Еврейезлӧ 9 - Бур Юӧр 2019

¹ Одзза йитӧтас вӧлісӧ Енлӧ кысъялӧм йылісь да му вылісь скиния йылісь тшӧктӧммез.

² Му вылісь скинияыс вӧлі лэбтӧм сідз: одзланяс вӧлі «Вежаин», сэтӧн сулалісӧ бивидзан да пызан, кӧда вылын куйлісӧ Енлӧ вайӧм няннез.

³ Пытшкыс вӧлі сайӧвтӧм ӧшӧтӧм дӧраӧн. Сайӧвтӧминсӧ шуисӧ «Вежася-вежаин».

⁴ Сэтӧн сулалісӧ зарниись тшынӧтчан пызан да Йитӧтӧн Коробья, кӧда быд ладорсянь вӧлі вевттьӧм зарниӧн. Сэтӧн куйліс енӧжись маннаӧн зарни доз, Ааронлӧн дзоридзасьӧм бедь да Йитӧтӧн изпӧввез.

⁵ Йитӧтӧн Коробья вевт вылас вӧлісӧ керувиммез ─ ангеллэз, кӧдна мыччалісӧ Енлісь югьялӧмсӧ. Нія кыкӧн борддэзнаныс вевттисӧ коробья вевтсӧ, умӧль керӧммез лэдзанінсӧ. Ӧні сы йылісь унасӧ оз ков баитны.

⁶ Сідз вӧлі лэбтӧм скинияыс. Скиния Вежаинас кысъявны Еныслӧ вежауджаліссес пыравлісӧ быд лун.

⁷ Саяс, Вежася-вежаинас, воас ӧтпырись пыравліс дзир ӧтнас аркирейыс. Сія пыртліс вир аслас да отирлӧн умӧль керӧммез понда, кӧднӧ нія керисӧ тӧдтӧг.

⁸ Сійӧн Вежа Лолыс висьталӧ: кытчӧдз сулалӧ одзза скинияыс, Вежася-вежаинас туйыс пӧдана.

⁹ Сія мыччаліс ӧння кадсясӧ. Енлӧ вайӧм козиннэс да езъяланнэс озӧ вермӧ сӧстӧмтны вайисьыслісь сьӧлӧмсӧ.

¹⁰ Эта быдӧс дзир вывтыр понда керӧм: сёяннэз, юаннэз, быдкодь миссьӧтӧммез, быдпӧлӧс керӧммез. Сідз коліс керны кытшӧмкӧ кадӧдз, виль моз лӧсьӧттӧдз.

Виль йитӧт дырни Енлӧ кысъялӧм

¹¹ Локтіс Кристос, бурсӧ Вайись Аркирей. Сія пырис ыджытжык да быдсӧн бур скинияӧ. Скинияыс абу керӧм киӧн, абу му вылісьыс кодь.

¹² Кристосыс пырис Вежася-вежаинас Аслас вирӧн, эз пыр кӧзаэз да пороззэз вирӧн. Сідз Сія ӧтпыр да пыр кежӧ вештісис миян мездісьӧм понда.

¹³ Мортыс мыйкӧ умӧльӧ кӧ керас, сэк сійӧ киськалӧны пороз да кӧза вирӧн, сотӧм куканнезісь пӧимӧн, медбы сӧстӧмтны вывтырсӧ.

¹⁴ Сэк мымдаись буржыка сӧстӧмтӧ Кристосыслӧн Вирыс! Сія Ачыс Асьсӧ Вежа Лолыс вынӧн вайис Еныслӧ сӧстӧм бур козинӧн. Сылӧн вирыс сӧстӧмтас миянлісь сьӧлӧммезнымӧс кулӧмас вайӧтан умӧль керӧммезісь, медбы кысъявны ловья да былись Енлӧ.

¹⁵ Сійӧн Исусыс лоис Ен да отир коласын Виль Йитӧтсӧ Керисьӧн. Еныслісь бӧрйӧммесӧ Сія Аслас кулӧмӧн мездӧтіс умӧль керӧммезсиныс. Нія керисӧ умӧльсӧ важ йитӧтыс дырни. Сійӧн бӧрйӧммес босьтӧны кӧсйӧмсӧ пыр кежӧ.

^16-17 Мортыс гижӧ, кинлӧ мый дӧнзяс сы кулӧм бӧрын. Кытчӧдз мортыс ловья, гижӧтыс куйлӧ. Сія гижӧм сьӧрті позьӧ керны дзир мортыс кулӧм бӧрын.

¹⁸ Сійӧн Ен да отир коласын одзза йитӧтсӧ керӧм коста коліс кисьтны вир.

¹⁹ Моисейыс лыддьӧтіс отирыслӧ Туйдӧтсис быдӧс тшӧктӧммесӧ. Сэсся босьтіс пороззэзлісь да кӧзаэзлісь вирсӧ ва сорӧн, иссоп турун да гӧрд вурун. Ва сора вирас кӧтӧтіс иссопсӧ гӧрд вуруннас да резіс Туйдӧт небӧгсӧ и быдӧс отирсӧ.

²⁰ Сія висьталіс: «Эта ─ йитӧтлӧн вир. Еныс тшӧктіс овны сія йитӧт сьӧрті».

²¹ Сэсся Моисейыс резіс вирнас скиниясӧ да Енлӧ кысъялан быд дозсӧ.

²² Туйдӧтыс тшӧктӧ, медбы быдӧс сӧстӧмтісӧ вирӧн. Вир кисьттӧг оз овлы умӧль керӧммесӧ проститӧмыс.

²³ Этадз сӧстӧмтлісӧ енӧжисьыс сьӧрті му вылас лӧсьӧтӧмсӧ. А енӧжисьыслӧ колӧ буржык езъялан козин.

²⁴ Кристосыс эз пыр му вылісь вежаинӧ, кӧда керӧм морт киӧн енӧжисьыс сьӧрті. Сія пырис енӧжас. Ачыс сувтіс Еныс одзӧ дорйыны миянӧс.

²⁵ Сія эз пыр енӧжас, медбы унаись Асьсӧ сетны езъялан козин туйӧ. Му вылісь аркирейыс эд сідз керӧ: быд воӧ ӧтпырись пыравлӧ Вежася-вежаинас пода вирӧн.

²⁶ Кристосыс кӧбы сідз керис, сэк Сылӧ оланыс пондӧтчӧмсянь коліс бы унаись кувлыны. Но Сія бӧрья кадӧ локтіс дзир ӧтпырись. Асьсӧ сетіс езъялан козинӧн, медбы отирсӧ умӧль керӧммезсиныс мездыны пыр кежӧ.

²⁷ Мортыс ӧтпыр кулӧ, сэсся сюрӧ суд вылӧ.

²⁸ Сідз коліс керны и Кристосыслӧ: ӧтпыр сетны Асьсӧ езъялан козинӧн да уна отирлісь умӧль керӧммесӧ босьтны Ас вылас. Мӧдпырись Сія оз лок сӧстӧмтны отирсӧ умӧль керӧммезісь. Сія локтас мездыны Сійӧ видзчисиссесӧ.