Ап. керӧммез 26 - Бур Юӧр 2019

¹ Агриппаыс висьталіс Павелыслӧ: «Тэ верман ас йывсит висьтасьны». Сэк Павелыс лэбтіс кисӧ да асьсӧ дорйӧм могись пондіс баитны:

² «Агриппа ӧксу! Ачымӧс ме пукта шуда мортӧ. Ме талун верма ачымӧс дорйыны тэ одзын быдӧсісь, мый ме вылӧ висьтавлісӧ иудейес.

³ Тэ эд бура тӧдан айезным лӧсьӧтӧм сьӧрті иудейезлісь олансӧ да етшасьӧмсӧ. Кора тэнӧ: кывзы менӧ ыджыт мылаӧн.

⁴ Быд иудей тӧдӧ менчим оланӧс. Ме эд том кадсянь олі Ерусалимын аслам отир коласын.

⁵ Нія вермасӧ ме йылісь висьтасьны. Нія менӧ важынсянь тӧдӧны. Ме олі фарисейезлӧн велӧтӧм сьӧрті. Иудейезлӧн сія медчорыт велӧтӧм.

⁶ Ӧні ме сулала судитіссез одзын сы понда, мыля надейтча кӧсйӧмыс вылӧ. Сійӧ Еныс кӧсйӧм вӧлі миян айезлӧ.

⁷ Кӧсйӧмыслісь лоӧмсӧ надейтчӧны адззывны миян даскык увтырным. Видзчисьтӧнняныс нія лун и ой кысъялӧны Еныслӧ. Кӧсйӧмыс вылӧ надейтчӧмӧ понда, Агриппа ӧксу, иудейес и висьтавлӧны ме вылӧ умӧльсӧ.

⁸ Еныс кулӧммесӧ ловзьӧтӧ. Мыля тійӧ шуат, вермас я сэтшӧмыс лоны?

⁹ Одзжык и ме юрам сідз пыртлі: меным, мыся, колӧ ёна сувтны Назаретісь Исус нимлӧ паныт.

¹⁰ Ерусалимын ме сійӧ и кери. Аркирейез тшӧктӧм сьӧрті ме Исус сьӧрті оліссесӧ унаӧс пуксьӧті. Нійӧ вийиссескӧт ме вӧлі ӧтдор.

¹¹ Синагогаэзас ме унаись нійӧ вартлі. Тшӧктывлі нійӧ видны Исуссӧ. Сы велӧтӧм сьӧрті оліссез вылӧ лёксялӧмувьям ме вӧтлісьлі сьӧраныс нельки йӧз каррезын.

¹² Аркирейез тшӧктӧм сьӧрті ме сы понда иньдӧтчи Дамаскӧ.

¹³ Ӧксу, луншӧрнас мийӧ мунім туй кузя. Сэтӧн ме казялі енӧжсянь лэдзчисьӧм шонді югӧрся югытжык югӧр. Сія кытшӧвтіс менӧ да мекӧт муніссесӧ.

¹⁴ Мийӧ быдӧнным усим му вылас. Ме кылі еврей кыв вылын баитан шы. Сія висьталіс меным: "Савл! Савл! Мыля тэ менӧ вашӧтан? Сьӧкыт тэныт мунны паныт лэчыт йыла зорлӧ".

¹⁵ Ме юалі: "Дӧсвидзисьӧ, кин тэ?" Сія висьталіс: "Ме ─ Исус, тэ Менӧ и вашӧтан.

¹⁶ Лэбтісь, сувт кок вылат. Ме сы понда и мыччаси тэныт, медбы сувтӧтны тэнӧ Аслам удж вылӧ. Тэ пондан висьтасьны, мый адззылін да мый Ме тэныт бӧрынжык осьта.

¹⁷ Ме мезда тэнӧ иудейез да мӧдік отир киись, кӧдна дынӧ ӧні тэнӧ ыста.

¹⁸ Тэ осьтан нылісь синнэзнысӧ. Велӧтан нійӧ пемытсис бергӧтчыны югытас, сотанаыс кипод увтісь ─ Ен дынӧ, медбы пондісӧ Меным веритны. Сэк веритӧмныс понда нылӧн умӧль керӧммезныс лоасӧ проститӧмӧсь. Нія лоасӧ ӧтлаын Енлӧн вежа отиркӧт".

¹⁹ Агриппа ӧксу! Енӧжсянь мыччалӧмсӧ ме кывзіси, эг понды пыксьыны.

²⁰ Медодз ме висьтаси Дамаскын да Ерусалимын оліссезлӧ, сэсся Иудея муын оліссезлӧ да мӧдік отирлӧ. Ме нійӧ велӧті бергӧтчыны умӧль керӧммезныс дынісь Енлань. Велӧті асланыс оланӧн мыччавны умӧль керӧммезныс дынісь бергӧтчӧмнысӧ.

²¹ Сы понда иудейес Вежа Керкуас менӧ кутісӧ да мӧдісӧ вийны.

²² Но Еныс ыстіс отсӧтсӧ. Сійӧн ме ӧння лунӧдз сулала да висьтася вылына пукаліссезлӧ да умӧля оліссезлӧ. Ме висьтася дзир Енсянь юӧртіссезлісь да Моисейлісь одзланьсяыс йылісь висьталӧмнысӧ.

²³ Ме висьтася: Кристос-Мездӧтісьыслӧ коліс пессьӧмӧн-мырсьӧмӧн кувны да медодззалӧ ловзьыны, медбы юӧртны югытсӧ иудей отирлӧ да мӧдік йӧзлӧ».

²⁴ Сідз Павелыс дорйис асьсӧ. Сэк Фестыс горӧн висьталіс: «Павел, тэ бӧбсорӧн баитан! Уна велӧтчӧмыт тэнӧ бӧбмытӧдз вайӧтӧ».

²⁵ Павелыс висьталіс: «Фест, вылына пуксьӧтӧм юралісь, абу сідз. Ме ог баит бӧбсорӧн. Ме бур мывкыдӧн висьтала быльсӧ.

²⁶ Ӧксуыс эта йылісь бура тӧдӧ, сійӧн ме повтӧг баита сы одзын. Ме юрам ог пырт, медбы сы шогья эстісь мыйкӧ вӧлі сайӧвтӧм. Эта быдӧс эд эз керсьы дзебсисьӧмӧн.

²⁷ Агриппа ӧксу, Енсянь юӧртіссеслӧ веритан? Веритан эд, тӧда».

²⁸ Агриппа ӧксуыс Павелыслӧ висьталіс: «Перыта тэ менӧ мӧдан керны Кристослӧ веритісьнас!»

²⁹ Павел висьталіс: «Перыта, жагӧна я, но ме Енлісь кора: тэ да и быдӧнныс менӧ кывзіссес ась лоӧны ме кодьӧсь, но этна домӧттэзтӧг».

³⁰ Павелыс баитӧм бӧрын ӧксуыс, юралісьыс, Вереникаыс да ныкӧт пукаліссес чеччисӧ.

³¹ Нія сэтісь муныштісӧ да пондісӧ баитны ӧтамӧдныскӧт. Нія висьталісӧ: «Эта мортыс эз кер умӧльсӧ, медбы сійӧ вийны али видзны домӧттэзас».

³² Агриппаыс висьталіс Фестыслӧ: «Мортсӧ туйис бы и лэдзны, эз бы сія корсьы Римӧ ӧксу суд вылӧ дак».