Иоан 14 - Бур Юӧр 2019

¹ «Ась некытшӧм тӧждісьӧм оз ло сьӧлӧм выланыт: веритӧ Еныслӧ, веритӧ и Меным.

² Айӧ керкуын оланіныс уна. Эз бы вӧв сідз, сэк Ме эг бы висьтав: "Ме муна лӧсьӧтны тіянлӧ оланін".

³ Муна, лӧсьӧта тіянлӧ оланінсӧ да локта бӧр, босьта тіянӧс дынам.

⁴ Тійӧ тӧдат, кытчӧ Ме муна, и туйсӧ сэтчин тӧдат».

⁵ Фома нима велӧтчись шуис Сылӧ: «Дӧсвидзись! Мийӧ огӧ тӧдӧ, кытчӧ Тэ мунан. Кыдз сэк вермам тӧдны туйсӧ?»

⁶ Исусыс сылӧ висьталіс: «Ме ─ туйыс, быльыс да оланыс. Дзир Ме пыр позьӧ локны Айӧ дынӧ, абу мӧдік туй.

⁷ Тӧдіт бы тійӧ Менӧ, сэк тӧдіт бы и Менчим Айӧс. Ӧні Сійӧ тӧдат ни, тійӧ эд Сійӧ адззыліт».

⁸ Филип шуис Сылӧ: «Велӧтісь, мыччав миянлӧ Айтӧ, сэсся миянлӧ нем оз ков».

⁹ Исусыс шуис сылӧ: «Филип, сы дырна Ме тіянкӧт, и тэ он тӧд Менӧ! Кин адззыліс Менӧ, сія адззыліс Айӧс. Мыля нӧ тэ баитан, мыччав пӧ миянлӧ Айтӧ?

¹⁰ Он разь тэ верит: Ме Айӧ пытшкын, а Айӧ Ме пытшкын? Тіянлӧ Менам висьталӧмӧ абу Ассяням. Меын олісь Айӧ керӧ Ассис уджсӧ Ме пыр.

¹¹ Веритӧ Менам висьталӧмӧ: Ме Айӧ пытшкын, а Айӧ Ме пытшкын. Сідз одӧ кӧ веритӧ Меным, сэк веритӧ керӧмӧ понда.

¹² Тіянлӧ быльсӧ веськыта висьтала: Меным веритісьыс пондас керны Ме моз. И унажык пондас керны, Ме эд Айӧ дынӧ муна.

¹³ Коратӧ кӧ мый Айӧлісь Менам нимӧн, Ме сійӧ кера, медбы отирыс ошкисӧ Айсӧ Зоныс понда.

¹⁴ Мый корат Менам нимӧн, Ме сійӧ кера».

Вежа Лов сетны кӧсйӧм

¹⁵ «Радейтат кӧ Менӧ, олӧ Менам тшӧктӧммез сьӧрті.

¹⁶ Ме кора Айӧс сетны тіянлӧ мӧдік Дорйисьӧс, Кӧда пыр лоас тіянкӧт. И Айӧ Сійӧ сетас.

¹⁷ Сія Дорйисьыс ─ Быльыслӧн Лолыс. Сійӧ отирыс босьтны озӧ вермӧ, мыля Сійӧ озӧ адззӧ да озӧ тӧдӧ. Тійӧ тӧдат Сійӧ. Сія тіянкӧт и пыр лоас тіян пытшкын.

¹⁸ Ог коль тіянӧс ӧтнанытӧ, локта тіян дынӧ.

¹⁹ Етша ни кольччис. Отирыс сэсся озӧ ни Менӧ адззылӧ, а тійӧ Менӧ пондат адззыны. Ме ола, и тійӧ пондат овны.

²⁰ Сія лунӧ тійӧ пондат тӧдны: Ме Айӧ пытшкын, тійӧ Ме пытшкын, а Ме тіян пытшкын.

²¹ Менчим тшӧктӧммезӧс кин видзӧ сьӧлӧмас да олӧ ны сьӧрті, сія Менӧ радейтӧ. А Менӧ радейтісьсӧ Айӧ пондас радейтны. Сійӧ и Ме понда радейтны да Ачымӧс понда осьтны сылӧ».

²² Мӧд Иудаыс, кӧда абу Искариот, шуис Сылӧ: «Дӧсвидзись, Тэ мӧдан осьтны Асьтӧ дзир миянлӧ. А мыля он мӧд осьтны му вылісь отирлӧ быдӧнныслӧ?»

²³ Исусыс сылӧ висьталіс: «Кин Менӧ радейтӧ кӧ, сія олӧ Менам кыввез сьӧрті. И Менам Айӧ пондас радейтны сійӧ. Мийӧ локтамӧ сы дынӧ да пондам овны сы ордын.

²⁴ Менӧ мортыс оз кӧ радейт, сія оз ов Менам кыввез сьӧрті. Месянь кылӧмныт абу Менам, нія кыввес Менӧ ыстісь Айӧлӧн.

²⁵ Сійӧ Ме висьталі тіянлӧ, кытчӧдз эшӧ ӧтлаын тіянкӧт.

²⁶ Дорйисьыс ─ Вежа Лов. Сійӧ Айӧ ыстас Менам нимӧн. Вежа Лолыс велӧтас тіянӧс быдӧсӧ. Менчим быдӧс висьталӧмӧс Сія пондас уськӧтлыны тӧдвыланыт.

²⁷ Ме тіянлӧ коля лӧньсӧ. Ассим лӧньӧс сета тіянлӧ. Менам лӧньӧ не сэтшӧм, кыдз му вылісь отирлӧн. Сідзкӧ, ась оз ло сьӧлӧманыт некытшӧм тӧждісьӧм. Эд полӧ!

²⁸ Тійӧ кылітӧ Менчим висьталӧмӧс: муна тіян дынісь да бӧр локта тіян дынӧ. Радейтіт бы тійӧ Менӧ, сэк гажмит бы Айӧ дынӧ мунӧмӧ кузя. Айӧ эд Месся ыджытжык.

²⁹ Ме тіянлӧ быдӧс висьталі одзлань, медбы Меным веритіт, кӧр быдӧс аркмас.

³⁰ Меным баитны тіянкӧт кадыс кольччис етша ни. Локтӧ эта му вылын ыждалісьыс, но Ме дорӧдз сылӧн выныс абу.

³¹ Му вылісь отирыс ась пондӧны тӧдны: Ме радейта Айӧс и быдӧс кера Айӧ тшӧктӧм сьӧрті. Чеччӧ, мунам эстісь».