Ап. керӧммез 20 - Бур Юӧр 2019

¹ Отирыс лӧньсисӧ. Сэк Павелыс ӧктіс велӧтчиссесӧ да нійӧ вынсьӧтіс. Ныкӧт кольласьӧм бӧрын петіс да муніс Македония муӧ.

² Нія муэзӧт мунӧм коста Павелыс уна велӧтіс-вынсьӧтіс веритіссесӧ. Сэтчинсянь локтіс Грецияӧ.

³ Сэтӧн оліс куим тӧлісь. Сія лӧсьӧтчис уйны Сирияӧ, но сылӧ висьталісӧ, иудейес пӧ сійӧ мӧдӧны вийны. Сэк сія шуис бертны Македонияӧт.

⁴ Асияӧ сыкӧт мунісӧ Верияись Пирлӧн Сосипатр зоныс, Фессалоникаись Аристарк да Секунд, Дервияись Гай, Тимофей да Асияись Тихик Трофимкӧт.

⁵ Нія мунісӧ одзжык да видзчисисӧ миянӧс Троадаын.

⁶ Шӧмтӧм нянь сёян луннэз бӧрын мийӧ Филип карсис уйим. Вит лун бӧрті мийӧ локтім Троадаӧ. Сэтӧн мийӧ олім сизим лун.

Евтикӧс ловзьӧтӧм

⁷ Неделяын медодзза лунӧ велӧтчиссес ӧксисӧ нянь чеглалӧм понда. Павелыс баитіс ныкӧт. Сёрнитӧмныс кыссис ойшӧрӧдз, мӧд лунас Павелыс лӧсьӧтчис мунны да.

⁸ Кытӧн мийӧ вӧлімӧ, сэтӧн сотчис уна би, а ӧксимӧ мийӧ медвылісь жырас

⁹ куимсувда керкуын. Ӧшын вылас пукаліс Евтик нима том морт. Павелыслӧн сёрнитӧмыс кыссис дырӧдз, сійӧн зонкаыс ланьтӧм кыз онӧн да узикас усис улӧ. Му вывсис сійӧ лэбтісӧ кулӧмӧс.

¹⁰ Павелыс лэдзчис, водіс Евтикыс вылӧ да зэлӧтіс бердас. Сыбӧрын висьталіс: «Эд тӧждісьӧ, сылӧн лолыс пытшкас».

¹¹ Павелыс бӧр кайис жырас, чегӧтіс нянь да сёйис. Сія баитіс югдандорӧдззас, сэсся муніс.

¹² Быдӧнныс ӧддьӧн гажмисӧ, нія эд зонкасӧ вайӧтісӧ гортас ловьяӧс.

¹³ Мийӧ мунім одзлань. Пуксим корабль вылӧ да уйим Ассӧ. Сэтчинісь миянлӧ коліс босьтны Павелсӧ, кыдз сія тшӧктіс. Ачыс лӧсьӧтчис Ассас локны подӧн.

Троадаись Милитӧдз туй

¹⁴ Ассас мийӧ Павелыскӧт пантасим. Сійӧ босьтім да локтім Митилинаӧ.

¹⁵ Сэтісь мунӧм бӧрын мӧд лунас сувтчим Киос му весьтын. Куимӧт лунас сувтчим Самосын. Трогилияӧ вовлӧм бӧрын мӧд лунас локтім Милитӧ.

¹⁶ Павелыс Ефесас сувтчыны эз тшӧкты, Учӧт Азияас эз мӧд падмӧтчыны да. Сія тэрмасис Ерусалимӧ. Петас кӧ, мӧдіс шедны Витдаслун вежалун вылӧ.

Павел Ефес вичкуись веськӧтліссезкӧт

¹⁷ Милитсяняс Павелыс ыстіс Ефесӧ юӧр, корис локны вичкуись веськӧтліссесӧ.

¹⁸ Ефесісь локтӧммеслӧ Павелыс висьталіс: «Тійӧ тӧдат: Асияас локтӧм лунсянь ме пыр вӧлі тіянкӧт.

¹⁹ Ме рам мывкыдӧн, уна синва кисьтӧмӧн уджалі-кысъялі Дӧсвидзисьыслӧ. Меным эд ковсис ёна пессьыны-мырсьыны иудейезсянь лёк керӧмныс кузя.

²⁰ Ме тіянӧс велӧті отир коласын да горттэзаныт. Коланасӧ висьтавтӧг нем эг коль.

²¹ Иудейесӧ да мӧдік отирсӧ тшӧкті бергӧтчыны Енлань да веритны миян Дӧсвидзись Кристос Исуслӧ.

²² Ӧні ме кера Вежа Лов тшӧктӧм сьӧрті, муна Ерусалимӧ. Ог тӧд, мый менӧ сэтчин видзчисьӧ.

²³ Вежа Лолыс тай быд карын висьталӧ: пуксьӧтӧм да пессьӧм-мырсьӧм пӧ видзчисьӧ менӧ.

²⁴ Ме эд нем вылӧ ог видзӧт, ог видзсьы оланӧ бердӧ. Дзир гаж сьӧлӧмӧн бы медбӧрӧдз мунны олан туйӧс да ештӧтны Дӧсвидзись Исуссянь босьтӧм уджӧс: висьтасьны Енлӧн бурсетӧм йылісь Бур Юӧрсӧ.

²⁵ Тіян дынын олӧмӧ коста ме висьтаси Енлӧн Юралӧм йылісь. А ӧні ме тӧда: тійӧ сэсся одӧ ни адззылӧ менӧ.

²⁶ Сійӧн талуння лунӧ тіянлӧ висьтала, кыдз эм: тіян коласісь кинкӧ ӧшас кӧ туй вывсис, сія абу ме кузя, менам сьӧлӧмӧ сӧстӧм.

²⁷ Ме эд тіянлӧ висьталі быдӧс, мый Еныслӧ колӧ.

²⁸ Сідзкӧ, видзсьӧ асьныт да баляэз сьӧрын видзӧтіссез моз тӧждісьӧ веритіссес понда. Вежа Лолыс эд сувтӧтіс тіянӧс видзӧтны веритіссес сьӧрын ─ Дӧсвидзись Енлӧн вичку сьӧрын, кӧда понда Сія вештісис Аслас вирӧн.

²⁹ Ме тӧда: менам мунӧм бӧрын тіян дынӧ пырасӧ лёк кӧиннэз, кӧдна чукӧрнытӧ озӧ жалейтӧ.

³⁰ И ас колассиныт мукӧдыс лэбтісясӧ. Нія пондасӧ баитны бӧбӧтӧмӧн, медбы сьӧраныс кыскыны велӧтчиссесӧ.

³¹ Сідзкӧ, лоӧ лӧсьӧтчӧмӧсь да эд вунӧтӧ, кыдз ме куим во сьӧрна ой и лун синва пыр дугдывтӧг велӧті тіян коласісь быдӧннытӧ.

³² Ӧні ме сета тіянӧс Ен киэзӧ да Енсянь бурсетӧм Кылыслӧ. Сія Кылыс тіянӧс вермас буржыка велӧтны. Быдӧс вежа отиркӧт ӧтлаын и тіянлӧ сетас кӧсйӧмсӧ.

³³ Зарни, эзысь, паськӧм меным тіянсянь эз ков.

³⁴ Асьныт тӧдат: аслым да мекӧт ветлӧтіссезлӧ быд колана торсӧ ме шедті аслам киэзӧн.

³⁵ Быдӧсын ме тіянлӧ мыччалі, кыдз колӧ уджавны да отсавны вынтӧммеслӧ. Тӧдвыланыт видзӧ Дӧсвидзись Исуслісь кыввесӧ. Сія эд Ачыс висьталіс: сетавны босьтӧмысся буржык».

³⁶ Сідз висьталӧм бӧрын нія ӧтлаын сувтісӧ пидзӧс вылӧ да кеймисӧ.

³⁷ Сэк быдӧнныс ӧддьӧн горзісӧ, Павеллӧ голя бердас кутчисьӧмӧн окалісӧ сійӧ.

³⁸ Нія ӧддьӧн тӧждісӧ сылӧн висьталӧм кыввезсянь: озӧ ни пӧ сэсся адззисьлӧ сыкӧт. Сійӧ кольлалісӧ корабльыс дынӧдз.