Иоан 13 - Бур Юӧр 2019

¹ Эта вӧлі Ыджыт лун одзын. Исусыс тӧдіс: локтіс кад Сылӧ бертны эта му вылісь Айыс дынӧ. Исусыс радейтіс эта му вылын Сылӧ веритіссесӧ. Ассис радейтӧмсӧ нылӧ мыччаліс медбӧрӧдз.

² Исусыс велӧтчиссескӧт рытнас пуксис сёйны. Симон-Искариотлӧн Иуда зонлӧ сэк кульыс пыртӧм ни вӧлі юрас вузавны Исуссӧ.

³ Исусыс тӧдіс: Айыс быдӧс сетіс Сы киэзӧ. Сія локтіс Еныс дынісь, Еныс дынӧ и бертӧ.

⁴ Исусыс сёян дорсис чеччис, чӧвтіс вевдӧрись паськӧмсӧ, босьтіс чышкӧт да домаліс косас.

⁵ Кисьтіс дозӧ ва. Сэсся пондіс миссьӧтны велӧтчиссеслісь коккезнысӧ да чышкыны косас домалӧм чышкӧтӧн.

⁶ Исусыс сибӧтчис Симон-Петра дынӧ. Петраыс шуис Сылӧ: «Дӧсвидзись! Тэныт я миссьӧтны менчим коккезӧс?»

⁷ Исусыс сылӧ висьталіс: «Менчим керӧмӧс тэ ӧні он вежӧрт, а сэсся вежӧртан».

⁸ Петраыс шуис Сылӧ: «Тэнӧ некӧр ог лэдз миссьӧтны коккезӧс!» Исусыс сылӧ висьталіс: «Ог кӧ миссьӧт тэнӧ, сэк тэ он ло Мекӧт».

⁹ Симон-Петра сэтчӧ шуис Сылӧ: «Дӧсвидзись! Сэк миссьӧт коккезӧс и киэзӧс, и юрӧс!»

¹⁰ Исусыс сылӧ висьталіс: «Миссьӧтӧмыслӧ дзир коккесӧ колӧ миссьӧтны. Сія эд быдсӧн сӧстӧм. Сідз и тійӧ сӧстӧмӧсь, но абу быдӧнныт».

¹¹ Исусыс эд тӧдіс ни, кин Сійӧ вузалас. Сійӧн и висьталіс, абу пӧ тійӧ быдӧнныт сӧстӧмӧсь.

¹² Исусыс миссьӧтіс велӧтчиссеслісь коккезнысӧ, пасьтасис да бӧр пуксис сёйны. Сія нылісь юаліс: «Вежӧртіт я, мый Ме кери тіянлӧ?

¹³ Тійӧ шуат Менӧ Велӧтісьӧн, Дӧсвидзисьӧн. Веськыта висьталіт: Ме былись Сія.

¹⁴ Сідзкӧ, Ме кӧ тіян Дӧсвидзись да Велӧтісь миссьӧті коккезнытӧ, сідз и тіянлӧ колӧ ӧтамӧднытлісь миссьӧтны коккезнытӧ.

¹⁵ Ме мыччалі, кыдз колӧ керны, медбы и тійӧ керит Ме моз.

¹⁶ Тіянлӧ быльсӧ веськыта висьтала: раб абу ыджытжык аслас кӧзяинся, ыстӧмыс абу ыджытжык сійӧ ыстісься.

¹⁷ Тӧдат кӧ сійӧ, сэк шудаӧсь тійӧ, сы сьӧрті кӧ олат.

¹⁸ Ог висьтав быдӧнныт йылісь. Ме тӧда Ассим бӧрйӧммесӧ. Но ась лоас Вежа Гижӧтас висьталӧм сьӧрті: "Мекӧт няньсӧ сёйисьыс лэбтісис Ме вылӧ".

¹⁹ Одзлань тіянлӧ висьтала, лоӧмӧдззас. Быдӧс лоӧмыс бӧрын медбы тійӧ веритіт: Ме Сія, Кӧда эм.

²⁰ Тіянлӧ быльсӧ веськыта висьтала: Кин босьтӧ Месянь ыстӧмсӧ, сія Менӧ босьтӧ. Менӧ босьтісьыс босьтӧ Менӧ Ыстісьсӧ».

Исус висьталӧ Сійӧ вузалісь йылісь

²¹ Сідз висьталӧм бӧрын Исуслӧн сьӧлӧмыс дзугыльтчис. Сэк Сія шуис: «Тіянлӧ быльсӧ веськыта висьтала: тіян коласісь ӧтік Менӧ вузалас».

²² Сэк велӧтчиссес пондісӧ дзарьясьны ӧтамӧдныс вылӧ. Нія эзӧ вежӧртӧ, кин йылісь Сія висьталіс.

²³ Исуслӧн ӧтік велӧтчись, кӧдӧ Сія радейтіс, пукаліс Сыкӧт ордчӧн.

²⁴ Сылӧ Симон-Петра гусьӧник юрнас гогыштіс, тшӧктіс юавны Исусыслісь, кин йылісь Сія висьталіс.

²⁵ Мӧдыс пӧліньтчыштіс Исус морос дынӧ да юаліс: «Дӧсвидзись, кӧда сія?»

²⁶ Исус шуис: «Кӧдалӧ Ме сета кӧтӧтӧм нянь торсӧ». Сія кӧтӧтіс нянь торсӧ да сетіс сійӧ Иудалӧ, Симон-Искариот зонлӧ.

²⁷ Сія нянь тор бӧрын Иудаыс пытшкӧ пырӧм сотана. Сэк Исусыс Иудаыслӧ шуис: «Мый лӧсьӧтчин керны, кер, эн падмӧтчы».

²⁸ Пукаліссес эзӧ вежӧртӧ, мыйлӧ Исусыс сідз висьталіс.

²⁹ Иудаыс новйӧтіс сьӧм видзан дозсӧ. Сійӧн ӧтіккезлӧ юраныс пырис, Исусыс пӧ сійӧ тшӧктӧ небны, мый колӧ вежалун кежӧ. А мӧддэс юраныс пыртісӧ, поди, пӧ тшӧктіс мыйкӧ сетны кориссезлӧ.

³⁰ Иуда босьтіс нянь торсӧ да петіс. Ӧтӧрас вӧлі ой.

Виль тшӧктӧм

³¹ Иудаыс петӧм бӧрын Исусыс висьталіс: «Ӧні оссис Морт Зонлӧн югьялӧмыс, а Сы пыр оссис Еныслӧн югьялӧмыс.

³² Еныслӧн югьялӧмыс кӧ оссис Зоныс пыр, сэк Еныс Ас пытшкас осьтас Зоныслісь югьялӧмсӧ. Эта чожа ни лоас.

³³ Челядь! Ме ог ни дыр ло тіянкӧт. Менӧ пондат кошшыны. Но и тіянлӧ Ме висьтала, кыдз отирыслӧ висьталі: "Кытчӧ Ме муна, сэтчин тійӧ одӧ вермӧ локны".

³⁴ Виль тшӧктӧм сета тіянлӧ: радейтӧ ӧтамӧднытӧ! Кыдз Ме радейта тіянӧс, сідз и тійӧ радейтӧ ӧтамӧднытӧ.

³⁵ Пондат кӧ радейтны ӧтамӧднытӧ, сы сьӧрті быдӧнныс пондасӧ тӧдны: тійӧ велӧтчиссес Менам».

Петралӧ суськисьӧм йылісь висьталӧм

³⁶ Симон-Петра юаліс Сылісь: «Дӧсвидзись, кытчӧ Тэ мунан?» Исусыс сылӧ висьталіс: «Кытчӧ Ме муна, тэ ӧні он вермы мунны Ме сьӧрӧ. Сыбӧрын мунан Ме сьӧрӧ».

³⁷ Петра шуис Сылӧ: «Дӧсвидзись, мыля ме ӧні ог вермы мунны Тэ сьӧрӧ? Ме лолӧс пукта Тэ понда!»

³⁸ Исусыс сылӧ висьталіс: «Ловтӧ Ме понда пуктан? Тэныт быльсӧ веськыта висьтала: петук китсӧвттӧдз тэ куимись суськисян Менӧ тӧдӧмись».