Еврейезлӧ 1 - Бур Юӧр 2019

Еныс баитӧ миянлӧ Зоныс пыр

¹ Унаись да быднёж миян айезлӧ важынсянь ни Еныс баитлӧм Аслас юӧртіссез пыр.

² Эна медбӧрья луннэзӧ Еныс баитіс миянлӧ Зоныс пыр. Сы пыр Еныс аркмӧтіс и быдӧс енӧжисьсӧ да му вылісьсӧ, быдӧс сетіс Зоныс кипод увтӧ.

³ Зоныс ─ Айыслӧн ошкӧм-югьялӧмыс. Сія быдӧсын Айыс кодь, быдӧс видзӧ Аслас вына кылӧн. Сія сӧстӧмтіс миянӧс умӧль керӧммезсиным да пуксис енӧжас вына Еныскӧт ордчӧн веськыт ладорас.

Ен Зон да ангеллэз йылісь.

⁴ Зоныс ангеллэзся вылынжыка сувтӧтӧм. Сылӧн и нимыс ны ниммезся вылынжыка пуктӧм.

⁵ Кӧр кытшӧм ангеллӧ Еныс висьталіс: ─ Тэ Менам Зон, Ме талун Тэнӧ чужті? Некытшӧм ангеллӧ Еныс эз висьтав: ─ Ме сылӧ лоа Айӧн. Сія Меным лоас Зонӧн.

⁶ Олан муас Медодз Чужӧмсӧ петкӧтікӧ Еныс висьталӧм: ─ Сылӧ ась копыртчӧны Енлӧн ангеллэс быдӧнныс.

⁷ Ангеллэс йылісь висьталӧм: ─ Тэ керан Ассит ангеллэтӧ тӧввезӧн, Ассит уджаліссетӧ ─ ӧгралан биӧн.

⁸ Зоныс йылісь висьталӧм: ─ Енӧ, Тэнат юралан пукӧсыт ─ пырся. Тэнат веськӧтлан бедьыт ─ веськыта юралӧм.

⁹ Тэ радейтан веськыта керӧмсӧ. Синӧн он вермы видзӧтны лёк керӧм вылӧ. Сійӧн Тэнат Еныт гаж елейнас мавтіс Тэнӧ, Енӧ, мӧдіккезся буржыка.

¹⁰ Шуӧ и сідз: ─ Дӧсвидзисьӧ, медодз Тэ аркмӧтін мусӧ, да и енӧжыс аркмӧтӧм Тэнат киӧн.

¹¹ Нія ӧшасӧ, а Тэ пыр лоан. Паськӧм моз быдӧс важмас, бырас.

¹² Мусӧ енӧжнас паськӧм моз каттьыштан. Нія вежсясӧ, а Тэ пыр ӧткодь. Тэнат оланыт некӧр оз ор.

¹³ Кӧр кытшӧм ангеллӧ Еныс висьталіс: ─ Пукав Мекӧт веськыт ладорам, кытчӧдз ог уськӧт кок увтат Тэ вылӧ лэбтісиссесӧ.

¹⁴ Ангеллэз быдӧнныс кысъялісь ловвез. Нійӧ Еныс ыстӧ отсавны отирлӧ, кӧдналӧ дӧнзяс мезмӧмыс.