Ап. керӧммез 23 - Бур Юӧр 2019

¹ Павелыс видзӧтӧв-керис Судитан чукӧр вылӧ да висьталіс: «Воннэз! Ме Ен одзын ӧння лунӧдз олі сӧстӧм сьӧлӧмӧн».

² Ананий нима аркирей тшӧктіс Павелкӧт ордчӧн сулаліссесӧ сӧтны сылӧ ӧм кузяс.

³ Сэк Павелыс висьталіс сылӧ: «Тэ чочком сёйӧн мавтӧм стена! Еныс тэнӧ пондас вартлыны! Тэ пукалан отиркӧт бӧрйисьны Туйдӧт сьӧрті. Ачыт Туйдӧт вылас видзӧттӧг тшӧктан менӧ вартлыны».

⁴ Сэтӧн сулаліссес висьталісӧ: «Енлісь аркирейсӧ видан?»

⁵ Павелыс шуис: «Сія аркирей? Воннэзӧ, ме сы йылісь эг тӧд. Гижӧм тай: "Аслат отир вылын юралісь йылісь умӧльсӧ эн баит"».

⁶ Павелыс казяліс: ӧксьӧммес ӧт джыныс вӧлісӧ садукейез, мӧд джыныс ─ фарисейез. Сэк сія горӧн висьталіс: «Воннэзӧ! Ме фарисей, фарисейлӧн зон. Менӧ судитӧны кулӧммезісь ловзьӧмӧ веритӧм понда».

⁷ Павеллӧн сідз висьталӧм бӧрын садукейес да фарисейес лэбтісисӧ ӧтамӧдныскӧт етшасьны, и ӧксьӧммес янсӧтчисӧ кык торйӧ.

⁸ Садукейес эд шуӧны: абу пӧ ловзьӧмыс, абу ангеллэс, абу ловвес. А фарисейес этаӧ быдӧсӧ веритӧны.

⁹ Лэбтісис ванзӧм-горӧтлӧм. Сэк фарисейез ладорись чеччисӧ Туйдӧтӧ велӧтіссез да пондісӧ вермасьӧмӧн баитны: «Эта мортісь умӧльсӧ мийӧ огӧ адззӧ. Поди, сылӧ былись ангел али лов баитіс. Огӧ пондӧ сувтны Еныслӧ паныт».

¹⁰ Вермасьӧмныс-горӧтлӧмныс содіс. Сюрс воинӧн веськӧтлісьыс повзис, Павелсӧ вермасӧ летны. Сэк воиннэсӧ тшӧктіс Павелсӧ петкӧтны ны коласісь да нуӧтны сайӧвтчанінас.

¹¹ Локтан ойас Дӧсвидзисьыс мыччасис Павелыслӧ. Сія висьталіс: «Павел! Эн пов! Ме йылісь тэ висьтасин Ерусалимын. Сідз пондан висьтасьны и Римын».

Павелӧс вийны баитчӧм

¹² Асывнас иудейес баитчӧмась Павелсӧ вийны. Нія сетӧмась кыв: огӧ пӧ пондӧ сёйны да юны сійӧ вийтӧдз.

¹³ Кывсӧ сетіссес вӧлӧмась нёльдасся унажык.

¹⁴ Нія локтӧмась аркирейез да бӧрйӧм пӧриссез дынӧ. Нылӧ висьталӧмась: «Кыв сетӧм пыр мийӧ висьталім: огӧ пондӧ сёйны Павелсӧ вийтӧдз.

¹⁵ Тійӧ талун сюрс воинӧн веськӧтлісьлӧ юӧртӧ, тійӧ пӧ мӧдат унажык тӧдны Павелыс йылісь. Ашын тшӧктӧ сійӧ петкӧтны. Тіян дынӧ вайӧттӧдз мийӧ мӧдам сійӧ вийны».

¹⁶ Эта баитчӧм йылісь кылӧм Павел сойлӧн зоныс. Сія локтіс да пырис сайӧвтчанінас. Кылӧмсӧ висьтасис Павелыслӧ.

¹⁷ Сэк Павел корис дынас сё воинӧн веськӧтлісьӧс да шуис: «Нуӧт зонкасӧ сюрсӧн веськӧтлісь дынӧ да висьтав, сія пӧ мӧдӧ мыйкӧ юӧртны».

¹⁸ Сёӧн веськӧтлісьыс зонкасӧ нуӧтіс сюрсӧн веськӧтлісь дынӧ. Сэсся висьталіс: «Пуксьӧтӧм Павелыс корис менӧ дынас. Сія корис этӧ зонкасӧ вайӧтны тэ дынӧ. Тэныт зонкаыс мӧдӧ мыйкӧ висьтавны».

¹⁹ Сюрсӧн веськӧтлісьыс зонкасӧ кутіс киӧттяс да нуӧтыштіс мӧдӧрӧ. Сія юаліс: «Мый тэ мӧдан меным висьтавны?»

²⁰ Мӧдыс висьталіс: «Иудейес баитчисӧ: тэнӧ мӧдӧны корны Павелсӧ петкӧтны Судитан чукӧр одзӧ. Нія жыв пӧ унажык мӧдӧны тӧдны сы йылісь.

²¹ Тэ нійӧ эн кывзы. Нёльдасся унажык морт видзчисьӧны сійӧ. Нія сетӧмась кыв: Павелсӧ вийтӧдз нія озӧ пӧ пондӧ сёйны да юны. Нія лӧсьӧтчисӧ ни. Ӧні видзчисьӧны тэнчит тшӧктӧмтӧ».

²² Сюрсӧн веськӧтлісьыс зонкасӧ иньдіс да ӧліс: «Некинлӧ эн баит меным висьтасьӧмыт йылісь».

Павелӧс Кесарияӧ ыстӧм

²³ Сюрсӧн веськӧтлісьыс дынас корис сёӧн веськӧтліссесӧ кыкӧс. Нылӧ тшӧктіс лӧсьӧтны подӧна воиннэсӧ кыксёӧ, верзьӧмаэсӧ ─ сизимдасӧ, шы новйӧтіссесӧ ─ кыксёӧ. Ӧкмыс часӧ рытнас нылӧ колӧ пӧ мунны Кесарияӧ.

²⁴ Павелыслӧ тшӧктіс лӧсьӧтны вӧввез. Сылӧ буржык мунны верзьӧмӧн, медбы сыкӧт нем умӧльыс эз ло. Сійӧ колӧ вайӧтны Феликс юралісь дынӧ.

²⁵ Феликсыслӧ гижис сэтшӧм гижӧт:

²⁶ «Гижӧ Клавдий Лисий. Бур олан тэныт, Феликс, вылына лэбтӧм юралісь.

²⁷ Этӧ мортсӧ иудейес кутісӧ да мӧдісӧ вийны. Ме воиннэзӧкӧт локті да мырдди сійӧ. Сія эд Римлӧн морт.

²⁸ Сійӧ вайӧті иудейезлӧн Судитан чукӧр одзӧ. Ме мӧді тӧдны, мый понда сы вылӧ лэбтісисӧ.

²⁹ Ме вежӧрті: сы вылӧ нія лэбтісьӧмась Туйдӧтныс понда етшасьӧмсянь. Ме умӧльсӧ сы сайын эг адззы. Нем понда сійӧ пуксьӧтны али вийны.

³⁰ Меным кывсис, иудейес пӧ лӧсьӧтчӧмась мортсӧ вийны. Сійӧн ме эг понды падмӧтчыны, ысті сійӧ тэ дынӧ. Сы вылӧ баитіссесӧ тшӧкті норасьны тэ одзын. Ов шогтӧг!»

³¹ Тшӧктӧм сьӧрті воиннэс босьтісӧ Павелсӧ да ойнас нуӧтісӧ Антипатридаӧ.

³² Мӧд лунас Павелсӧ ыстісӧ верзьӧмаэскӧт. Мӧддэс бертісӧ сайӧвтчанінас.

³³ Нія локтісӧ Кесарияӧ. Феликсыслӧ сетісӧ гижӧтсӧ. Сы одзӧ сувтӧтісӧ и Павелсӧ.

³⁴ Юралісьыс лыддьӧтіс гижӧтсӧ. Сія юаліс Павеллісь чужанінсӧ. Мӧдыс висьталіс: «Ме Киликияись». Юралісьыс шуис:

³⁵ «Ме кывза тэнӧ, кӧр локтасӧ тэ вылӧ висьтавліссес». Павелсӧ тшӧктіс йӧртны Иродлӧн керкуӧ да видзӧтны сы сьӧрын.