Ап. керӧммез 27 - Бур Юӧр 2019

¹ Баитчӧм бӧрын мийӧ лӧсьӧтчим иньдӧтчыны Италияӧ. Павелсӧ мӧд пуксьӧтӧммескӧт сетісӧ Юлий кипод увтӧ. Сія вӧлі Рим ӧксулӧн полкись сё воинӧн веськӧтлісь.

² Мийӧ пуксим Адрамитісь корабль вылӧ да иньдӧтчим. Мунны лӧсьӧтчим Асия муэз пӧлӧн. Миянкӧт вӧлі Аристарк. Сія вӧлі Македония муын Фессалоника карись.

³ Мӧд лунас сувтчим Сидонын. Юлийыс Павелыскӧт видзсис небыта. Лэдзис сійӧ ветлыны ёрттэс дынӧ да босьтны туйын быдӧс коланасӧ.

⁴ Сэтчинісь мунӧм бӧрын паныт пӧльтан тӧв кузя ковсис уйны Кипр му пӧлӧн.

⁵ Саридзсӧ вуджим Киликия да Памфилия муэз пӧлӧн. Мийӧ локтім Ликия муись Мира карӧ.

⁶ Сэтӧн сё воинӧн веськӧтлісьыс адззис Александрияись корабль. Сія иньдӧтчӧ вӧлі Италияӧ. Мийӧ пуксим сы вылӧ.

⁷ Жагӧна мунім уна лун сьӧрна. Ӧдва локтім Книд кар весьтӧдз. Тӧлыс вӧлі паныт, сійӧн мийӧ Крит му дынӧ сибӧтчим Салмон мыс сайӧт.

⁸ Ва дорӧттяс сьӧкыта сибӧтчим Бур Сувтчанін нима кар дынӧ. Сы дынсянь матын вӧлі Ласея кар.

⁹ Чулаліс уна кад. Одзлань уйӧмись вермис умӧль петны. Чулаліс ни эд арся Кӧслуналӧмыс. Павелыс велӧтіс нійӧ:

¹⁰ «Отир, кывзӧ! Ме адзза: одзлань уйӧмыс лоас сьӧкыт. Корабльыс вермас вӧйны, оланным ─ орны».

¹¹ Но сё воинӧн веськӧтлісьыс Павелсӧ эз кывзы. Сія веритіс корабльнас веськӧтлісьыслӧ да кӧзяиныслӧ.

¹² Сувтчаніныс абу вӧлі лӧсьӧтӧм тӧвйыны. Сійӧн унаӧн шуисӧ сэтісь мунны. Нія баитісӧ: позяс кӧ, мунам Критыс пӧлӧн Финик сувтчанінӧдз да сэтӧн тӧвьям. Финикыс куйліс лун-рыт да ой-рыт тӧввез паныт.

Саридз вылын лёк тӧв

¹³ Пондіс пӧльтны лун тӧв. Уйиссес юраныс пыртісӧ: лоис коланаыс. Нія Крит пӧлӧн иньдӧтчисӧ одзлань.

¹⁴ Чожа мыйись паныт лэбтісис ой-асыв ладорсянь лёк тӧв.

¹⁵ Корабльыс тӧв паныт эз вермы видзсьыны. Лёк тӧлыс сійӧ ёна кутіс да новйӧтіс саридз вылӧттяс.

¹⁶ Сэсся вайӧтіс саридз шӧрын Клавда нима му дынӧ. Мийӧ пыжсӧ ӧдва вермим видзны корабльыс вылісь кывтӧмсис.

¹⁷ Сійӧ пуктім, кытӧн сулаліс. Корабльсӧ разьсьӧмсис видзӧм понда уджаліссес кӧртавлісӧ геззэзӧн. Нія полісӧ кышасьны Сирт нима лажмытінӧ. Сійӧн лэдзисӧ корабльлісь уялан падмӧтансӧ. Сідз корабльсӧ новйӧтіс тӧлыс.

¹⁸ Мӧд лунас тӧлыс миянӧс ёна шенталіс ӧтмӧдӧрӧ. Уджаліссес пондісӧ кокньӧтны корабльсӧ, мымдакӧ ректісӧ ваас.

¹⁹ Куимӧт лунас мийӧ асланым киэзӧн чапким ваас корабль вывсис быдӧс берсясӧ.

²⁰ Шонді да кӧдзуввез эзӧ тыдалӧ уна лун сьӧрна. Вына тӧлыс дугдывтӧг койис васӧ. Кольччыны ловйӧн юрын эз ни вӧв.

²¹ Мийӧ дыр эгӧ сёйӧ. Павелыс сувтіс миян коласӧ да висьталіс: «Отир! Коліс керны менам висьталӧм сьӧрті. Эз ков мунны Критыс дынісь. Сэк эгӧ бы пантасьӧ сьӧкытыскӧт, умӧльыскӧт.

²² А ӧні лэбтӧ юррезнытӧ. Тіян коласісь ӧтік морт оз кув, дзир корабльыс вӧяс.

²³ Эта ойӧ ме дынӧ вовліс ангел. Сійӧ ыстӧм Еныс, Кӧдалӧ ме сеті ачымӧс да Кӧдалӧ кысъяла.

²⁴ Ангелыс висьталіс: Павел, эн пов! Тэныт колӧ сувтны Римын ӧксу одзӧ. Тэ понда Еныс видзас и тэкӧт уйиссесӧ.

²⁵ Сійӧн лэбтӧ юррезнытӧ! Ме Еныслӧ верита, лоас меным висьталӧм сьӧрті.

²⁶ Миянӧс чапкас саридз шӧрын кытшӧмкӧ му вылӧ».

Саридз вылын ойнас

²⁷ Адриатика саридз вылӧт тӧлыс миянӧс новйӧтіс даснёльӧт ой. Ойшӧр гӧгӧрас корабль вылын уджаліссес казялісӧ: нія сибӧтчӧны кытшӧмкӧ му дынӧ.

²⁸ Нія пешлісӧ ваыслісь пыдынасӧ, вӧлі нёльдас метра. Мымдакӧ мунӧм бӧрын бӧра пешлісӧ пыдынасӧ, сэтӧн вӧлі куимдас метра.

²⁹ Корабль вылын уджаліссес полісӧ сюрны изъяинӧ, сійӧн лэдзисӧ нёль якорь да ёна кеймисӧ, медбы чожажык югдіс.

³⁰ Уджаліссес корабль вывсис лӧсьӧтчӧмась пышшыны. Саридзас пондісӧ лэдзны пыж. Нія керисӧ мог: мӧдӧны пӧ ныр ладорсяняс лэдзны якорь.

³¹ Павелыс висьталіс сё воинӧн веськӧтлісьлӧ воиннэскӧт: «Пышшасӧ кӧ нія корабль вывсис, сэк тійӧ ловйӧн одӧ кольччӧ».

³² Сэк воиннэс кералісӧ пыж видзан геззэсӧ, и сія усис саридзас.

³³ Асъяпоннас Павелыс быдӧннысӧ тшӧктіс сёйны. Сія висьталіс: «Талун даснёльӧт лун ни видзчисьтӧнняныт тійӧ тшыгӧсь, нем эдӧ сёйӧ.

³⁴ Ӧні тшӧкта: сёйӧ, медбы ловьяэзӧн кольччит. Тіян коласісь ӧтіклӧн нельки юрси тылӧпныт оз усь юр вывсиныт».

³⁵ Сідз висьталӧм бӧрын сія босьтіс нянь. Быдӧнныс одзын буркывтіс Енсӧ, чегӧтіс да пондіс сёйны.

³⁶ Сэк быдӧнныс гажмисӧ да пондісӧ сёйны.

³⁷ Корабль вылас быдӧсыс нія вӧлісӧ кыксё сизимдас квать морт.

³⁸ Быдӧнныс пӧтісӧ. Сэсся пондісӧ кокньӧтны корабльсӧ. Шогдісӧ лэдзисӧ ваас.

Му вылӧ петӧм

³⁹ Локтіс лун. Син одзаным вӧлі кытшӧмкӧ курья. Муыс валькыта пырис саридзӧ. Сійӧ мусӧ нія эзӧ тӧдӧ. Сэтчӧ лӧсьӧтчисӧ сувтчыны, вермасӧ кӧ сибӧтчыны корабльнас.

⁴⁰ Нія орӧтісӧ якорресӧ. Пӧрччалісӧ веськӧтлан пелыссэз бердісь геззэсӧ. Лэбтісӧ учӧтик парус. Тӧв ньылат пондісӧ сибӧтчыны му дынӧ.

⁴¹ Нія сюрисӧ лажмытінӧ. Корабльыс кышасис ва пыдӧсас. Нырыс сибдіс, эз вермы вӧрзьыны. Ыджыт вынӧн койсьӧм васянь корабльлӧн бӧрыс пондіс разьсьыны.

⁴² Воиннэс баитчисӧ вийны пукаліссесӧ, медбы му вылас петікӧ эзӧ пышшӧ.

⁴³ Сё воинӧн веськӧтлісьыс падмӧтіс нійӧ, вийны мӧддэскӧт ӧтлаын шедӧ Павелыс да. Уявны кужиссесӧ одзлань тшӧктіс чеччӧвтны ваас да петны му вылас.

⁴⁴ Мукӧдсӧ му вылас тшӧктіс петны тёссэз вылын, мукӧдсӧ ─ корабльсис кольччӧм торрез вылын. Сідз быдӧнныс петісӧ му вылас.