталӧмӧн куйліс торйӧн.

⁸ Сэк пырис и мӧд велӧтчисьыс, кӧда локтіс одзжык. Сія казяліс лоӧмсӧ да пондіс веритны.

⁹ Нія эд эзӧ на тӧдӧ Вежа Гижӧтын висьталӧмсӧ, Исуслӧ пӧ колӧ ловзьыны.

¹⁰ Велӧтчиссес сэтісь бӧр бертісӧ.

Магдала Мариялӧ Исуслӧн мыччасьӧм

¹¹ Марияыс горзытӧн сулаліс дзебсянін дорас. Горзытӧнняс сія мышкыртчис пытшкланяс видзӧтны

¹² да казяліс чочком паськӧма кык ангелӧс. Нія пукалісӧ Исуслӧн шой куйланін вылын. Ӧтыс пукаліс, кытӧн куйліс Исуслӧн юрыс, а мӧдыс ─ кытӧн вӧлісӧ коккес.

¹³ Нія Марияыслісь юалісӧ: «Мый тэ горзан?» Сія нылӧ шуис: «Нуӧтӧмась менчим Дӧсвидзисьӧс. И кытчӧ Сійӧ пуктісӧ, ог тӧд».

¹⁴ Сідз шуӧм бӧрын сія бергӧтчис да казяліс Исуссӧ. Сія сулалӧм бӧрас. Инькаыс Сійӧ эз тӧд.

¹⁵ Исусыс юаліс: «Мортіньӧй, мый тэ горзан? Кинӧс кошшан?» Мариялӧ юрас пырис: сія пӧ, натьтӧ, пуйӧрын уджалісь. Сія юаліс: «Бур мортӧ! Петкӧтін кӧ Сійӧ дзебсянінсис, висьтав меным, кытчӧ тэ Сійӧ воштін. Ме босьта Сійӧ».

¹⁶ Исусыс шуис сылӧ: «Мария!» Инькаыс бергӧтчис да шуис: «Раввуни!» ─ миян моз сія лоӧ «Велӧтісьӧ!»

¹⁷ Исусыс горӧтчис сылӧ: «Эн павкӧтчы Ме бердӧ. Ме эд эг на лэбтісь Айӧ дынӧ. Мун Менам воннэз дынӧ да висьтав нылӧ: Ме лэбтіся Аслам Ай дынӧ да тіян Ай дынӧ. Лэбтіся Аслам Ен дынӧ да тіян Ен дынӧ».

¹⁸ Магдала Марияыс муніс велӧтчиссес дынӧ. Сія висьталіс нылӧ Исуссӧ адззылӧм йылісь да юӧртіс Сылісь кыввесӧ.

Велӧтчиссезлӧ Исуслӧн мыччасьӧм

¹⁹ Сія жӧ рытӧ Исуслӧн велӧтчиссес ӧксисӧ ӧтлаӧ. Керку ыбӧссэсӧ пӧдналісӧ, полісӧ иудейезісь да. Видзчисьтӧг локтіс Исусыс, сувтіс ны коласӧ да шуис: «Лӧнь олан тіянлӧ!»

²⁰ Сыбӧрын Сія мыччаліс нылӧ Ассис киэсӧ, ордлыэсӧ. Дӧсвидзисьсӧ казялӧм бӧрын велӧтчиссес гажмисӧ.

²¹ Исусыс бӧра шуис нылӧ: «Лӧнь олан тіянлӧ! Кыдз Менӧ ыстіс Айӧ, сідз и Ме ыста тіянӧс».

²² Сідз шуӧм бӧрын пӧльыштіс ныланьӧ да висьталіс: «Лэдзӧ Вежа Ловсӧ сьӧлӧманыт.

²³ Кинлӧ умӧль керӧмсӧ проститат, сія лоас проститӧм. Кинлісь одӧ проститӧ, сы вылын умӧль керӧмыс кольччас».

²⁴ Фома, мӧднёж сійӧ шуисӧ «Двойнишнӧй», вӧлі Исуслӧн даскык велӧтчись коласісь. Исуслӧн вовлӧм коста сія сэтӧн эз вӧв.

²⁵ Мӧд велӧтчиссес сылӧ висьталісӧ: «Мийӧ адззылім Дӧсвидзисьсӧ». А Фомаыс нылӧ висьталіс: «Ог кӧ адззыв Сылісь кӧрттуввезсянь дойдӧм киэсӧ, ог кӧ пешлы нійӧ чуньнам да ог кӧ пешлы киэзнам Сылісь ордлыэсӧ, ог верит».

²⁶ Чулаліс кыкьямыс лун. Исуслӧн велӧтчиссес бӧра ӧксисӧ керкуӧ. Ныкӧт вӧлі и Фомаыс. Керку ыбӧссэс вӧлісӧ пӧданаӧсь. Сэтчӧ локтіс Исусыс, сувтіс ны коласӧ да шуис: «Лӧнь олан тіянлӧ!»

²⁷ Сэсся горӧтчис Фомаыслӧ: «Вай татчӧ чуньтӧ да видзӧт Менчим киэзӧс, вай китӧ да пешлы ордлыэзӧс. Эн ло вериттӧмӧн, но ло веритісьӧн».

²⁸ Сэтчӧ Фомаыс шуис: «Менам Дӧсвидзисьӧ, менам Енӧ!»

²⁹ Исусыс висьталіс сылӧ: «Тэ ӧні веритан, Менӧ адззылін да. Шудаӧсь нія, кӧдна адззывтӧг Меным веритӧны».

³⁰ Уна мӧдік адззывлытӧмсӧ Исусыс керис велӧтчиссес син одзын. Сы йылісь эстӧн абу гижӧм.

³¹ Быдӧс эстӧн гижӧм сэтшӧм могӧн, медбы тійӧ пондіт веритны: Исусыс ─ Кристос-Мездӧтісь, Енлӧн Зон. Веритат кӧ Сылӧ, сэк Сы нимӧн тіян лоас олан.