Ап. керӧммез 18 - Бур Юӧр 2019

¹ Афинсис мунӧм бӧрын Павел локтіс Коринфӧ.

² Сэтчин сія пантасис Акил нима иудейкӧт и сылӧн Прискилла инькӧт. Акилыс шогмылӧм Понтын. Абу чулалӧм уна кад, кыдз нія локтӧмась Италияись. Нылӧ сэтчинісь ковсьӧм петны, мыля Клавдий ӧксуыс иудейесӧ Римсис тшӧктӧм мунны. Павелыс локтіс ны ордӧ.

³ Сылӧн ныкӧт вӧлі ӧткодь удж ─ керны палаткаэз. Сійӧн Павелыс кольччис ны ордын да ӧтлаын ныкӧт уджаліс.

⁴ Быд шоччисян лунӧ сія баитіс синагогаын, вынсьӧтчис вежӧртӧтны иудейесӧ да греккесӧ.

⁵ Сэтчӧ Македонияись локтісӧ Сила да Тимофей. Сэк Павелсӧ Вежа Лов ӧзйӧтіс висьтасьны иудейеслӧ: Исусыс и эм Кристос-Мездӧтісьыс.

⁶ Нія Павелыс вылӧ лэбтісисӧ, пондісӧ сійӧ видны. Сэк Павелыс ассис паськӧмсӧ пыркӧтіс да висьталіс нылӧ: «Тіянӧс Еныс мыжьяс кӧ, тійӧ сійӧ асьныт бӧрйит. А менам сьӧлӧмӧ сӧстӧм. Ӧнісянь ме муна мӧдік отир дынӧ».

⁷ Павелыс сэтісь муніс да локтіс Енсис полісь Иуст нима морт ордӧ. Сылӧн керкуыс сулаліс ордчӧн синагогакӧт.

⁸ Синагогаын веськӧтлісь Крисп гортіссескӧт пондіс веритны. Павелсӧ кылӧм бӧрын и Коринфсис уна отир пондісӧ веритны да пыртчисӧ.

⁹ Дӧсвидзисьыс ойнас мыччалӧм пыр висьталіс Павеллӧ: «Баит повтӧг, дугдывтӧг.

¹⁰ Ме тэкӧт. Тэныт некин оз кер умӧльсӧ. Эта карын Менам отирӧ уна».

¹¹ Павелыс сэтӧн оліс во да квать тӧлісь сьӧрна. Сія велӧтіс отирсӧ да висьтасис Енлісь Кывсӧ.

¹² Акаияас Римсянь сувтӧтӧм юралісьнас вӧлі Галлион. Сэк иудейес ӧтлаасисӧ да Павелсӧ кутісӧ. Вайӧтісӧ сійӧ Галлионыс дынӧ суд вылӧ.

¹³ Нія висьталісӧ: «Енлӧ юрбитны велӧтӧмыс сылӧн абу Туйдӧтным сьӧрті».

¹⁴ Павелыс мӧдіс баитны. Но Галлионыс висьталіс иудейеслӧ: «Иудейез! Керис кӧбы сія тіянлӧ мыйкӧ умӧльӧ, лёкӧ я, сэк ме верми бы тіянӧс кывзыны.

¹⁵ Но тіян бӧрйисьӧмныт мунӧ велӧтӧмныт, ниммезныт да Туйдӧтныт йылісь. Ме сэтӧн ог понды бӧрйисьны. Асьныт видзӧтӧ».

¹⁶ Галлионыс нійӧ судсис вашӧтіс.

¹⁷ Сэк греккес кутісӧ синагогаын веськӧтлісь Сосфенсӧ да вартлісӧ сійӧ судыс одзын. Галлионыс ны вылӧ и дзар эз кер.

Павел бертӧ Антиокияӧ

¹⁸ Павелыс сыбӧрын уна лун сьӧрна оліс Коринфас. Сэсся воннэскӧт кольласис да уйис Сирияӧ. Сыкӧт тшӧтш уйисӧ Акил да Прискилла. Кенкреяын Павелыс шырис юрсисӧ Ен одзын кыв сетлӧм сьӧрті.

¹⁹ Ефесӧ локтӧм бӧрын Павелыс нійӧ сэтӧн колис. А ачыс пырис синагогаӧ да сёрнитіс иудейескӧт.

²⁰ Нія корисӧ сійӧ ны дынын олыштны дыржык, но сія эз кольччы.

²¹ Ныкӧт кольласьӧм коста Павелыс висьталіс: «Меным ӧддьӧн колӧ локтан вежалунсӧ чулӧтны Ерусалимын. Енлӧ кӧ колас, ме тіян дынӧ берта». Сія Ефессис муніс, а Акилыс да Прискиллаыс кольччисӧ сэтӧн.

²² Павелыс локтіс Кесария карӧ, сэсся иньдӧтчис Ерусалимӧ. Веритіссескӧт адззисьлӧм бӧрын муніс Антиокия карӧ.

²³ Сэтӧн мымдакӧ олӧм бӧрын кытшӧвтіс Галатия да Фригия муэсӧ да вынсьӧтіс сэтчинісь велӧтчиссесӧ.

Ефесын да Коринфын Аполлослӧн юӧртӧм

²⁴ Аполлос нима иудей локтіс Ефесӧ. Чужан гортнас сія вӧлӧм Александрияись. Сія бура тӧдіс Вежа Гижӧттэсӧ, кужис баитны.

²⁵ Аполлосыс вӧлі велӧтӧм Дӧсвидзисьлӧн Туй сьӧрті. Сія ловсӧ пуктіс висьтасьны Дӧсвидзисьыс йылісь, баитіс да велӧтіс бура, а пыртӧмсӧ тӧдіс дзир Иоанлісь.

²⁶ Сія повтӧг пондіс баитны синагогаын. Акилыс Прискилаыскӧт кылісӧ сылісь баитӧмсӧ. Нія корисӧ сійӧ гортаныс да буржыка велӧтісӧ, вежӧртӧтісӧ Дӧсвидзисьлісь Туйсӧ.

²⁷ Аполлосыс лӧсьӧтчис мунны Акаия муӧ. Сэк воннэс гижисӧ сэтчинісь велӧтчиссеслӧ, медбы сійӧ босьтісӧ дынаныс. Сэтчин локтӧм бӧрын Аполлосыс Енлӧн бурсетӧмсянь уна отсаліс веритіссеслӧ.

²⁸ Отирыс одзын сія ёна вермасис иудейескӧт: Вежа Гижӧттэз сьӧрті осьтіс-вежӧртӧтіс Исусыс йылісь, Сія пӧ и эм кӧсйӧм Кристос-Мездӧтісьыс.