Иоан 11 - Бур Юӧр 2019

¹ Вифания посадісь Лазар нима морт шогаліс. Сыкӧт ӧтлаын олісӧ Мария да Марфа сойес.

² Сія Марияыс и мавтіс сэсся Исуслісь коккесӧ чӧскыт руа винас да чышкис юрсинас. Сылӧн Лазар воныс шогаліс.

³ Сойес ыстісӧ мортӧс висьтавны Исусыслӧ: «Дӧсвидзись! Мортыс, кӧдӧ Тэ радейтан, шогалӧ».

⁴ Сійӧ кылӧм бӧрын Исус шуис: «Сія шогӧтыс оз вайӧт кулӧмӧдз. Сія Енлӧ ваяс ошкӧмсӧ, медбы сы понда пондісӧ ошкыны и Енлісь Зонсӧ».

⁵ Исусыс радейтіс Лазарсӧ да сылісь Марфа да Мария сойесӧ.

⁶ Лазарлӧн шогалӧм йылісь кылӧм бӧрын Исусыс сэтӧн оліс эшӧ кык лун сьӧрна.

⁷ Сэсся Сія висьталіс Аслас велӧтчиссезлӧ: «Мунам бӧр Иудеяас».

⁸ Велӧтчиссес шуисӧ Сылӧ: «Велӧтісь! Важын я иудейес кошшисӧ Тэнӧ шупкавны иззэзнас? И Тэ бӧра мунан сэтчин?»

⁹ Исусыс висьталіс: «Абу я лунас даскык час? Луннас ветлӧтісьыс оз чужйись, сія эд адззӧ му вывсис лунся югытсӧ.

¹⁰ Ойнас ветлӧтісьыс чужйисьӧ, сыкӧт югытыс абу да».

¹¹ Сійӧ висьталӧм бӧрын шуис: «Лазар ёртным онмӧссьӧм. Ме муна сійӧ саймӧтны».

¹² Велӧтчиссес висьталісӧ: «Дӧсвидзись! Онмӧссис кӧ, сэк веськалас».

¹³ Исусыс нылӧ висьталіс Лазарлӧн кулӧм йылісь, а велӧтчиссес вежӧртісӧ, Сія пӧ висьталіс узьӧм йылісь.

¹⁴ Сэк Исусыс нылӧ веськыта висьталіс: «Лазарыс куліс.

¹⁵ Ме эг вӧв сэтчин, сійӧн тіян понда гажми. Ӧні тійӧ пондат веритны. Локтӧ, мунам сы дынӧ».

¹⁶ Сэк Фома, кӧдӧ мӧднёж шуисӧ «Двойнишнӧй», шуис мӧд велӧтчиссеслӧ: «Мунам, и мийӧ кулам Сыкӧт».

¹⁷ Исусыс локтіс Вифания дынӧ. Сэтӧн Сылӧ висьталісӧ, Лазарсӧ дзебӧмсянь чулалӧм пӧ нёль лун ни.

¹⁸ Вифанияыс вӧлі матын Ерусалим дынсянь, сэтчӧдз вӧлі дасвит стадий гӧгӧр.

¹⁹ Иудейес унаӧн локтісӧ бурӧтны Марфасӧ да Мариясӧ, вонныс куліс да.

²⁰ Марфаыс кыліс Исус локтӧм йылісь да петіс Сылӧ паныт. Марияыс кольччис пукавны гортас.

²¹ Сэк Марфаыс шуис Исусыслӧ: «Дӧсвидзись! Вӧлін бы Тэ татӧн, сэк эз бы кув менам вонӧ.

²² Да и ӧні тӧда: коран кӧ мыйкӧ Еныслісь, Сія Тэныт сетас».

²³ Исусыс сылӧ висьталіс: «Ловзяс тэнат воныт».

²⁴ Марфаыс шуис Сылӧ: «Тӧда: сія ловзяс медбӧрья лунас, ловзян лунас».

²⁵ Исусыс висьталіс: «Ме Ловзьӧтісь да олан Сетісь. Меным веритісьыс и кулас кӧ, пондас овны.

²⁶ Быдыс, кин олікас веритӧ Меным, некӧр оз кув. Веритан я тэ Менам кыввезӧ?»

²⁷ Марфаыс Сылӧ шуис: «Ме верита, Дӧсвидзисьӧ! Тэ ─ Кристос-Мездӧтісь, му вылӧ локтӧм Енлӧн Зон».

²⁸ Сійӧ висьталӧм бӧрын Марфаыс муніс да гусьӧн корис Мария сойсӧ. Сылӧ висьталіс: «Велӧтісьыс татӧн, Сія тэнӧ корӧ».

²⁹ Сійӧ кылӧмсянь Марияыс перыта чеччис да муніс Исусыс дынӧ.

³⁰ Исусыс сэк посадас эз на пыр. Сія сулаліс сэтчин, кытӧн панталіс Сійӧ Марфаыс.

³¹ Марияыскӧт керкуас вӧлісӧ иудейез, кӧдна бурӧтісӧ сійӧ. Нія казялісӧ Мариялісь керкуись перыта петӧмсӧ да мунісӧ сы сьӧрӧ. Нія шуисӧ, сія пӧ, натьтӧ, муніс дзебсянінас герьявны.

³² Марияыс сибӧтчис Исусыс дынӧ, усис Сылӧ коккезас да шуис: «Дӧсвидзисьӧ! Вӧлін бы Тэ татӧн, сэк эз бы кув вонӧ».

³³ Мариаяыслісь да сыкӧт локтӧм отирыслісь горзӧмсӧ адззикӧ Исусыс Ачыс пондіс тӧждыны. Сія сьӧкыта ышловзисис

³⁴ да юаліс: «Кытчӧ сійӧ дзебитӧ?» Сылӧ висьталісӧ: «Дӧсвидзись! Лок видзӧт».

³⁵ Исусыслӧн петісӧ синваэс.

³⁶ Сэк иудейес шуисӧ: «Видзӧт, кыдз Сія радейтӧм Лазарсӧ».

³⁷ Ны коласісь мукӧдыс шуисӧ: «Сія синтӧмлісь осьтіс синнэсӧ. Поди, Сія вермис бы керны, медбы и Лазарыс эз кув?»

³⁸ Исусыс тӧждісьӧмӧн сибӧтчис дзебсянін дынас. Сія вӧлі лӧсьӧтӧм из керӧс гыркын. Пыраніныс вӧлі пӧдналӧм изӧн.

³⁹ Исусыс тшӧктіс вештыны изсӧ. Кулӧмыслӧн Марфа сойыс шуис Сылӧ: «Дӧсвидзись! Ныр вуж ни пиньӧвтӧ, сія эд нёль лун ни татӧн куйлӧ».

⁴⁰ Исусыс шуис сылӧ: «Эг разь Ме тэныт висьтав: пондан кӧ веритны, адззылан Енлісь югьялӧмсӧ?»

⁴¹ Сэк дзебсянін одзсис вештісӧ из пӧдансӧ. Сэтӧн куйліс кулӧм Лазарыс. Исусыс лэбтіс синнэсӧ енӧжӧ да шуис: «Айӧ, буркывта Тэнӧ! Тэ эд кылін Менӧ.

⁴² Ме тӧда: Тэ пыр кылан Менӧ. Сідз висьталі татӧн сулалісь отир понда, медбы нія пондісӧ веритны: Тэ ыстін Менӧ».

⁴³ Сідз висьталӧм бӧрын Исусыс горӧн корис: «Лазар! Пет сэтчинісь!»

⁴⁴ Кулӧмыс петіс. Кикокыс сылӧн вӧлі каттьӧм дзебсян дӧраӧн. Чужӧмыс вӧлі кӧрталӧм чышьянӧн. Исусыс шуис: «Мездӧтӧ дӧраэзсис, ась мунӧ».

Исуссӧ вийны баитчӧм

⁴⁵ Иудейес, кӧдна локтӧмась вӧлі Марияыс дынӧ, адззылісӧ Исуслісь керӧмсӧ. Ны коласісь унаӧн пондісӧ Сылӧ веритны.

⁴⁶ А мукӧдыс мунісӧ фарисейез дынӧ да висьтасисӧ, мый керис Исусыс.

⁴⁷ Сэк аркирейес фарисейескӧт ӧксисӧ баитчыны. Нія шуисӧ: «Мый миянлӧ керны? Сія Мортыс уна адззывлытӧмсӧ керӧ.

⁴⁸ Огӧ кӧ сувтӧтӧ Сійӧ, быдӧнныс пондасӧ Сылӧ веритны. Локтасӧ Римись йӧз, миян кипод увтісь босьтасӧ вежаиннымӧс да отирнымӧс».

⁴⁹ Ны коласын вӧлі Каиаф нима морт. Сія воӧ Каиафыс вӧлі аркирей. Сія шуис: «Тійӧ нем одӧ тӧдӧ,

⁵⁰ одӧ вежӧртӧ: миянлӧ буржык, кулас кӧ отирным понда ӧтік морт. Сэк оз кув быдӧс отирным».

⁵¹ Сія эз баит ассяняс. Сія воӧ эд аркирейнас вӧлі Каиафыс, и кыдз аркирей сія юӧртіс одзланьсясӧ ─ Исуслісь отир понда кулӧмсӧ.

⁵² Сія оз кув дзир иудей отир понда, но и медбы ӧтлаӧ ӧктыны Енлісь рознитчӧм челядьсӧ.

⁵³ Сія лунӧ нія баитчисӧ Исуссӧ вийны.

⁵⁴ Сэксянь Исусыс эз ни ветлӧт иудейес син одзын. Сія муніс кушму дынісь Ефраим карӧ. Аслас велӧтчиссезкӧт сувтчис сэтчин.

⁵⁵ Сибалӧ вӧлі Ыджыт лун, иудейезлӧн вежалун. Сія муись уна отир локтісӧ Ерусалимӧ Ыджыт лун одзас, медбы асьнысӧ сӧстӧмтны, кыдз вӧлі висьталӧм Туйдӧтын.

⁵⁶ Локтӧм отирыс кошшисӧ Исуссӧ, Вежа Керкуын юасисӧ ӧтамӧдныслісь: «Висьталӧ, локтас-оз Сія Ыджыт лун вылас?»

⁵⁷ Аркирейес фарисейескӧт отирыслӧ тшӧктісӧ юӧртны, кин пондас кӧ тӧдны, кытӧн Сія, медбы висьталісӧ. Сідз мӧдісӧ кутны Исуссӧ.