Ап. керӧммез 9 - Бур Юӧр 2019

¹ Дӧсвидзисьлӧн велӧтчиссез вылӧ Савлыслӧн одззамоз петіс лӧгыс. Сія нійӧ быдӧннысӧ мӧдіс вийны. Сійӧн локтіс аркирей дынӧ.

² Сылісь корис гижӧттэз Дамаскын синагогаэзӧ, медбы сэтчинісь вермис кошшыны Исуслӧн велӧтӧм сьӧрті оліссесӧ. Адззас кӧ сэтшӧммесӧ, ай морт, инька я, нійӧ быдӧннысӧ кӧрталӧмӧн лӧсьӧтчис вайӧтны Ерусалимӧ.

³ Савлыс сибӧтчис Дамаск кар дынӧ. Видзчисьтӧг енӧжсяняс сійӧ кытшӧвтіс югьялӧм.

⁴ Савлыс усис му вылас. Сія кыліс баитан шы: «Савл, Савл! Мыля тэ Менӧ вашӧтан?»

⁵ Сія юаліс: «Дӧсвидзисьӧ, кин тэ?» Мӧдыс висьталіс: «Ме ─ Исус, тэ Менӧ эд вашӧтан. Сьӧкыт тэныт мунны паныт лэчыт йыла зорлӧ».

⁶ Савлыс ӧддьӧн повзис. Зэгсьӧмӧн сія юаліс: «Дӧсвидзисьӧ, мый тшӧктан меным керны?». Исусыс сылӧ висьталіс: «Чеччы, мун карӧ. Сэтчин тэныт висьталасӧ, мый тэныт керны».

⁷ Савлкӧт мунісь йӧз повзьӧмувьяныс эзӧ лысьтӧ вӧрзьӧтчыны. Нія баитісьсӧ адззытӧг тай кылісӧ сылісь баитӧмсӧ.

⁸ Савлыс му вывсис чеччис. Осьта синнэзӧн нем эз понды адззыны. Ки пӧлӧт нуӧтӧмӧн вайӧтісӧ сійӧ Дамаск карӧ.

⁹ Куим лун сьӧрна сія нем эз адззы, эз сёй, эз ю.

¹⁰ Дамаскас оліс Ананий нима Исуслӧн велӧтчись. Дӧсвидзисьыс мыччалӧмӧн висьталіс сылӧ: «Ананий!» Мӧдыс шуис: «Ме эстӧн, Дӧсвидзисьӧ».

¹¹ Дӧсвидзисьыс висьталіс Ананийыслӧ: «Чеччы, мун Веськыт нима туй дорись Иуда керкуӧ. Сэтчин юав мортӧс, кӧда чужис Тарсын, нимыс сылӧн Савл. Ӧні сія кеймӧ.

¹² И Савлыс адззыліс Енсянь мыччалӧмсӧ: пырӧ Ананий нима морт, сибӧтчӧ да пуктӧ сы вылӧ киэсӧ, медбы сылӧн синнэс пондісӧ адззыны».

¹³ Ананийыс висьталіс: «Дӧсвидзисьӧ! Унасянь ме кывлі сія морт йылісь. Ерусалимын Тэнат вежа отирлӧ сія керис уна лёксӧ.

¹⁴ Сія локтіс аркирейезсянь гижӧтӧн, медбы и татӧн вермис кутны Тэнӧ нимнат быд корисьсӧ».

¹⁵ Дӧсвидзисьыс сылӧ висьталіс: «Мун. Сія Менам бӧрйӧм морт. Сія пондас висьтасьны Менам ним йылісь быдпӧлӧс отирлӧ, ӧксуэзлӧ да и Израиль отирлӧ.

¹⁶ Ме Савлыслӧ мыччала, мымда пессьӧм-мырсьӧмыс сылӧ усяс Менам ним понда».

¹⁷ Ананий муніс, пырис Иуда керкуӧ. Сія пуктіс Савлыс вылӧ киэсӧ да висьталіс: «Савл вонӧ! Туй вылӧт мунтӧн тэныт мыччасьӧм Дӧсвидзись Исус. Ӧні Сія ыстіс менӧ тэ дынӧ, медбы тэ пондін адззыны да тырин Вежа Лолӧн».

¹⁸ Сэтӧн Савлыслӧн синнэзсис мыйкӧ кыш моз усис. Сія пондіс адззыны да сэк жӧ пыртчис.

¹⁹ Сёйӧм бӧрын Савлыс вынсяліс. Дамаскас кынымкӧ лун сьӧрна Савлыс вӧлі велӧтчиссескӧт.

Савл юӧртӧ Дамаскын

²⁰ Савлыс сія кадсянь синагогаэзын пондіс юӧртны Исусыс йылісь: Сія ─ Енлӧн Зон.

²¹ Кывзіссесӧ быдӧннысӧ диво кутіс. Нія баитісӧ: «Абу разь эта сія, кӧда Ерусалимас летіс-вотіс Исуссӧ нимнас кориссесӧ? Натьтӧ, сія и татчӧ локтіс нійӧ кӧртавны да нуӧтны аркирейез дынӧ?»

²² Савлыс лунісь лунӧ вынсяліс. Дамаскын олісь иудейесӧ баитӧмнас паймӧмӧдз воштывліс. Сія вежӧртӧтліс: Исусыс ─ Кристос-Мездӧтісь.

²³ Чулаліс унакодь кад. Сэк иудейес баитчӧмась вийны Савлсӧ.

²⁴ Савлыслӧ кывсис нылӧн баитчӧмныс. Иудейес уна ойлун сьӧрна видзӧтісӧ карсис петан ыбӧссэз сьӧрын, медбы вийны Савлсӧ.

²⁵ Но ойнас велӧтчиссес пуксьӧтісӧ сійӧ кудӧ да лэдзисӧ карись из йӧр сайӧ.

Савл Ерусалимын

²⁶ Савлыс локтіс Ерусалимӧ. Сія мӧдіс пантасьны Исуслӧн велӧтчиссескӧт. Но быдӧнныс полісӧ сыись. Сылӧн велӧтчисьӧ пӧртчӧмас нія эзӧ веритӧ.

²⁷ Сэк Варнава сійӧ босьтіс да вайӧтіс апостоллэс дынӧ. Нылӧ висьтасис Савллӧн Дӧсвидзисьсӧ туй вылын адззылӧм йылісь да Сылісь висьталӧмсӧ. Варнаваыс висьтасис Савлыслісь Дамаскас Исус нимӧн повтӧг висьтасьӧмсӧ.

²⁸ Сэксянь Савлыс оліс ныкӧт. Ӧтлаын ныкӧт ветлӧтіс Ерусалимын, повтӧг висьтасис Дӧсвидзись Исус нимӧн Бур Юӧрсӧ.

²⁹ Сія сёрнитіс, нельки етшасис грек кыв вылын баитісь иудейезкӧт. Нія лӧсьӧтчисӧ сійӧ вийны.

³⁰ Эта йылісь кылӧм бӧрын воннэз ыстісӧ Савлсӧ Кесарияӧ, сэтчинсянь ─ Тарс карӧ.

³¹ Иудея, Самария да Галилея муэз пасьта вичкуэзлӧн вӧлі лӧнь кад. Нія олісӧ Дӧсвидзисьсис полӧмӧн да вынсялісӧ. Вежа Лов ӧзйӧтӧмсянь вичкуэс содісӧ-паськалісӧ.

Петра Лиддаын да Иоппияын

³² Петра быд карсӧ кытшӧвттӧн локтіс Лидда карись вежа отир дынӧ.

³³ Сэтчин сія адззис Ӧней нима мортӧс. Сія мортыс вӧлі личкӧм параличӧн и кыкьямыс во сьӧрна куйлӧм ольпасьын.

³⁴ Петра висьталіс сылӧ: «Ӧней! Кристос Исусыс тэнӧ веськӧтӧ. Чеччы да ӧкты ольпасьтӧ!» Мортыс перыта чеччис.

³⁵ Лиддаын да Саронын быд олісь адззыліс веськӧтӧм мортсӧ. Нія бергӧтчисӧ Дӧсвидзисьлань, пондісӧ Сылӧ веритны.

³⁶ Иоппия карын оліс Тавифа нима инька, кӧда вӧлі Исуслӧн велӧтчиссез коласісь. Тавифа нимсӧ вуджӧтны кӧ, лоӧ «газель». Сія уна керис бурсӧ отирыслӧ, отсаліс умӧля олісь йӧзлӧ.

³⁷ Петралӧн Лиддаас вовлӧм коста Тавифаыс пондӧм шогавны да кулӧм. Сійӧ миссьӧтӧмась да пуктӧмась вылісь жырас.

³⁸ Велӧтчиссеслӧ кывсьӧм Петралӧн Иоппияас локтӧм йылісь. Лиддасянь Иоппияыс вӧлі матын. Нія кык мортӧс ыстӧмась корны Петрасӧ, тшӧктӧмась сійӧ чожажык локны ны дынӧ.

³⁹ Петраыс лӧсьӧтчис да муніс ныкӧт. Локтӧм бӧрын сійӧ пыртісӧ вылісь жырас. Сэтӧн сы гӧгӧрӧ ӧксисӧ горзісь дӧваэз. Нія мыччалісӧ паськӧммез, кӧдӧ Тавифаыс вурлӧм ныкӧт овтӧн.

⁴⁰ Петраыс быдӧннысӧ ыстіс ӧтӧрас, сувтіс пидзӧс вылӧ да кеймис. Кулӧмыслӧ сія висьталіс: «Тавифа! Чеччы». Тавифаыс осьтіс синнэсӧ, казяліс Петрасӧ да пуксис.

⁴¹ Петраыс сылӧ сетіс кисӧ да чеччӧтіс. Сэсся сія корис сэтчӧ дӧваэсӧ да мӧд веритіссесӧ, ны одзӧ сувтӧтіс ловья Тавифасӧ.

⁴² Иоппияас быдыс пондіс тӧдны лоӧмыс йылісь. Сійӧн унаӧн пондісӧ веритны Дӧсвидзисьлӧ.

⁴³ Петраыс дыркодь оліс Иоппияас. Сія сувтчис кучик керись Симон ордын.