Еврейезлӧ 7 - Бур Юӧр 2019

¹ Мелкиседекыс вӧлӧм Салим карын ӧксу да Медвылісь Енлӧн аркирей. Авраамыс тышкасьӧм ӧксуэскӧт да нійӧ вермӧм. Гортас бертӧм коста сійӧ панталӧм Мелкиседекыс да бласлӧвитӧм.

² Авраамыс сылӧ янсӧтӧм дасӧт торсӧ быдӧсісь, мый шедӧм тышкасьӧмыс коста. Нимыс сьӧрті видзӧтны кӧ Мелкиседексӧ, сія лоӧ «веськыта оланлӧн ӧксу». Сія Салим карын ӧксу. Сія лоӧ «лӧнь оланлӧн» ӧксу.

³ Мелкиседеклӧн абу ай-мамыс, абу увтырыс. Сылӧн абу чужан луныс, абу кулан луныс. Енлӧн Зон моз сія пыр кежӧ кольччис вежауджалісьӧн.

⁴ Адззат, кытшӧм вылына пуктӧмась Мелкиседексӧ. Сылӧ Авраам айным сетӧм дасӧт торсӧ, тышкасьӧм коста шедӧмись медбурсӧ.

⁵ Вежауджаліссесӧ бӧрйывлісӧ дзир Левий увтырись. Туйдӧтын тшӧктӧм сьӧрті нылӧ коліс босьтны отирлӧн пажытись дасӧт торсӧ. Босьтны коліс асланыс воннэзлісь, кӧдна ны моз вӧлісӧ Авраам увтырись.

⁶ Мелкиседекыс эз вӧв Левий увтырись, но босьтӧм Авраамлӧ шедӧмись дасӧт торсӧ. Мелкиседекыс бласлӧвитӧм Авраамсӧ, кӧдалӧн вӧлӧм ни Еныслӧн кӧсйӧмыс.

⁷ Эта йылісь висьтавны нем: учӧтжыксӧ пыр бласлӧвитӧ ыджытжыкыс.

⁸ Дасӧт торсӧ босьтӧны вежауджаліссез, кӧдна озӧ пыр олӧ. Но Мелкиседекыс йылісь Вежа Гижӧтас висьталӧм, сія пӧ олӧ.

⁹ Позьӧ висьтавны, Левийыс, дасӧт торсӧ босьтісьыс, ачыс тай Авраамыс киӧн сетӧм дасӧт торсӧ.

¹⁰ Мелкиседеккӧт Авраамлӧн пантасьӧм коста Левийыс эд вӧлӧм эшӧ Авраам айыс пытшкын, абу на вӧлі чужӧм да.

¹¹ Отирлӧ сетӧм Туйдӧтас вӧлі гижӧм Левий увтырись вежауджаліссеслӧн удж йылісь. Туйис кӧбы ны керӧм удж пыр вайӧтны мортсӧ быдсӧн бурӧдз, мыйлӧ бы сэк коліс сувтны Мелкиседек кодь мӧдік аркирейлӧ, а эз Аарон кодьлӧ?

¹² Вежауджаліссезлӧн уджныс вежсьӧ кӧ, сэк вежсьӧ и Туйдӧтыс.

¹³ Кӧда йылісь эстӧн баитам, вӧлі мӧдік увтырись. Сія увтырись некин эз уджав езъяланін дынас.

¹⁴ Мийӧ тӧдам, миян Дӧсвидзисьным Иуда увтырись. Эта увтырись петӧм вежауджаліссез йылісь Моисейыс нем абу висьтавлӧм.

Исус ─ пырся Аркирей

¹⁵ Сысянь буржыка адззам: сувтіс мӧдік Вежауджалісь, Сія Мелкиседекыс кодь.

¹⁶ Сія Аркирейнас эз ло Туйдӧтыс сьӧрті, морт увтырись. Аркирейӧн Сія лоис пырся олан вынӧн.

¹⁷ Висьталӧм тай: ─ Мелкиседек моз Тэ пыр кежӧ Аркирей.

¹⁸ Одзза сетӧм тшӧктӧмыс вӧлі пӧдналӧм, сія эд вӧлі вынтӧм да бурсӧ нем эз вай.

¹⁹ Туйдӧтыс нем эз вайӧт быдсӧн бурӧдз. Сы туйӧ миянлӧ сетӧм надея буржыкыс вылӧ. Сія надеяным миянлӧ отсалӧ сибӧтчыны Еныс дынӧ.

²⁰ Этӧ бурсӧ видзчисьӧмнымӧс Еныс вынсьӧтіс кыв сетӧм пыр.

²¹ Отир коласісь сувтӧтӧм аркирейес эзӧ сувтлӧ кыв сетӧм пыр, а Исусыс сувтіс кыв сетӧм пыр. Сы йылісь сідз висьталӧм: ─ Дӧсвидзисьыс кыв сетіс и сійӧ оз веж: Тэ Мелкиседек моз Аркирей пыр кежӧ.

²² Сія кыв сетӧмыс висьталӧ, мымдаӧн буржык Еныскӧт эта йитӧтыс, кӧда керӧм Исус пыр.

²³ Аркирейес вӧлісӧ уна. Ӧтікыс эз вермы лоны, нія кувлісӧ да.

²⁴ А Исусыс пыр олӧ. Сія и Аркирейыс пыр кежӧ.

²⁵ Сійӧн Сія вермӧ мездыны Еныс дынӧ Сы пыр быд локтісьсӧ. Сія эд пыр олӧ, медбы Еныс одзын кеймисьны ны понда.

²⁶ Миянлӧ сэтшӧм Аркирей и колӧ: вежа, умӧльсӧ эз кер, сӧстӧм, янсӧтӧм умӧльсӧ кериссез дынісь, лэбтӧм енӧжжезся вылынжыка.

²⁷ Мӧд аркирейес моз Исусыслӧ оз ков быд лун вайны езъялан козиннэсӧ: медодз аслас, сэсся отирлӧн умӧль керӧммез понда. Сія этӧ керис ӧтпырись. Исусыс эд Ачыс Асьсӧ сетіс езъялан козиннас. Сія козинлӧн выныс пырся.

²⁸ Туйдӧтыс аркирейезнас сувтӧтӧ отирӧс, кӧдна етша мый вермӧны. Аслас сетӧм кыв сьӧрті Туйдӧтыс бӧрсянь Еныс сувтӧтіс Зонсӧ. Сія быдсӧн бур Аркирейыс пыр кежӧ.