Ефесын оліссезлӧ 5 - Бур Юӧр 2019

¹ Тійӧ Енлӧн дона челядь. Сідзкӧ, видзӧтӧ Сы вылӧ да керӧ Сы моз.

² Олӧ ӧтамӧднытӧ радейтӧмӧн, кыдз и Кристосыс радейтӧ миянӧс. Сія эд миян понда сетіс Асьсӧ Еныслӧ чӧскыт руа езъялан козин туйӧ.

³ Тійӧ ─ вежа отир. Сідзкӧ, кыскасьӧм да горшасьӧм, быдпӧлӧс сэрпӧсь керӧм тіян ась оз ло. Ны йылісь нельки эдӧ и баитӧ.

⁴ Ась оз пет тіян ӧмись умӧль кыв, абутӧмыс йылісь баитӧм, нёштӧм серӧмтӧм. Буржык эд, пондат кӧ ошкыны Енсӧ.

⁵ Тӧдӧ, некытшӧм кыскасисьлӧ, сэрпӧсьлӧ, горшасисьлӧ Енлӧн да Кристослӧн Юраланінісь нем оз дӧнзьы. Горшасьӧмыс эд ас керӧм енлӧ копрасьӧм.

⁶ Абутӧмыс йылісь баитӧмнаныс тіянӧс некин ась оз ылӧт. Ылӧтан баитӧм понда эд Еныслӧн лӧгыс локтас кывзісьтӧм отир вылӧ.

⁷ Сэтшӧммескӧт ӧтлаын нем эдӧ керӧ.

Югытлӧн челядь

⁸ Тійӧ одзжык вӧліт пемытӧн, а ӧні Дӧсвидзиськӧт ӧтлаасьӧмсянь тійӧ лоитӧ югытӧн. Ӧні олӧ сідз, кыдз колӧ овны югытлӧн челядьлӧ.

⁹ Лолыслӧн воӧмыс ─ быдпӧлӧс бурсӧ керӧм, Ен сьӧрті веськыта олӧм да быль.

¹⁰ Тӧдмалӧ-видзӧтӧ да вежӧртӧ, мый Еныс сьӧрті.

¹¹ Пемытас оліссез моз эд керӧ сійӧ, мыйись оз пет бурыс. Асьныт веськыта висьталӧ нылӧ умӧльсӧ керӧмныс йылісь.

¹² Мый нія керӧны гусьӧн, сы йылісь нельки баитны умӧль.

¹³ Но югытыс быдпӧлӧс гусьӧна керӧмсӧ осьтӧ.

¹⁴ Сійӧн и висьталӧм: ─ Узись, саймы, ловзьы кулӧммес коласісь, сэк тэнӧ Кристосыс югдӧтас!

¹⁵ Сідзкӧ, видзӧтӧ ас сьӧраныт. Быдӧс керӧ бур мывкыдӧн, эд керӧ мывкыдтӧммес моз.

¹⁶ Кадсӧ весь эд ӧштӧ, луннэс эд ылӧтанаӧсь.

¹⁷ Сідзкӧ, эд лоӧ абыззэзӧн, вежӧртӧ, мый колӧ Еныслӧ.

¹⁸ Эд кодалӧ. Сысянь отирыс лэдзчисьӧны. Тырӧ Вежа Лолӧн.

¹⁹ Ӧтамӧднытӧ вынсьӧтӧ псаломмэзӧн, Енсӧ ошкан сьыланкыввезӧн, ловсянь сьылӧммезӧн. Сьӧлӧмсянь ошкӧ-сьылӧтӧ Дӧсвидзисьсӧ.

²⁰ Миян Дӧсвидзись Кристос Исус нимӧн быдӧс понда пыр буркывтӧ Ен Айнымӧс.

Гозъя коласын олӧм

²¹ Енсис полӧмӧн кывзісьӧ ӧтамӧднытӧ.

²² Иннез, Дӧсвидзисьсӧ моз кывзісьӧ ассиныт жӧниккезнытӧ.

²³ Иньлӧн юрыс жӧникыс, кыдз вичкулӧн Юрыс Кристосыс. А вичкуыс Кристослӧн вывтырыс. Сія вывтырсӧ Мездӧтісь.

²⁴ Вичкуыс кывзісьӧ Кристоссӧ. Иннезлӧ сідз жӧ быдӧсын колӧ кывзісьны ассиныс жӧниккезнысӧ.

²⁵ Жӧниккез, радейтӧ ассиныт иннезнытӧ, кыдз Кристосыс радейтӧ вичкусӧ. Сія Ассис олансӧ сетіс сы понда,

²⁶ медбы сӧстӧмтны сійӧ. Вичкусӧ сӧстӧмтіс ваӧн да кылӧн.

²⁷ Кристосыс сідз керис, медбы Вичкусӧ вайӧтны одзас быд ладорсянь югьяланаӧн, медбы сы вылын эз вӧв ӧтік нятёк, кытшӧмкӧ чукыр али мыйкӧ мӧдік. Сія ась лоӧ вежаӧн, медбы нем умӧльыс эз вӧв сы сайын.

²⁸ Жӧниккезлӧ колӧ радейтны иннезнысӧ кыдз ассиныс вывтырсӧ. Ассис иньсӧ радейтісьыс асьсӧ радейтӧ.

²⁹ Некин эд некӧр оз висьтав аслас вывтырлӧ: синнэз эзӧ бы видзӧтӧ тэ вылӧ. Мортыс вывтырсӧ вердӧ, шонтӧ. Сідз и Дӧсвидзисьыс тӧждісьӧ вичкуыс понда.

³⁰ Мийӧ быдӧнным Сы вывтырлӧн торрез.

³¹ Сідз и Гижӧтас висьталӧм: «Мортыс коляс ассис ай-мамсӧ да ӧтлаасяс иньыскӧт. И кыкыс лоасӧ ӧтік вывтырӧн».

³² Этна кыввес висьталӧны и Кристосыс йылісь да вичкуыс йылісь. Сэтӧн ыджыт тӧдлытӧм.

³³ Сідзкӧ, быд ай морт, радейт ассит иньтӧ асьтӧ моз. Инь, бурӧ пукты ассит жӧниктӧ.