Еврейезлӧ 3 - Бур Юӧр 2019

¹ Воннэзӧ, тійӧ ─ вежа отир, енӧжись Енӧн корӧммез. Видзӧтӧ Енлӧн Ыстӧм вылӧ, миян Аркирей Кристос Исус вылӧ, Кӧдалӧ мийӧ веритам.

² Сія быдӧсын кывзісис Сійӧ Аркирейнас Сувтӧтісьсӧ, кыдз и Моисейыс «Ен керкуын быдӧс керис Сы сьӧрті».

³ Исуссӧ колӧ ошкыны Моисейӧсся ӧддьӧнжык. Керку лэбтісьсӧ эд керкуыс сьӧрті ӧддьӧнжык ошкӧны.

⁴ Быд керкулӧн эм керку керись, а Еныс ─ быдӧс Керисьыс.

⁵ Моисейыс «Енлӧн керкуас быдӧсын вӧлі надейнӧй кысъялісьӧн». Сылӧн кысъялӧмыс мыччаліс сійӧ, мый Еныс мӧдіс висьтавны одзланься кадӧ.

⁶ А Кристосыс ─ Зон. Сія веськӧтлӧ Енлӧн керкунас. Сылӧн керкуыс ─ мийӧ, медбӧрӧдз вермам кӧ овны повтӧг да надейтчӧмнаным, кӧдӧн ӧні ошшасям.

Енсӧ кывзыны тшӧктӧм

⁷ Сійӧн, Вежа Лолыс сідз баитӧ: ─ Талун, Сылісь шысӧ кывтӧн,

⁸ эд чорзьӧтӧ сьӧлӧммезнытӧ, кыдз вӧлі кушмуӧт мунікӧ, Ме вылӧ лэбтісьӧм коста Менӧ лӧгӧтлікӧ.

⁹ Тіян айезныт нёльдас во сьӧрна адззылісӧ Менчим уджӧс. Асьныс тай лӧгӧтлісӧ, ылӧтлісӧ Менӧ.

¹⁰ Сійӧн Ме лӧгаси эта увтыр вылӧ, висьталі: «Нія пыр мӧдӧрӧ ылалӧны. Нія озӧ тӧдӧ Менчим туйезӧс».

¹¹ Сійӧн Ме лӧгувьям кыв сетӧмӧн висьталі: «Нія озӧ пырӧ шоччисянінас, кӧдӧ Ме лӧсьӧті».

¹² Воннэзӧ, видзӧтӧ, медбы тіян коласісь некин эз вӧв вериттӧм мортӧн да эз вӧв сьӧлӧм выланыт лӧгыс. Тіян коласісь ась некин оз янсав ловья Еныс дынісь.

¹³ Вынсьӧтӧ ӧтамӧднытӧ быд лун, кытчӧдз кадсӧ позьӧ шуны «талун». Ась некин тіян коласісь оз бӧбась умӧльсӧ керны да сысянь оз чорзьӧт сьӧлӧмсӧ.

¹⁴ Кристослӧ лӧсьӧтӧм пайыс дӧнзяс и миянлӧ, пондам кӧ бура веритны медбӧрӧдз, кыдз и пондім.

¹⁵ Эта йылісь висьталӧм: ─ Талун, кӧр кылат Сылісь шысӧ, эд чорзьӧтӧ сьӧлӧммезнытӧ, кыдз вӧлі Ме вылӧ лэбтісьӧм коста.

¹⁶ Енлісь шысӧ кыліссез коласісь мукӧдыс лэбтісьӧмась паныт, но абу быдӧнныс, кӧдна петісӧ Моисейыскӧт Египетсис.

¹⁷ Кин вылӧ Сылӧн петӧм лӧгыс нёльдас во сьӧрна? Эз я умӧльсӧ кериссес вылӧ, кӧдналӧн лыэс кольччӧмась кушмуас?

¹⁸ Кин йылісь кыв сетӧмӧн висьталӧм: озӧ пӧ пырӧ Сы шоччисянінӧ? Сідз висьталіс кывзісьтӧммес йылісь.

¹⁹ Мийӧ адззам, нія эзӧ вермӧ пырны Енлӧн шоччисянінӧ, эзӧ веритӧ да.