Еврейезлӧ 13 - Бур Юӧр 2019

¹ Воннэзӧ, ӧтамӧднытӧ пыр радейтӧ.

² Эд вунӧтлӧ рочавны мунісь-локтіссесӧ. Мукӧдыс тӧдтӧг сідз рочавлӧмась гортаныс ангеллэзӧс.

³ Эд вунӧтлӧ отсавны пукаліссеслӧ, жыв и тійӧ ныкӧт ӧтлаын пукалат. Отсалӧ и нылӧ, кӧдналӧ лёк кериссезсянь умӧльыс усьӧ. Тійӧ эд кытчӧдз и асьныт му вылас олат.

⁴ Гозъя коласын ась быдӧс керсьӧ бӧбӧттӧг. Ас коласын овтӧн ась быдӧс лоӧ сӧстӧм. Гозйӧн овтӧн ӧтамӧд сайсянь ветлӧтіссесӧ да кыскасиссесӧ быдӧннысӧ эд Еныс пондас судитны.

⁵ Эд пуктӧ ловнытӧ сьӧм радейтӧмӧ. Тырмӧтчӧ сійӧн, мый эм. Ачыс Еныс эд висьталіс: ─ Ог коль тэнӧ, ог чапкы.

⁶ Сійӧн мийӧ повтӧг висьталам: ─ Мыйись меным повны, мый меным мортыс керас, менам отсасисьыс кӧ Дӧсвидзись?

⁷ Видзӧ тӧдвыланыт ассиныт велӧтіссезнытӧ, кӧдна висьтасисӧ тіянлӧ Енлісь Кывсӧ. Видзӧтӧ, кыдз нія олісӧ, да ны моз веритӧ.

⁸ Кристос Исусыс некӧр оз вежсьы, Сія тӧн, талун да и пыр Сія жӧ.

⁹ Йӧзыслӧн уна быдкодь велӧтӧммес, эдӧ лэдзӧ нійӧн асьнытӧ ылӧтны. Сёян-юан йылісь велӧтӧмсӧ оз ков сьӧлӧмӧ босьтны. Эз вӧв бурыс нылӧ, кӧдна сы сьӧрті олісӧ. Буржык вынсьӧтны сьӧлӧммезнымӧс Енлӧн бурсетӧмӧн.

¹⁰ Миян эм езъяланін. Скинияас уджаліссеслӧ сы вылісь оз туй сёйны.

¹¹ Аркирейыс отирлісь умӧль керӧммесӧ лэдзӧм понда Вежася-вежаинас пыртӧ подалісь вир. А начкылӧм подасӧ сотӧны кар саяс.

¹² Сійӧн и Исусыс куліс карас пыран ыбӧссэз сайын, медбы отирсӧ Аслас вирӧн керны вежаэзӧн.

¹³ Сідзкӧ, петам Исусыс дынӧ кар саяс, медбы и миянлӧ Сы моз новйӧтны сералӧм-умӧльтӧмсӧ.

¹⁴ Миян эстӧн эд абу пырся карыс. Мийӧ видзчисям одзланься виль карсӧ.

¹⁵ Сідзкӧ, Исусыс пыр пондам дугдывтӧг лэбтыны-ошкыны Енлісь нимсӧ. Миян ӧмись петӧм ошкӧмыс Еныслӧ езъялан козин.

¹⁶ Эд вунӧтлӧ керны бурсӧ. Мыйӧн вермат, отсасьӧ. Сэтшӧм езъялан козиныс Еныс сьӧрті.

¹⁷ Кывзісьӧ тіян вылын сувтӧтӧммесӧ. Керӧ висьталӧмныс сьӧрті. Нія дугдывтӧг эд тӧждісьӧны тіян понда. Нылӧ быдӧнныт понда ковсяс Еныс одзын кыв видзны. Тіянкӧт нія ась уджалӧны кокнит сьӧлӧмӧн. Пондасӧ кӧ нія сьӧкыта ышлолавны, тіянлӧ сэтісь оз ло бурыс.

¹⁸ Кеймӧ миян понда. Мийӧ тӧдамӧ, миян сьӧлӧммезным сӧстӧмӧсь, мийӧ эд быдӧс вынсьӧтчам керны веськыта.

¹⁹ Кора тіянӧс, ӧддьӧнжык кеймӧ, медбы ме чожажык верми бертны тіян дынӧ.

²⁰ Лӧньсӧ сетісь Еныс ловзьӧтіс кулӧмись миянлісь Дӧсвидзись Кристос Исуссӧ, вына баля Видзӧтісьсӧ. Сы вирӧн миянлӧ керис пырся Йитӧт.

²¹ Еныс ась вынсьӧтӧ тіянӧс керны быдпӧлӧс бурсӧ, медбы быдӧс вӧлі Сы сьӧрті. Кристос Исусыс пыр ась керас миянӧс сэтшӧммезӧн, кытшӧмӧсь мийӧ Сылӧ колам. Сылӧ пырся-пыр ошкӧм! Аминь.

²² Воннэзӧ, кора тіянӧс: видзсьӧ этна велӧтана кыввез бердӧ. Ме эд унасӧ эг гиж.

²³ Тӧдӧ: миянлісь Тимофей воннымӧс лэдзисӧ. Сія чожа кӧ локтас татчӧ, сэк ме ӧтлаын сыкӧт локта тіян дынӧ.

²⁴ Миянсянь юӧр сетӧ велӧтіссезнытлӧ да быдӧс вежа отирлӧ. Тіянлӧ юӧр ыстӧны Италиясис Кристос отирыс.

²⁵ Еныслӧн бурсетӧмыс ась лоас тіянкӧт быдӧнныткӧт! Аминь.