Ап. керӧммез 4 - Бур Юӧр 2019

¹ Петра Иоаныскӧт баитісӧ отирыслӧ. Сы коста ны дынӧ сибӧтчисӧ вежауджаліссез, Вежа Керкуас воиннэзлӧн веськӧтлісь да садукейез.

² Апостоллэс велӧтӧмсянь нія лӧгасисӧ. Нылӧн эд велӧтӧмныс вӧлі сэтшӧм: Исусыс ловзис, сідзкӧ и кулӧммес ловзясӧ.

³ Нія апостоллэсӧ кутісӧ. Ны сьӧрын асылӧдз видзӧтны сувтӧтісӧ воиннэзӧс, сэк вӧлі рыт ни да.

⁴ Апостоллэсӧ кывзіссез коласісь унаӧн пондісӧ веритны. Сэтшӧммес вӧлісӧ вит сюрс морт гӧгӧр.

⁵ Мӧд лунас Ерусалимас ӧксисӧ иудейезлӧн веськӧтліссез, бӧрйӧм пӧриссез да Туйдӧтӧ велӧтіссез.

⁶ Сэтӧн вӧлісӧ Аннас аркирей, Каиаф, Иоан, Александр да аркирей увтырись мӧдіккез.

⁷ Нія апостоллэсӧ сувтӧтісӧ шӧрас да юасисӧ: «Кытшӧм вынӧн, кытшӧм нимӧн тійӧ веськӧтіт мортсӧ?»

Петралӧн Исус йылісь юӧртӧм

⁸ Сэк Петра, кӧда вӧлі тырӧм Вежа Лолӧн, висьталіс нылӧ: «Израиль отирлӧн веськӧтліссез да пӧриссез!

⁹ Талун миянӧс тшӧктӧны висьтавны шогалісь мортлӧ бурсӧ керӧм йылісь, мыйсянь сія веськаліс.

¹⁰ Быдыс тіян коласісь да Израильын быд морт ась пондӧ тӧдны лоӧмыс йылісь. Назаретісь Кристос Исуссӧ тійӧ дорит пу бердӧ, но Еныс сійӧ ловзьӧтіс. Тіян одзӧ эта мортыс сувтіс веськалӧм Исусыс нимӧн.

¹¹ Исусыс ─ из, кӧдӧ тійӧ, керку лэбтіссес, абутӧм туйӧ пуктіт. Сія лоис пельӧс изӧн. Мӧдік пыр оз позь мезмыны.

¹² Енӧж увтас отирыслӧ абу сетӧм мӧдік ним, кӧда пыр миянлӧ позьӧ мезмыны».

Апостоллэзӧс лэдзӧм

¹³ Бӧрйӧм пӧриссес да веськӧтліссес кылӧмась апостоллэзлісь повтӧг баитӧмнысӧ. Нія казялісӧ: баитіссес абу велӧтчӧм отир коласісь. Нійӧ сысянь диво кутіс. Нія апостоллэсӧ тӧдісӧ, адззывлісӧ Исускӧт ветлӧтӧмныс коста да.

¹⁴ Ӧтлаын ныкӧт сулаліс шогӧтісь веськӧтӧм мортыс. Сійӧн нія нем эзӧ вермӧ висьтавны паныт.

¹⁵ Апостоллэсӧ судитанінсис тшӧктісӧ петны. Асьныс пондісӧ баитчыны.

¹⁶ Нія шуисӧ: «Мый пондам ныкӧт керны? Ерусалимын оліссес тӧдӧны нылісь адззывлытӧм керӧмнысӧ. И мийӧ огӧ вермӧ висьтавны, эта пӧ эз вӧв.

¹⁷ Отирыс коласын лоӧмыс йылісь юӧрыс медбы эз паськав, чорыта ӧлам нійӧ. Сэсся ась некинлӧ озӧ ни висьтасьӧ Исусыс йылісь».

¹⁸ Нія корисӧ апостоллэсӧ. Чорыта висьталӧмӧн ӧлісӧ нійӧ. Ӧнісянь эзӧ лэдзӧ баитны да велӧтны Исус ним йылісь.

¹⁹ Петра Иоанкӧт нылӧ висьталісӧ: «Видзӧтӧ асьныт: бур я сія Ен одзын, пондам кӧ тіянӧс кывзыны Енӧсся буржыка?

²⁰ Адззылӧмным да кылӧмным йылісь мийӧ огӧ вермӧ чӧвны».

²¹ Юраліссес повзьӧтлӧмӧн нійӧ лэдзисӧ. Ныкӧт мыйкӧ керны полісӧ отирись. Быдӧнныс эд ошкисӧ Енсӧ лоӧмыс понда.

²² Адззывлытӧма веськалӧм мортлӧ вӧлӧм нёльдас во саяс.

Веритіссезлӧн кеймӧм

²³ Ны дынісь мезмӧм бӧрын апостоллэс локтісӧ мӧд веритіссез дынӧ да висьтасисӧ аркирейезлісь да пӧриссезлісь баитӧмнысӧ.

²⁴ Нійӧ кывзӧм бӧрын быдӧнныс ӧтлаын горӧн пондісӧ кеймыны Енлӧ. Нія баитісӧ: «Быдӧнныс вылын Юралісь Ен, Тэ аркмӧтін енӧжсӧ, мусӧ, саридзсӧ да быдӧс ны пытшкисьсӧ.

²⁵ Тэ баитін миян Давид ай пыр. Аслат Давид раб пыр Вежа Лов вынӧн висьталін: ─ Мыйлӧ лӧгувьяныс лэбтісьӧны ентӧдтӧммес? Мыйлӧ отирыс ковтӧмсӧ лӧсьӧтчӧны керны?

²⁶ Лэбтісьӧны му вылісь ӧксуэз. Юраліссез ӧксьӧны ӧтлаӧ. Дӧсвидзись вылӧ да Сылӧн Кристос-Мездӧтісь вылӧ нія лэбтісьӧны.

²⁷ Быль эд, эта карын ӧксьӧммес лэбтісисӧ Тэнат Вежа Исус Зон вылӧ ─ Тэнат Мавтӧм вылӧ. Ирод да Понтий Пилат ӧтлаасисӧ Израиль йӧзкӧт да мӧдік кыввез вылын баитісь отиркӧт.

²⁸ Нія керисӧ Тэнат одзлань висьтавлӧм сьӧрті, Тэнат вынӧн лӧсьӧтӧм сьӧрті.

²⁹ Дӧсвидзисьным, ӧні видзӧт, кыдз нія миянӧс повзьӧтлӧны. А раббетлӧ отсав повтӧг висьтасьны Тэнчит Кывтӧ.

³⁰ Нюжӧт Ассит китӧ, Вежа Исус Зоныт нимӧн веськӧт отирсӧ, кер пассэсӧ да адззывлытӧммесӧ».

³¹ Ӧксьӧммеслӧн кеймӧм бӧрсянь ӧксяніныс зэгаліс. Быдӧнныс тырисӧ Вежа Лолӧн да повтӧг висьтасисӧ Енлісь Кывсӧ.

Быдӧс ӧтласа

³² Веритіссеслӧн быдӧнныслӧн сьӧлӧммезныс да ловвезныс вӧлісӧ ӧтлаасьӧмӧсь. Ассиныс пажытьсӧ нія эзӧ шуӧ асланысӧн, быдӧс вӧлі ӧтласа.

³³ Апостоллэс повтӧг висьтасисӧ Дӧсвидзись Кристос Исуслӧн ловзьӧм йылісь. Быдӧнныс вылын вӧлі Енсянь вына бурсетӧмыс.

³⁴ Ны коласын эз вӧв ӧтік умӧля олісь. Уналӧн вӧлісӧ муэз да керкуэз. Нійӧ вузалӧм бӧрсянь сьӧмсӧ вайлывлісӧ ӧтлаӧ.

³⁵ Вайӧмсӧ пуктывлісӧ апостоллэз одзӧ. Сэтісь сетавлісӧ быдӧнныслӧ, кинлӧ мымда коліс.

³⁶ Сідз керис и Иосия левит. Чужан гортнас сія вӧлӧм Кипрись. Апостоллэс сылӧ сетісӧ Варнава ним, мый лоӧ «бурӧтчись».

³⁷ Сылӧн вӧлӧм му. Сійӧ вузалӧм бӧрын босьтӧм сьӧмсӧ Иосияыс вайис да пуктіс апостоллэз одзӧ.