Иоан 1 - Бур Юӧр 2019

Кыв пӧртчис Мортӧ

¹ Медодз вӧлі Кыв. Кылыс вӧлі Енкӧт. Кылыс вӧлі Ен.

² Кылыс медодз вӧлі Енкӧт.

³ Быдӧс, мый эм, керӧм Сы пыр. Сытӧг нем эз вӧв керӧм.

⁴ Сыын вӧлі олан. Сія оланыс вӧлі отирсӧ Югдӧтан.

⁵ Югытыс пемытсӧ югдӧтӧ. Пемытыс югытсӧ эз пӧдты.

⁶ Еныс ыстіс Иоан нима мортӧс.

⁷ Иоаныс локтіс висьтасьны Югытыс йылісь, медбы быдӧнныс веритісӧ Югытыслӧ.

⁸ Ачыс сія эз вӧв югытыс. Сія локтіс висьтасьны Югытыс йылісь.

⁹ Сія вӧлі былись Югытыс, быд мортсӧ Югдӧтісьыс, Кӧда локтіс му вылас.

¹⁰ Сія вӧлі му вылас. Му вылісьыс быдӧс вӧлі керӧм Сы пыр, но му вылісь отирыс Сійӧ эзӧ тӧдӧ.

¹¹ Сія локтіс Аслас отир дынӧ, нія тай Сійӧ абутӧм туйӧ пуктісӧ.

¹² А нылӧ, кӧдна лэдзисӧ Сійӧ сьӧлӧманыс да веритісӧ Сылӧ, шуис лоны Енлӧн челядьӧн.

¹³ Нія эзӧ шогмӧ вирсянь, вывтырлӧ да мортлӧ колӧмсянь, но шогмисӧ Еныссянь.

¹⁴ Кылыс пӧртчис мортӧ, оліс миянкӧт. Сія вӧлі тырӧм бурсетӧмнас да быльнас. Мийӧ адззылім Сылісь югьялӧмсӧ, ӧтка Зонлӧ сія югьялӧмыс сетӧм Айсянь.

¹⁵ Сы йылісь висьтавліс Иоан. Сія горӧн юӧртіс: «То Сія, Кӧда йылісь ме и висьтавлі: ме бӧрсянь Локтісьыс месся ыджытжык. Сія месся одзжык эд вӧлӧм ни».

¹⁶ Сылӧн быдӧс тырмӧмись мийӧ быдӧнным босьтім бурсетӧм вылӧ бурсетӧм.

¹⁷ Туйдӧтыс вӧлі сетӧм Моисей пыр. Бурсетӧмыс да быльыс локтісӧ Кристос Исус пыр.

¹⁸ Енсӧ отирыс некӧр эзӧ адззывлӧ. Сійӧ миянлӧ мыччаліс Айыскӧт ӧтлаын олісь ӧтка Зоныс.

Пыртісь Иоан

¹⁹ Ерусалимись иудейес ыстісӧ вежауджаліссезӧс да левиттэзӧс юавны Иоанлісь, кин сія. И Иоаныс нылӧ висьталіс ас йывсис.

²⁰ Сія веськыта шуис: «Ме абу Кристос-Мездӧтісь».

²¹ Сэк сылісь юалісӧ: «Тэ сэк Илля?» Сія шуис: «Ме абу Илля». Бӧра юалісӧ: «Тэ сэк Енсянь юӧртісь?» Сія шуис: «Абу».

²² Сэк сылісь юалісӧ: «Кин нӧ сэк тэ? Мый висьталам миянӧс ыстіссеслӧ? Мый тэ висьталан ас йывсит?»

²³ Иоаныс висьталіс: «Ме кушмуын горӧтлісьлӧн шы: "Лӧсьӧтӧ веськыт туй Дӧсвидзисьыслӧ!" Сідз тай висьтавлӧм вӧлі Енсянь юӧртісь Исай».

²⁴ Ыстӧммес вӧлісӧ фарисейез коласісь.

²⁵ Иоаныслісь нія юалісӧ: «Абу кӧ тэ Кристос-Мездӧтісь, абу Илля, абу Енсянь юӧртісь, мыля нӧ сэк тэ отирсӧ пыртан?»

²⁶ Иоаныс нылӧ висьталіс: «Ме пырта ваӧн, но коласаныт сулалӧ Сія, Кӧдӧ тійӧ одӧ тӧдӧ.

²⁷ Сія локтӧ ме бӧрын, но месся одзжык Сія вӧлӧм ни. Ме абу туяна морт нельки пӧрччавны Сы кӧмкӧтісь воньсӧ».

²⁸ Эта вӧлі Вифаварын, Иордан ю дорын. Сэтӧн Иоаныс пыртіс отирсӧ.

Енлӧн Дзель

²⁹ Мӧд лунас Иоаныс казяліс сы дынӧ локтісь Исуссӧ да шуис: «То Енлӧн Дзельыс! Сія босьтӧ отирлісь умӧль керӧммесӧ Ас вылас.

³⁰ Ме Сы йылісь и висьтавлі: "Ме бӧрсянь локтӧ Морт, Кӧда месся ыджытжык. Месся одзжык эд Сія вӧлӧм ни".

³¹ Ме Сійӧ эг тӧдлы. Но локті пыртны ваӧн, медбы Израильыс пондіс тӧдны Сійӧ».

³² Сэк Иоаныс висьтасис: «Ме адззылі, кыдз енӧжсянь дуді моз Сы вылӧ лэдзчисис Вежа Лов да кольччис Сы вылын.

³³ Ме эг тӧд Сійӧ. Отирсӧ ваӧн пыртны менӧ Ыстісьыс висьталіс: "Кӧр адззылан, Кин вылӧ лэдзчисяс Лов да кольччас Сы вылын, Сія пондас пыртны Вежа Лолӧн".

³⁴ И ме адззылі да висьтала: Сія ─ Енлӧн Зон».

Медодзза велӧтчиссез

³⁵ Мӧд лунас Иоаныс аслас кык велӧтчиськӧт бӧра сулаліс сэтчин.

³⁶ Сія казяліс мунісь Исуссӧ да шуис: «То Енлӧн Дзельыс!»

³⁷ Сылісь кыввесӧ кылӧм бӧрсянь кыкнан велӧтчисьыс мунісӧ Исусыс сьӧрӧ.

³⁸ Исусыс бергӧтчис, казяліс нійӧ да юаліс: «Мый тіянлӧ колӧ?» Мӧддэс юалісӧ Сылісь: «Велӧтісь, кытӧн Тэ олан?»

³⁹ Сія шуис: «Мунам, адззылат». Нія мунісӧ видзӧтны Сылісь оланінсӧ. Сэк вӧлі нёльӧт час гӧгӧр. Сійӧ лунсӧ нія чулӧтісӧ Сыкӧт.

⁴⁰ Ӧтыс, кӧда кыліс Иоансянь Исусыс йылісь висьталӧмсӧ да муніс Сы сьӧрӧ, вӧлі Ӧндрей, Симон-Петралӧн вон.

⁴¹ Ӧндрейыс адззис ассис Симон вонсӧ да висьталіс: «Мийӧ адззим Мездӧтісьсӧ!» Мӧд моз кӧ шуны, сія лоӧ Кристос.

⁴² Ӧндрейыс вонсӧ вайӧтіс Исусыс дынӧ. Исусыс видзӧтіс сы вылӧ да шуис: «Тэ Симон, Ионалӧн зон. Тэнӧ пондасӧ шуны Кифа». Кифа кывсӧ вуджӧтны кӧ, лоӧ «из», а мӧд моз «Петра».

Филипӧс Нафанаилкӧт корӧм

⁴³ Мӧд лунас Исус лӧсьӧтчис мунны Галилея муӧ. Сія панталіс Филипӧс да шуис: «Лок Ме сьӧрӧ».

⁴⁴ Филипыс вӧлі Вифсаида карись. Ӧндрей да Петра вӧлісӧ сэтчинісь жӧ.

⁴⁵ Филипыс адззис Нафанаилӧс да висьталіс: «Мийӧ адззим Сійӧ, Кӧда йылісь гижӧмась Моисейыс Туйдӧтас да Енсянь юӧртіссес. Сія Назарет карись Исус, Ӧсиплӧн зон».

⁴⁶ Нафанаилыс сылӧ шуис: «Вермас разь мыйкӧ бурыс петны Назаретісь?» Филип шуис: «Лок да видзӧт».

⁴⁷ Исусыс казяліс Сы дынӧ локтісь Нафанаилсӧ да висьталіс: «Эта былись Израились морт, оз ылӧтлы».

⁴⁸ Нафанаилыс юаліс Сылісь: «Кытісь Тэ менӧ тӧдан?» Исусыс сылӧ висьталіс: «Ме тэнӧ адззылі инжир пу увтісь. Сэтӧн тэ вӧлін Филипыс кортӧдз».

⁴⁹ Нафанаилыс Сылӧ шуис: «Велӧтісь! Тэ ─ Енлӧн Зон, Тэ ─ Израильлӧн Ӧксу».

⁵⁰ Исусыс шуис сылӧ: «Тэ пондін веритны, кӧр Ме висьталі: "Ме тэнӧ адззылі инжир пу увтісь". Висьтала: тэ адззылан сысся унажык адззывлытӧм керӧммесӧ».

⁵¹ Сэтчӧ содтіс: «Тіянлӧ быльсӧ веськыта висьтала: ӧнісянь пондат адззыны осьта енӧжсӧ да Енлісь ангеллэсӧ, кӧдна лэдзчӧны Морт Зон дынӧ да кайӧны енӧжас».