Еврейезлӧ 4 - Бур Юӧр 2019

¹ Еныс кӧсйӧм сьӧрті Сы шоччисянінӧ пырны кытчӧдз позьӧ. Сідзкӧ, пондам повны, медбы некин тіян коласісь эз сёрмы пырны Сылӧн шоччисянінӧ.

² Миянлӧ вайисӧ Бур Юӧрсӧ айезнымлӧ моз. Кылӧмыссянь нылӧ эз вӧв бурыс. Кылыс эз йидж сьӧлӧманыс, кыліссес эд эзӧ веритӧ юӧртӧмыслӧ.

³ Лӧняс пырамӧ мийӧ, веритіссес. А ны йылісь, кӧдна эзӧ веритӧ, Еныс Ачыс висьталӧм сідз: ─ Ме лӧгувьям висьталі: «Нія озӧ пырӧ шоччисянінас, кӧдӧ Ме лӧсьӧті». Еныс висьталӧм сідз, кӧть быдӧс аркмӧтӧм бӧрын Сылӧн шоччисяніныс вӧлі лӧсьӧтӧм ни.

⁴ Мӧдіклаын сизимӧт луныс йылісь гижӧм сідз: «Сизимӧт лунас Еныс шоччисис быд уджись».

⁵ Одзас эд вӧлі висьталӧм ни: «Нія озӧ пырӧ шоччисянінас, кӧдӧ Ме лӧсьӧті».

⁶ Мукӧдыс Енлӧн лӧсьӧтӧм шоччисянінӧ эшӧ пырасӧ. А кӧдналӧ вӧлі одзжык юӧртӧм, нія эзӧ кывзісьӧ да эзӧ пырӧ сэтчӧ.

⁷ Сійӧн Еныс сетіс лун. Сійӧ лунсӧ шуис «Талун». Сэксянь чулаліс уна кад. Одзжык баитӧмсӧ Сія казьмӧтӧ Давидыс пыр: «Талун, Еныслісь шысӧ кылӧм коста, эд чорзьӧтӧ сьӧлӧммезнытӧ».

⁸ Навин Исусыс кӧбы вермис сетны шоччӧтсӧ Египетісь петӧммезлӧ, Еныс эз бы висьтав мӧдік лун йылісь.

⁹ Сійӧн Енлӧн отирыс пырасӧ шоччисянінас бӧрынжык.

¹⁰ Еныс шоччисьӧ Аслас уджись. Кин пырис Сы шоччисянінӧ, шоччисьӧ Еныс моз.

¹¹ Вынсьӧтчам пырны Сы шоччисянінӧ. Кывзісьтӧм отир моз ась некин оз кольччы шоччисянінас пыртӧг.

¹² Енлӧн Кылыс ловья, сія керӧ Ассис вына уджсӧ. Еныслӧн Кылыс лэчытжык кыкнан дорсӧ кеслӧм шыпуртся. Сія йиджӧ пытшкӧдззас, олӧмсӧ ловкӧт да лысӧ вемкӧт торйӧтӧ. Сія осьтӧ юрын видзӧмсӧ да сьӧлӧм вылӧ пуктӧмсӧ.

¹³ Еныс шогья некин оз вермы сайӧвтчыны. Сы синнэз одзын быдӧс осьта. Сія быдӧс адззӧ. Сы одзын миянлӧ ковсяс быдӧс понда кыв видзны.

Исус ─ ыджыт Аркирей

¹⁴ Миян эм ыджыт Аркирей ─ Исус, Енлӧн Зон. Сія лэбтісис енӧжся вылынжыка. Сідзкӧ, бура пондам видзсьыны Сылӧ веритӧманым.

¹⁵ Миян сэтшӧм Аркирей, Кӧда вежӧртӧ миянӧс, кӧр мийӧ вынтӧмӧсь. Сы вылӧ, кыдз и миян вылӧ, усис быдӧс сьӧкытыс-ылӧтлӧмыс, но Сія умӧльсӧ эз кер.

¹⁶ Сійӧн повтӧг сибӧтчам бурсӧ сетісь Енлӧн юралан пукӧс дынӧ, медбы аскадӧ босьтны отсӧтсӧ, небыт сьӧлӧмсянь бурсетӧмсӧ.