Еврейезлӧ 8 - Бур Юӧр 2019

¹ Баитӧманым медколанаыс то мый: миян эм сэтшӧм Аркирей, Кӧда енӧжас пуксис Вына Енлӧн юралан пукӧс дынӧ веськытланяс.

² Сія керӧ вежа уджсӧ енӧжас былись вежаинас ─ Енлӧн скинияын. Сійӧ эз лэбты морт, лэбтіс Дӧсвидзисьыс.

³ Быд аркирейсӧ сувтӧтӧны вайны козиннэз да езъяланнэз Еныслӧ. Сідз и миян Аркирейлӧ коліс вайны Еныслӧ езъялан козинсӧ.

⁴ Сія кольччис кӧбы му вылас, сэк эз бы вӧв аркирейнас. Эстӧн эд эмӧсь ни сэтшӧм вежауджаліссес, кӧдна Туйдӧтыс сьӧрті вайлӧны езъялан козиннэсӧ.

⁵ Нія кысъялӧны енӧжись кодьӧмлӧ, но сія енӧжисьыслӧн дзир вуджӧрыс. Моисейыслӧ скиниясӧ лэбтӧм одзын тай вӧлі висьталӧм: «Видзӧт, быдӧс кер сэтшӧмӧ, кытшӧм тэныт вӧлі мыччалӧм керӧс вылас».

⁶ Исуслӧн вежа кысъялӧмыс унаӧн буржык мӧдік аркирейезлӧн кысъялӧмся. Сія йитӧтыс, кӧда керӧм Исусыс пыр, унаӧн буржык. Сія йитӧтыс эд керӧм бурся-бур кӧсйӧммез вылын.

Виль йитӧт

⁷ Бур кӧ вӧлі одзза йитӧтыс, мыйлӧ бы сэк коліс керны мӧдік йитӧтсӧ?

⁸ Еныслӧ вӧлі мый понда ӧмавны отирсӧ. Сійӧн Дӧсвидзисьыс шуӧ: ─ Сибалӧны луннэз, кӧр Ме Израиль да Иуда отиркӧт кера виль йитӧт.

⁹ Сія оз ло одзза йитӧт кодь. Одзза йитӧтсӧ Ме керлі айезныскӧт. Сэк Ме нійӧ куті кипӧлӧттяныс петкӧтны Египет муись. Нія тай эзӧ олӧ Менам йитӧт сьӧрті. Сійӧн Ме бергӧтчи ны дынісь, шуӧ Дӧсвидзисьыс.

¹⁰ Нія луннэз бӧрын Ме кера Израильыскӧт мӧдік йитӧт. Йитӧтыс лоас сэтшӧм: Ассим туйдӧттэзӧс пукта юраныс, гижа сьӧлӧм выланыс. Ме лоа нылӧ Енӧн, нія лоасӧ Менам отирӧн, шуӧ Дӧсвидзисьыс.

¹¹ Сэк некин оз понды велӧтны ассис матісьсӧ да ассис вонсӧ: «тӧдмав Дӧсвидзисьсӧ». Сэк Менӧ пондасӧ тӧдны быдӧнныс учӧтсянь ыджытӧдз.

¹² Ме нійӧ простита. Нылісь ылалӧмнысӧ, умӧль да лёк керӧмнысӧ ог понды касьтывлыны.

¹³ Этӧ йитӧтсӧ Еныс шуис Виль Йитӧтӧн. Сідз висьталӧмыс мыччалӧ одззаыслісь важмӧмсӧ. А важмӧмыс да бырӧмыс чожа мыйись ӧшӧ.