Ап. керӧммез 24 - Бур Юӧр 2019

¹ Вит лун бӧрті бӧрйӧм пӧриссескӧт локтіс Ананий аркирей. Ныкӧт локтіс Тертул нима судын уджалісь. Нія юралісьыслӧ висьталісӧ, мый понда лэбтісисӧ Павел вылӧ.

² Сэтчӧ корисӧ Павелсӧ. Сэк Тертулыс пондіс висьтавлыны Павелыс вылӧ:

³ «Пыр и быдлаын мийӧ бурнас касьтылам тэнӧ, Феликс, вылына пуктӧм юралісь. Мийӧ тӧдам: лӧньыс да бура олӧмыс миянлӧ локтӧ тэсянь. Тэ уна керин эта отирлӧ бур олан понда.

⁴ Мийӧ огӧ дыр падмӧтӧ. Огӧ уна висьталӧ. Кора тэнӧ: кывзы небыт сьӧлӧмӧн.

⁵ Мийӧ адззам: эта мортыс лёк керись. Сія му пасьта олісь иудейез коласын гудыртӧ. Ачыс сія Назаретісь велӧтӧм дор сулаліссез вылын юралісь.

⁶ Сія мӧдіс нельки Вежа Керкусӧ сэрпӧсьтны. Мийӧ сійӧ кутім. Мӧдім сыкӧт бӧрйисьны миян Туйдӧт сьӧрті.

⁷ Но сэтчӧ локтіс сюрсӧн веськӧтлісь Лисий. Сія ыджыт вынӧн мырддис мортсӧ миян киэзісь да ыстіс тэ дынӧ.

⁸ Тшӧктіс и миянлӧ локны тэ дынӧ. Эта морт йылісь висьталӧмнымӧс тэ быдӧс верман тӧдмавны ассяняс».

⁹ Иудейес быдӧнныс шуисӧ, сідз пӧ и вӧлі.

Павеллӧн асьсӧ дорйӧм

¹⁰ Юралісьыс тшӧктіс Павелсӧ баитны. Павелыс висьталіс: «Ме тӧда: тэ уна во сьӧрна веськыта бӧрйисян эта отиркӧт. Сійӧн меным ачымӧс дорйыны кокнитжык.

¹¹ Чулаліс даскык лун Ерусалимӧ локтӧмӧ бӧрсянь. Ме локті копыртчыны Енлӧ. Тэ эта йылісь верман ачыт тӧдмавны.

¹² Вежаинын, синагогаэзын, карын я, нія менчим етшасьӧмӧс отиркӧт эзӧ адззылӧ. Сідз и отир коласын гудыртӧмӧс эзӧ адззылӧ.

¹³ Ме вылӧ нылӧн висьталӧмныс весись баитӧм. Сійӧн нія и озӧ вермӧ вынсьӧтны висьталӧмнысӧ, мыччавны, кыдз да мый вӧлі.

¹⁴ Велӧтӧмыс йылісь тэныт веськыта висьтала. Нія велӧтӧмсӧ шуӧны, абу пӧ сія Енсянь. А ме былись кысъяла миян айезлӧн Енлӧ. Моисейлӧн Туйдӧтын да Енсянь юӧртіссезлӧн гижӧттэзын быдӧс гижӧмлӧ верита.

¹⁵ Ме надейтча Еныс вылӧ да видзчися сійӧ кадсӧ, кӧр Сія ловзьӧтас быдӧс отирсӧ: веськыта оліссесӧ и Ентӧг оліссесӧ. Ме вылӧ умӧльсӧ висьтавліссес асьныс сійӧ кадсӧ видзчисьӧны.

¹⁶ Сійӧн Ен да отир одзын ме пыр вынсьӧтча овны сӧстӧм сьӧлӧмӧн.

¹⁷ Уна во бӧрті ме локті Ерусалимӧ, медбы отирӧлӧ сетны ыстӧм отсӧт да Енлӧ вайны езъялан козин.

¹⁸ Вежа Керкуас ме вӧлі Туйдӧт сьӧрті сӧстӧммӧм бӧрын. Сэтӧн ме вӧлі ӧтнам, и гӧгӧр вӧлі лӧнь.

¹⁹ Сэк менӧ адззылісӧ Асияись локтӧм иудейез. Нылӧ бы ӧні колӧ сулавны тэ одзын. Эм кӧ нылӧн мыйкӧ ме вылӧ висьтавны, ась бы висьталісӧ.

²⁰ Вермасӧ висьтавны и этна. Ме сулалі иудейезлӧн Судитан чукӧр одзын. Адззисӧ разь нія ме сайын кытшӧмкӧ умӧль керӧм?

²¹ Вермасӧ висьтавны ме вылӧ дзир ӧтікӧ. Сійӧ ме горӧн висьталі ны коласын сулавтӧн: "Тійӧ талун менӧ судитат кулӧммезісь ловзьӧмӧ веритӧм понда!"».

²² Феликсыс бура тӧдіс Дӧсвидзисьлӧн Туй йылісь велӧтӧмсӧ. Быдӧс кывзӧм бӧрын сія Павелкӧт бӧрйисьӧмсӧ падмӧтіс да висьталіс: «Локтас Лисий сюрсӧн веськӧтлісь, сэк вӧлись висьтала ассим кылӧс».

²³ Сэсся Феликсыс тшӧктіс сё воинӧн веськӧтлісьӧс видзӧтны Павелыс сьӧрын, но дзескӧтлытӧг. Сія лэдзис Павеллісь ёрттэсӧ вовлыны сы дынӧ да отсасьны.

²⁴ Кынымкӧ лун бӧрті Феликсыс локтіс сэтчӧ аслас Друзилла инькӧт. Друзиллаыс вӧлі иудей увтырись. Феликсыс тшӧктіс вайӧтны Павелсӧ. Сія кывзіс Кристос Исуслӧ веритӧм йылісь висьтасьӧмсӧ.

²⁵ Павелыс баитіс Ен сьӧрті веськыта олӧм йылісь, мортлӧн видзсьыны кужӧм йылісь да локтан суд йылісь. Кылӧмсяняс Феликссӧ полӧм кутіс. Сія висьталіс: «Ӧні мун. Лоас кӧ менам кад, ме тэнӧ кора».

²⁶ Ачыс эд видзчисис: Павелыс пӧ сетас сьӧм, медбы лэдзи сійӧ. Сійӧн унаись корлывліс да сёрнитліс сыкӧт.

²⁷ Чулаліс кык во. Феликсыс туйӧ сувтіс Порций Фест. Мунӧм одзас Феликсыс Павелсӧ колис пукавны. Сідз керис, медбы керны иудейезлӧ сьӧлӧмви.