Еврейезлӧ 11 - Бур Юӧр 2019

¹ Веритӧмыс ─ видзчисьӧм сьӧрті олӧм, тыдавтӧмсӧ тӧдӧмӧн видзчисьӧм.

² Веритӧмныс понда миян айезным вӧлӧмась Еныслӧ сьӧлӧмви.

³ Веритӧмнаным мийӧ пондім тӧдны: муэз да енӧжжез быдӧс аркмӧтӧмӧсь Ен Кылӧн. Сідз тыдавтӧмсис аркмис тыдаланаыс.

⁴ Веритӧмӧн Авельыс вайӧм Еныслӧ езъялан козинсӧ Каинысся буржыкӧ. Веритӧмыс понда Еныс пуктіс сійӧ веськыта олісьӧ да босьтіс сылісь козинсӧ. Веритӧмнас сія и кулӧм бӧрас ӧнӧдз баитӧ.

⁵ Веритӧмыс понда Енокыс вӧлі босьтӧм енӧжас кувтӧдззас: «Сія эз ло, Еныс эд сійӧ босьтіс». Енӧжас босьтӧмӧдз тай сылӧ вӧлі висьталӧм: «Сія мортыс Енлӧ сьӧлӧмви».

⁶ Вериттӧг Ен сьӧрті он вермы керны. Еныс дынӧ локтісьлӧ колӧ веритны: Еныс эм, и Сійӧ кошшись мортлӧ Сія сетас козинсӧ.

⁷ Веритӧмыс пыр Нойлӧ вӧлі сетӧм тӧдны тыдавтӧмсӧ, одзланьсясӧ. Енсӧ кывзісьӧмӧн сія керӧм ыджыт пыж, медбы мездыны васис ассис гортіссесӧ. Веритӧмӧн керӧмнас сія судитӧм му вывсис быдӧс оліссесӧ. Ачыс веритӧмыс понда вӧлі сувтӧтӧм веськыта олісьӧн.

⁸ Веритӧмӧн Авраам кывзісьӧм Енсӧ да мунӧм сія муӧ, кӧдӧ Еныс сылӧ вӧлі кӧсйӧм. Сія абу тӧдӧм, кытчӧ мунӧ, но мунӧм.

⁹ Веритӧмӧн сія олӧм кӧсйӧм муас палаткаэзын, кыдз йӧз муын. Сёрӧнжык Исакыс да Яковыс олӧмась сы моз. Авраамыс пыр и нылӧ эд вӧлі кӧсйӧм сія муыс.

¹⁰ Авраамыс видзчисьӧм сэтшӧм кар, кӧдалӧн пуктӧм увтыс ён. Сэтӧн Лэбтісь-Лӧсьӧтісьыс ─ Еныс.

¹¹ Сарраыс абу вермӧм ваясьны, но веритӧмнас сія Енсянь босьтӧм вын сьӧктыны. Сія пӧрисьувья ни вайӧм кага. Сэтшӧм кадӧ эд озӧ ни ваясьӧ. Сія эд тӧдӧм: Кӧсйисисьыс ─ надейнӧй.

¹² Сійӧн Авраамыссянь ─ ӧтік шоймӧм кодь мортсянь ─ чужис сымда отир, мымда енӧжын кӧдзуввез да саридз дорын песӧк.

¹³ Нія быдӧнныс кулӧмась веритіссезӧн. Овтӧнняныс нылӧ кӧсйӧмыс эз вӧв сетӧм. Нія видзчисьӧмась одзланьсясӧ, ылісянь адззӧмась сійӧ да гажӧтчӧмась. Ас йывсиныс баитӧмась, му вылас пӧ мийӧ дзир локтіссез да муніссез.

¹⁴ Баитіссеслӧн сэтшӧма висьталӧмныс мыччалӧ: нія кошшӧны гортнысӧ.

¹⁵ Нія эзӧ видзӧ юраныс сійӧ мусӧ, кытісь петісӧ. Сэтчӧ нія вермисӧ бы и бертны.

¹⁶ Нія туйнысӧ видзӧмась буржыкысланьӧ, енӧжӧ. Сійӧн Еныслӧ абу рожа кулян Асьсӧ пуктыны нылӧн Енӧ. Сія лӧсьӧтіс нылӧ кар.

¹⁷ Авраамыслӧн веритӧмыс вӧлі тӧдмалӧм-видзӧтӧм. Веритӧмӧн сія пуктӧм езъяланін вылас ассис ӧтка чужтӧм зонсӧ. Сія эд веритӧм кӧсйӧмыслӧ.

¹⁸ Эта зон йылісь эд вӧлі висьталӧм: «Исакыссянь чужӧммесӧ пондасӧ шуны тэнат челдяьӧн».

¹⁹ Авраамыс видзӧм юрас: Еныс вермас ловзьӧтны и кулӧмсӧ. Сія бӧр сідз и босьтӧм Исаксӧ, жыв сія кувлӧм и ловзьӧм.

²⁰ Исакыс одзланьсяас веритӧмӧн бласлӧвитӧм Яковсӧ Исавыскӧт.

²¹ Яковыс кулікас веритӧмӧн бласлӧвитӧм Ӧсиплісь быд зонсӧ да бедьыс бердӧ видзсьӧмӧн копыртчӧм Еныслӧ.

²² Веритӧмӧн Ӧсипыс кулӧм одзас казьмӧтлӧм Израиль отирлӧн Египетсис петӧм йылісь да тшӧктӧм ассис лыэсӧ петкӧтны.

²³ Моисейсӧ чужӧм бӧрсяняс ай-мамыс веритӧмныс кузя дзебӧмӧн видзӧмась куим тӧлісь. Нія эд адззӧмась: кагаыс ӧддьӧн басӧк. Абу повзьӧмась и фараонлӧн висьталӧмись.

²⁴ Моисейыс быдмӧм. Веритӧмыссянь асьсӧ дугдӧм пуктыны фараон нывлӧн зонӧ.

²⁵ Сія юрас пыртӧм: гажӧтчӧмӧн да умӧль керӧмӧн недыр олӧмся буржык пессьыны-мырсьыны ӧтлаын Енлӧн отиркӧт.

²⁶ Кристос понда видӧмсӧ сія лыддьӧм донажыкӧн Египетсис быд дона торся. Сія видзӧтӧм одзланьсяыс вылӧ, мый сылӧ лоас сетӧм.

²⁷ Веритӧмӧн Моисейыс петӧм Египетсис. Нельки абу повзьӧм ӧксуыс лӧгасьӧмись. Сія видзсьӧм чорыта, жыв адззӧм одзсис Тыдавтӧмсӧ.

²⁸ Веритӧмӧн сія тшӧктӧм чулӧтны Ыджыт лунсӧ да резны вирнас ыбӧс косяккесӧ, медбы кулӧтісь ангел эз вӧрӧт нылісь медодзза шогмӧммесӧ.

²⁹ Веритӧмӧн Израиль отир мунӧмась Гӧрд саридзӧттяс му вылӧт моз. Ны вылӧ видзӧттӧн египетсаыс мӧдӧмась вуджны саридзсӧ да вӧйӧмась.

³⁰ Веритӧмӧн Израиль отирыс сизим лун сьӧрна гӧгралӧмась Ерикон карсӧ. Сизимӧт лунас кар гӧгӧрсис ёнся-ён из йӧрныс пӧрӧм.

³¹ Кыскасись инька Раав веритӧмыс кузя абу кулӧм мӧдік вериттӧммезкӧт. Сія эд бура панталӧм Израиль отирись Ханаан му видзӧтліссесӧ да мӧдіклаӧт кольлалӧм нійӧ.

³² Мый висьтавны? Абу менам кадыс висьтасьны Гедеон, Варак, Самсон, Иеффай, Давид, Самуил да Енсянь юӧртіссез йылісь.

³³ Тышкасьӧм коста нія веритӧмнаныс босьтлӧмась йӧз муэз, быдӧс керӧмась веськыта, босьтлӧмась Енсянь кӧсйӧмсӧ, тупкавлӧмась леввезлісь ӧммезнысӧ,

³⁴ кусӧтлӧмась вына биэз, пышшывлӧмась лэчыт шыпуртісь, вынтӧммес вынсявлӧмась. Нія ёна видзсьӧмась мӧдік йӧзкӧт тышкасьӧм коста да вашӧтлӧмась йӧз отирсӧ.

³⁵ Мукӧд инькаэзлӧн кулӧммезныс ловзьывлӧмась. Мукӧдсӧ быдмоза дойдӧмӧн кувтӧдз вайӧтлісӧ. Нійӧ кӧсйисисӧ лэдзны, но нія эзӧ босьтӧ отирсянь мезмӧмсӧ, а лӧсьӧтчисӧ ловзьыны буржык оланӧ.

³⁶ Мукӧдыс вылын быд моз сералісӧ, вартлісӧ, дорлісӧ цеп вылӧ, пуксьӧтлісӧ.

³⁷ Нійӧ шупкавлісӧ иззэзӧн кувтӧдз. Мукӧдсӧ быднёж зубытся-зубытӧдз вайӧтлісӧ, пилитлісӧ шӧри, мукӧдыс кувлісӧ шыпуртсянь. Баля да кӧза кучиккез вӧлісӧ нылӧ паськӧм туйӧ. Нылӧн эз вӧв нельки медколанаыс. Нійӧ вашӧтлісӧ, отирлӧн лӧгувьяныс лёк керӧмыс быдӧс усьліс ны вылӧ.

³⁸ Нія, кӧдналісь и чуньпоннысӧ оз сулав быдӧс му вылісьыс, олісӧ кушмуэзын, керӧссэзын, керӧс гырккезын, кырассэзын.

³⁹ Веритӧмныс понда нія быдӧнныс вӧлісӧ Енлӧ сьӧлӧмви, но овтӧнняныс нія эзӧ босьтӧ кӧсйӧмсӧ.

⁴⁰ Керсис этадз сійӧн, медбы нылӧ локны быдсӧн бурас миянкӧт. Еныс эд лӧсьӧтӧм миянлӧ мыйкӧ буржыкӧ.