Иоан 10 - Бур Юӧр 2019

¹ Исусыс шуис: «Тіянлӧ быльсӧ веськыта висьтала: кин баля гидас оз пыр ыбӧсӧт, пырӧ мӧдіклаӧт, сія мортыс гусясись да лёк керись.

² Ыбӧсӧт пырисьыс ─ баляэз сьӧрын видзӧтісь.

³ Гид сьӧрын видзӧтісьыс сылӧ осьтӧ ыбӧссӧ. Баляэс кылӧны сылісь шысӧ. Сія кытсалӧ ассис баляэсӧ нимнаныс, лэдзалӧ нійӧ.

⁴ Баляэсӧ лэдзалас да мунӧ одзас. Баляэс тӧдӧны сылісь шысӧ да мунӧны сы сьӧрӧ.

⁵ Тӧдтӧм морт сьӧрын нія озӧ мунӧ, пышшӧны сы дынісь. Сылісь шысӧ эд нія озӧ тӧдӧ».

⁶ Исусыс сійӧ велӧтан висьтсӧ висьтасис фарисейеслӧ. Но нія эзӧ вежӧртӧ, мый йылісь Сія баитіс.

⁷ Сэк Исусыс нылӧ шуис: «Тіянлӧ быльсӧ веськыта висьтала: Ме ─ баляэслӧ ыбӧс.

⁸ Ме одзын вовліссес быдӧнныс вӧлісӧ гусясиссез да лёк кериссез. Баляэс эзӧ кывзісьӧ нійӧ.

⁹ Ме ─ ыбӧс: Меӧт пырисьыс мезмас. Сія пырас и петас, видзсӧ адззас.

¹⁰ Гусясись локтӧ гусявны, вийны, разьны. Ме локті сетны олан, сетны олансӧ тырмӧмви.

¹¹ Ме ─ баляэз сьӧрын бур видзӧтісь. Баляэз сьӧрын бур видзӧтісьыс ассис ловсӧ пуктӧ баляэс понда.

¹² Баляэз сьӧрын медалӧм видзӧтісьлӧн баляэс эд абу асласӧсь. Казялас кӧ сія кӧинӧс, коляс баляэсӧ, ачыс пышшас. Кӧиныс гусялас баляэсӧ, вашӧтас нійӧ ӧтмӧдӧрӧ.

¹³ Баляэз сьӧрын медалӧм видзӧтісьыс пышшӧ, сія эд медалӧм. Сія оз тӧждісь баляэс понда.

¹⁴ Ме ─ баляэз сьӧрын бур видзӧтісь: Ме тӧда Ассим баляэзӧс, а Менам баляэзӧ тӧдӧны Менӧ.

¹⁵ Айӧ тӧдӧ Менӧ, сідз и Ме тӧда Айӧс. Ассим оланӧс пукта баляэзӧ понда.

¹⁶ Менам эмӧсь и мӧдік баляэз, нія мӧдік йӧрись. Меным колӧ и нійӧ вайӧтны. Нія кыласӧ Менчим шыӧс, сэк лоас ӧтік баля чукӧр да ны сьӧрын ӧтік видзӧтісь.

¹⁷ Менӧ Айӧ радейтӧ сійӧн, мыля Ме сета Ассим оланӧс, медбы сійӧ бӧр босьтны.

¹⁸ Менчим оланӧс озӧ мырддьӧ, Ме сійӧ Ачым сета. Оланӧс Ме верма сетны и верма бӧр босьтны. Сідз тшӧктіс керны Айӧ».

¹⁹ Этна кыввезсянь иудейес бӧра пондісӧ етшасьны.

²⁰ Унаӧн ны коласісь баитісӧ: «Мый тійӧ Сійӧ кывзатӧ? Сэрпӧсь лов Сы пытшкын, сійӧн бӧбсорӧн и баитӧ».

²¹ Мӧдіккез баитісӧ: «Этна кыввес абу бӧбсорӧн баитісьлӧн. Вермас разь сэрпӧсь лолыс осьтны синнэз синтӧмлісь?»

Исуслӧ озӧ веритӧ

²² Вӧлі тӧв. Сэк Ерусалимас вӧлі «Вежа Керку вильмӧтӧм» нима вежалун.

²³ Исусыс ветлӧтіс Вежа Керкуын «Соломонлӧн вевттьӧминын».

²⁴ Сэтӧн иудейес кытшӧвтісӧ Сійӧ. Нія юалісӧ: «Дыр я Тэ пондан миянӧс ылӧтлыны? Тэ кӧ Кристос-Мездӧтісь, веськыта висьтав».

²⁵ Исус шуис: «Ме тіянлӧ висьталі ни, а тійӧ одӧ веритӧ. Ме йылісь висьталӧны и Айӧ нимӧн Менам керӧммезӧ.

²⁶ Но тійӧ одӧ веритӧ. Тійӧ эд абу Менам баляэз коласісь. Ме тіянлӧ эта йылісь висьтавлі ни.

²⁷ Менам баляэзӧ кылӧны Менчим шыӧс да мунӧны Ме сьӧрӧ. И Ме тӧда нійӧ.

²⁸ Ме сета нылӧ пырся олан. Нія некӧр озӧ кулӧ. И Менам киись нійӧ некин оз гусяв.

²⁹ Менам Айӧ медыджыт. Сія сетіс Меным баляэсӧ. Айӧ киись нійӧ некин оз вермы мырддьыны.

³⁰ Ме да Айӧ ─ ӧтік».

³¹ Сэк иудейес бӧра босьтісӧ иззэз, медбы нійӧн шупкавны Исуссӧ.

³² Исусыс шуис нылӧ: «Уна бурсӧ Ме кери тіянлӧ Айӧ тшӧктӧм сьӧрті. Кӧда бур керӧм понда мӧдат Менӧ шупкавны иззэзнас?»

³³ Иудейес висьталісӧ Сылӧ: «Тэнӧ бурсӧ керӧмыт понда огӧ шупкалӧ иззэзнас. Шупкалам Асьтӧ Ен туйӧ пуктӧм понда, Тэ эд морт».

³⁴ Исусыс шуис нылӧ: «Тіян Туйдӧтын абу разь гижӧм: "Ме висьталі: тійӧ ─ еннэз".

³⁵ Вежа Гижӧтас висьталӧмыс оз эд вежсьы. Еныс шуӧ еннэзӧн нійӧ, кинлӧ сетіс Ассис кывсӧ.

³⁶ Сэк мыля нӧ тійӧ Менӧ шуат, серала пӧ Еныс вылын? Сы понда я, мыля висьталі: "Ме ─ Енлӧн Зон"? Менӧ эд Айӧ керис вежаӧн да ыстіс му вылас.

³⁷ Ме ог кӧ кер Айӧлісь уджсӧ, сэк Меным эд и веритӧ.

³⁸ Кера кӧ Айӧлісь уджсӧ, сэк веритӧ керӧмам, Меным кӧ одӧ веритӧ. Сэк пондат тӧдны да веритны: Айӧ ─ Меын, Ме ─ Сыын».

³⁹ Сэк Исуссӧ бӧра мӧдісӧ кутны, но Сія эз сетчы нылӧ.

⁴⁰ Исусыс муніс Иордан ю мӧдӧрас да сэтчин кольччис. Сэтӧн одзжык пыртліс Иоаныс.

⁴¹ Уна отир ӧксисӧ Сы дынӧ. Нія баитісӧ: «Иоаныс эз мыччав ӧтік адззывлытӧм керӧм, но мый сія висьталіс Исусыс йылісь, быдӧс быль».

⁴² Сэтчин унаӧн пондісӧ веритны Исусыслӧ.