Ефесын оліссезлӧ 2 - Бур Юӧр 2019

¹ Умӧль да лёк керӧмныт кузя тійӧ одзжык вӧліт кулӧмӧсь.

² Тійӧ оліт эта му вылын керсьӧм сьӧрті: енӧж увтас ыждалісь кульыс сьӧрті керит, сійӧ кывзісит. Сія сэрпӧсь лолыс ӧні керӧ ассис уджсӧ ны пыр, кӧдна озӧ кывзісьӧ Енсӧ.

³ Мийӧ одзжык асьным вӧлім сэтшӧмӧсь. Вывтырным кыскӧм сьӧрті да юрӧ пыртӧм сьӧрті ӧзйӧтчӧмӧн керим умӧльсӧ. Сійӧн миянӧс видзчисис Енлӧн лӧгыс, кыдз и мӧдіккесӧ.

⁴ Еныс миян дынӧ небыт сьӧлӧма. Сія миянӧс ёна радейтӧ.

⁵ Сійӧн миянӧс, умӧльсӧ керӧмным кузя кулӧммесӧ, ӧтлаын Кристосыскӧт Сія ловзьӧтіс. Аслас бурсетӧмӧн Еныс тіянӧс мездіс,

⁶ Кристос Исусыскӧт миянӧс ловзьӧтіс да Сыкӧт пуксьӧтіс енӧжас.

⁷ Локтан каддэзас Еныс лӧсьӧтчӧм Кристос отсӧтӧн мыччавны миянлӧ Ассис унася-уна бурсетӧмсӧ да радейтӧмсӧ.

⁸ Веритӧмныт понда Сія Аслас бурсетӧмӧн тіянӧс мездіс. Мездӧмыс ─ Енсянь козин, сія абу тіян вынсьӧтчӧмсянь.

⁹ Мездӧмыс абу бурсӧ керӧм понда, медбы некин эз вермы ошшасьны.

¹⁰ Ӧні мийӧ ─ Еныслӧн виль аркмӧтӧм. Кристос Исускӧт ӧтлаасьӧмсянь мийӧ аркмӧтӧмӧсь керны бурсӧ, кӧдӧ Еныс кӧркӧсянь ни вӧлі шуӧм миянлӧ керны.

Кристос ӧтлаӧтӧ иудейесӧ да мӧдік отирсӧ

¹¹ Сідзкӧ, видзӧ тӧдвыланыт: тійӧ шогмӧмсянь вӧліт ентӧдтӧммезӧн, эдӧ вӧлӧ вундыштыштӧмӧсь. Вундыштыштӧммес, иудей отирыс, тіянӧс сідз и шувлісӧ, абу пӧ вундыштыштӧмӧсь. Сія эд вӧлі морт киӧн вывтыр вылӧ сувтӧтӧм пас.

¹² Тійӧ сэк оліт Кристостӧг. Вӧліт янсӧтӧмӧсь Израиль отир дынісь. Енлӧн кӧсйӧмись тійӧ нем эдӧ вермӧ босьтны. Тіянлӧ нем вылӧ вӧлі надейтчыны, оліт Ентӧг да.

¹³ Ӧні тійӧ ӧтлаасит Кристос Исусыскӧт. Сы кисьтӧм вирӧн тійӧ сибӧтчит Еныс дынӧ. Одзжык эд вӧліт ылынӧсь.

¹⁴ Кристосыс миянлӧ вайис бурасьӧмсӧ. Сія иудейесӧ да мӧдік отирсӧ ӧктіс ӧтік отирӧ. Ны коласісь янсӧтансӧ Сія дзимляліс.

¹⁵ Туйдӧтсӧ тшӧктӧммезнас Кристосыс пӧдналіс. Аслас вывтырын кыксис аркмӧтіс ӧтік виль отирӧс да сетіс бурасьӧмсӧ.

¹⁶ Ӧтік вывтырын Сія бурӧтіс Еныскӧт кыкнаннысӧ: иудейесӧ да мӧдік отирсӧ. Сійӧ керис крест вылас, сэтӧн разис лӧгалӧмсӧ.

¹⁷ Сія локтіс да юӧртіс бурасьӧм йылісь Бур Юӧрсӧ тіянлӧ, кӧдна вӧлітӧ Ен дынсянь ылынӧсь, юӧртіс и нылӧ, кӧдна вӧлісӧ матынӧсь.

¹⁸ Ӧні миянлӧ, иудейеслӧ да и мӧдік отирлӧ, ӧтік Лолӧн ӧтлаӧтӧммезлӧ, Кристосыс осьтіс Айыс дынӧ туй.

¹⁹ Сідзкӧ, тійӧ абу ни йӧз отир, абу мӧдіклаись локтӧммез. Тійӧ ӧтлаын вежа отиркӧт, тійӧ Енлӧн челядь.

²⁰ Тійӧ сувтӧтӧмӧсь сія увт вылын, кӧдӧ пуктісӧ апостоллэз да Енсянь юӧртіссез. Сійӧ быдӧс лэбтӧмсӧ видзан изыс ─ Ачыс Кристос Исусыс.

²¹ Сы вылын эд видзсьӧ быдӧс лэбтӧмыс да лоӧ Дӧсвидзисьлӧн Вежа Керкуӧн.

²² Кристоскӧт ӧтлаасьӧмсянь и тійӧ Лолыс отсӧтӧн лоат Еныслӧ оланінӧн.