Ап. керӧммез 8 - Бур Юӧр 2019

¹ Савлыс вӧлі Стефансӧ вийиссез дор. Нія луннэзӧ Ерусалимас ёна пондісӧ дзескӧтлыны-вашӧтлыны веритіссесӧ. Веритіссес быдӧнныс мунісӧ-рознитчисӧ Самария да Иудея муэзӧ. Ерусалимас кольччисӧ дзир апостоллэс.

² Енлӧ юрбитісь отир Стефансӧ дзебисӧ. Сы понда нія ӧддьӧн горзісӧ.

³ Савлыс тай летіс-куталіс веритіссесӧ. Сія пыравліс керкуэзӧ да ай отирӧс, инькаэзӧс кыскавліс, пуксьӧтліс.

Филиплӧн Самарияын юӧртӧм

⁴ Сы коста рознитчӧм веритіссес ветлӧтісӧ да висьтасисӧ Бур Юӧрсӧ.

⁵ Самария муӧ локтӧм бӧрын Филип пырис карӧ. Сэтчин отирыслӧ висьтасис Кристос йылісь.

⁶ Отирыс кылісӧ Филиплісь висьтасьӧмсӧ да адззылісӧ сылісь адззывлытӧм керӧммесӧ. Сійӧн уна отир бура кывзісӧ сылісь баитӧмсӧ.

⁷ Отир коласын унаын вӧлӧмась сэрпӧсь ловвез. Ныись сэрпӧсь ловвес чирзӧмӧн петісӧ. Уна вӧлісӧ параличӧн личкӧммес, уна чотісӧ. Нія быдӧнныс веськалісӧ.

⁸ Сія карын лоис гажся-гаж.

⁹ Карас вӧлі Симон нима тӧдісь, кӧдалӧн керӧммезсянь Самарияись отирсӧ диво кутліс. Асьсӧ сія пуктіс кинӧкӧ ыджытӧ.

¹⁰ Сійӧ учӧтсянь ыджытӧдз быдӧнныс кывзісӧ. Нія баитісӧ: «Сія ─ Енлӧн ыджыт выныс».

¹¹ Отирыс Сійӧ кывзӧмась, мыля сія аслас тӧдӧмсянь керӧммезӧн нійӧ дыр дивуйтчӧмӧдз вайӧтлӧм.

¹² Филипыссянь отирыс кылісӧ Енлӧн Юралӧм йылісь да Кристос Исус йылісь Бур Юӧрсӧ. Филипыслӧ веритісӧ да ай-инь йӧз быдӧнныс пыртчисӧ.

¹³ Нельки ачыс Симоныс пондіс веритны да пыртчис. Филипыс дынісь сія кальк эз керлы. Симоныс син одзын ыджыт вынӧн керсьывлісӧ адззывлытӧммез да пассэз. Симонсӧ сысянь диво кутліс.

¹⁴ Ерусалимас апостоллэзлӧ кывсис: Самарияын оліссез босьтӧмась пӧ Енлісь кывсӧ. Сэк ны дынӧ ыстісӧ Петраӧс Иоанкӧт.

¹⁵ Нія локтісӧ да кеймисӧ отирыс понда, медбы нылӧ Еныс сетіс Вежа Ловсӧ.

¹⁶ Отирыс коласісь некин вылӧ Сія абу на лэдзчисьлӧм. Нія вӧлісӧ дзир пыртӧмӧсь Дӧсвидзись Исус нимӧн.

¹⁷ Сэк Петра да Иоан пуктылісӧ ӧксьӧммес вылӧ киэзнысӧ, и Еныс козьналіс нылӧ Вежа Ловсӧ.

¹⁸ Симоныс адззыліс: апостоллэзлӧн киэз пуктӧм бӧрын отирыслӧ Еныс сетӧ Вежа Ловсӧ. Сэк сія апостоллэслӧ вайис сьӧм.

¹⁹ Сія шуис: «Вайӧ и меным сійӧ вынсӧ, медбы и менам киэз пуктылӧм пыр отирыс тырисӧ Вежа Лолӧн».

²⁰ Петра сылӧ висьталіс: «Тэнат эзысьыт ась тэкӧт кулӧ! Тэ тай мӧдін Енлісь козинсӧ босьтны сьӧм вылӧ.

²¹ Эстӧн тэныт абу торыс. Тэ он вермы керны миян моз. Еныс эд адззӧ тэнчит тшыкӧм сьӧлӧмтӧ.

²² Бергӧтчы аслат умӧль керӧм дынісь. Кеймы Еныслӧ, медбы Сія проститіс юрат пыртӧмтӧ.

²³ Ме эд адзза: курыт сӧпӧн тэ тырӧмыт, умӧльыс тэнӧ видзӧ аслас кӧртӧттэзын».

²⁴ Симоныс сэтчӧ висьталіс: «Кеймӧ Дӧсвидзисьыслӧ ме понда. Тіян висьталӧмыс ась оз усь ме вылӧ!»

²⁵ Апостоллэз висьтасисӧ Дӧсвидзисьлісь Кывсӧ да Сылісь керӧммесӧ. Сэсся бӧр иньдӧтчисӧ Ерусалимӧ. Самария муӧт мунӧмныс коста уна оланінын висьтасисӧ Бур Юӧрсӧ.

Филип Эфиопияись морткӧт

²⁶ Филиплӧ Енлӧн ангел висьталіс: «Чеччы, пет лунлань да мун туй вылӧ, кӧда мунӧ Ерусалимсянь Газаӧ. Сэтӧн отирыс абуӧсь».

²⁷ Филипыс чеччис да муніс. Сія туй кузя сэк муніс Эфиопияын олісь. Мортыс вӧлӧм Эфиопияись евнук, «кандакия» иньӧксу дынын веськӧтлісь. Иньӧксулӧн быдӧс дона берсяыс да сьӧмыс вӧлӧм сы кипод увтын. Мортыс вовлӧм Ерусалимӧ юрбитны Енлӧ.

²⁸ Бӧр туйӧ мунтӧн, сія пукалӧм колесницаын да лыддьӧтӧм Енсянь юӧртісь Исайлісь гижӧт.

²⁹ Вежа Лолыс висьталіс Филиплӧ: «Сибӧтчы колесницаыс дынӧ».

³⁰ Филипыс сибӧтчис да кыліс лыддьӧтӧмсӧ. Мортыс лыддьӧтіс Енсянь юӧртісь Исайлісь гижӧт. Филипыс юаліс: «Вежӧртан я лыддьӧтӧмтӧ?»

³¹ Мӧдыс висьталіс: «Кыдз верма вежӧртны, некин оз кӧ вежӧртӧт?» Сія Филипсӧ корис пуксьыны ордчӧн.

³² Мортыслӧн гижӧтсис лыддьӧтӧмыс вӧлі сэтшӧм: ─ Баляӧс моз нуӧтісӧ Сійӧ начкывны. Шырись одзын дзель шы оз сет. Сідз и Сія эз осьт ӧмсӧ.

³³ Суд вылас Сыкӧт веськыта эзӧ бӧрйисьӧ, Сійӧ абутӧм туйӧ пуктісӧ. Некин оз вермы висьтасьны Сы увтыр йылісь, му вылісь Сылісь олансӧ эд орӧтасӧ.

³⁴ Мортыс Филипыслісь юаліс: «Висьтав меным, кин йылісь баитӧ Енсянь юӧртісьыс? Ас йывсис сія баитӧ, мӧдік йылісь я?»

³⁵ Сэк Филипыс пондіс висьтасьны. Эта гижӧтсянь пондӧтчӧмӧн сія висьтасис Исус йылісь Бур Юӧрсӧ.

³⁶ Сы коста сибалісӧ ва дынӧ. Мортыс висьталіс: «Эстӧн ва. Мый падмӧтӧ менӧ пыртчыны?»

³⁷ Филипыс сылӧ висьталіс: «Быдсӧн сьӧлӧмнат веритан кӧ, позьӧ». Мӧдыс висьталіс: «Верита: Кристос Исусыс ─ Енлӧн Зон».

³⁸ Сія колесницасӧ тшӧктіс сувтӧтны. Кыкнанныс пырисӧ ваӧ. Филипыс сэтӧн Эфиопияись юралісьсӧ пыртіс.

³⁹ Нія петісӧ васис. Сэтӧн мортыс вылӧ лэдзчисис Вежа Лолыс. Мортыс гажмис да вӧрзис одзлань. Васис петӧм бӧрын сія эз ни адззыв Филипсӧ. Сійӧ нуӧтіс Дӧсвидзисьлӧн ангел.

⁴⁰ Филипыс лоис Азотын. Сэссянь Филипыс иньдӧтчіс Кесария карӧ. Мунтӧнняс сія быд карын висьтасис Бур Юӧрсӧ.