Ап. керӧммез 28 - Бур Юӧр 2019

¹ Павелкӧт васис мезмӧммес петісӧ му вылӧ. Сія саридз шӧрын муыс вӧлӧм Мальта.

² Сэтӧн олісь йӧзыс ӧддьӧн бура панталісӧ миянӧс. Сэк зэрис, вӧлі кӧдзыт. Миянӧс шонтны нія керисӧ би.

³ Павелыс ӧктіс уввез да тэчис биас. Сэк бисис петіс кый да ӧшӧтчис Павел ки вылӧ.

⁴ Йӧзыс казялісӧ ки вылӧ ӧшӧтчӧм кыйсӧ. Нія баитісӧ ӧтамӧдныслӧ: «Эта, тыдалӧ, морт вийись. Сія саридзсис мезмис, а вештісись еныс сійӧ оз мӧд кольны ловйӧн».

⁵ А Павелыс кыйсӧ шупкис биас. Сылӧ сысянь эз ло умӧльыс.

⁶ Мӧддэс видзчисисӧ, сія пондас пӧ пыктыны, видзчисьтӧг пӧ кулӧм усяс. Нія дыр видзчисисӧ, да адззӧны, умӧльыс сыкӧт эз ло. Сэк нія юраныс пыртісӧ мӧдікӧ, шуисӧ: «Сія ─ ен».

⁷ Саридз шӧрын Мальта муас юраліс Публий. Сувтчанінным гӧгӧр муэс вӧлӧмась сылӧн. Сія миянӧс босьтіс дынас да куим лун сьӧрна ёрттэзӧс моз вердіс, юкталіс.

⁸ Публийыслӧн айыс шогаліс. Сія куйліс, кынӧм висьӧмсянь сотчис да. Павелыс пырис сы дынӧ. Сія кеймис да сы вылӧ киэсӧ пуктӧмӧн веськӧтіс сійӧ.

⁹ Сійӧ веськӧтӧм бӧрын Павелыс дынӧ эта муись вовлывлісӧ мӧдік шогаліссез. Нія быдӧнныс веськавлісӧ.

¹⁰ Отирыс миянӧс бурӧ пуктісӧ, сійӧн туйӧ петіканым сетісӧ быдӧс коланасӧ.

Римӧ локтӧм

¹¹ Куим тӧлісь бӧрті мийӧ мунім Александрияись Диоскур нима корабль вылын. Сія тӧвйис эта му вылын жӧ.

¹² Корабльнас мийӧ локтім Сиракузаӧ. Сэтӧн олім куим лун сьӧрна.

¹³ Сэтісь мунӧм бӧрын локтім Ригияӧ. Ӧтік лун бӧрті тӧлыс пондіс пӧльтны лунланьсянь, и мийӧ мӧд лунас ни локтім Путеолӧ.

¹⁴ Сэтӧн адззим воннэзнымӧс. Нія корисӧ олыштны ны дынын сизим лун. Сэсся мунім Римӧ.

¹⁵ Римас воннэзным кылӧмась миян локтӧм йылісь. Нія петӧмась пантавны миянӧс Аппия отаинӧдз, а мукӧдыс локтӧмась Куим Сувтчан Керку нима посадӧдз. Нійӧ казялӧмсянь Павелыс гажмис да ошкис Енсӧ.

¹⁶ Римӧ локтӧм бӧрын сё воинӧн веськӧтлісьыс пукаліссесӧ сетіс воиннэз вылын юралісьлӧ. А Павелсӧ лэдзисӧ овны торйӧн сы сьӧрын видзӧтісь воинкӧт.

Павел Римын

¹⁷ Куим лун бӧрті Павелыс корис иудейеслісь веськӧтліссесӧ. Нія ӧксисӧ. Павелыс нылӧ висьталіс: «Воннэзӧ! Ме эг кер умӧльсӧ миян отирлӧ, айезным моз олӧмлӧ. Но Ерусалимын менӧ кӧрталӧмӧн сетісӧ Рим отир киэзӧ.

¹⁸ Римсянь сувтӧтӧм юраліссес быдӧс тӧдмалісӧ ме йылісь. Нія ме сайын эзӧ адззӧ некытшӧм умӧль керӧм. Менӧ вийны могыс эз вӧв. Сійӧн нія менӧ мӧдісӧ лэдзны.

¹⁹ Но иудейес тай паныт сувтісӧ. Сэк ме ачым корси Римӧ ӧксу дынӧ, но ме эг лок татчӧ асланым отир вылӧ умӧльсӧ баитӧм могись.

²⁰ Тіянӧс ме ӧкті пантасьлыны да баитны. Менӧ эд ӧні пуксьӧтісӧ сія Морт понда, Кӧда вылӧ Израильыс надейтчӧ».

²¹ Мӧддэс висьталісӧ сылӧ: «Иудеясянь тэ йылісь гижӧттэз эзӧ вӧлӧ. Вовлывлісӧ воннэзным. Нія эзӧ юӧртӧ тэ йылісь, умӧльсӧ эзӧ баитӧ.

²² Миянлӧ кывсис: сія велӧтӧмлӧ быдлаын паныт мунӧны. Эта йылісь мийӧ тэсянь мӧдам кывны, мый тэ висьталан».

²³ Иудейес висьталісӧ сылӧ пантасян лун. Сія лунӧ унаӧн локтісӧ Павеллӧн олан керкуӧ. Павелыс асывсянь рытӧдз нылӧ висьтасис Енлӧн Юралӧм йылісь велӧтӧмсӧ. Осьтіс нылӧ Моисейлӧн Туйдӧт сьӧрті да Енсянь юӧртіссез сьӧрті Исус йылісь гижӧмсӧ.

²⁴ Ӧттэз висьтасьӧмас пондісӧ веритны, а мӧддэз эзӧ веритӧ.

²⁵ Ас коласаныс нія эзӧ вермӧ локны ӧтмоза вежӧртӧмӧдз, сійӧн мунісӧ. Павелыс нійӧ кольлаліс сэтшӧм кыввезӧн: «Бура висьтавлӧм Вежа Лолыс миян айезлӧ Енсянь юӧртісь Исайыс пыр:

²⁶ ─ Мун эта отир дынӧ да висьтав: Пеллезнаныт кылатӧ, да одӧ вежӧртӧ. Синнэзнаныт пондатӧ видзӧтны, да одӧ казялӧ.

²⁷ Эта отирлӧн сьӧлӧмныс чорзьӧм, пеллезнаныс умӧля кылӧны. Синнэзнысӧ куньӧмась, да озӧ адззӧ. Пеллезнаныс озӧ кылӧ, сьӧлӧмнаныс озӧ вежӧртӧ, озӧ бергӧтчӧ Меланьӧ, медбы Ме нійӧ веськӧті.

²⁸ Тійӧ ӧні тӧдӧ: Енлӧн сетӧм мезмӧм йылісь юӧрыс ыстӧм мӧдік отирлӧ. Нія кыласӧ».

²⁹ Павеллӧн висьталӧм бӧрын иудейес мунісӧ. Нія ас коласаныс уна етшасисӧ.

³⁰ Павелыс аслас нянь вылын сэтӧн оліс кык во сьӧрна. Сія пантавліс сы дынӧ быд локтӧм мортӧс.

³¹ Сія повтӧг висьтасис Енлӧн Юралӧм йылісь да Дӧсвидзись Кристос Исус йылісь. Сійӧ эзӧ падмӧтӧ.