Ап. керӧммез 17 - Бур Юӧр 2019

¹ Амфиполь да Аполония каррезӧт мунӧм бӧрын нія локтісӧ Фессалоникаӧ. Сэтӧн иудейезлӧн вӧлі синагога.

² Павел одззамоз пырис синагогаас. Куим шоччисян лун сьӧрна сія отирыслӧ баитіс Вежа Гижӧттэз сьӧрті.

³ Сэтісь осьтіс-вежӧртӧтіс: «Кристосыслӧ коліс пессьӧмӧн-мырсьӧмӧн кувны да ловзьыны. Сія Исусыс и эм Кристос-Мездӧтісьыс, кӧда йылісь ме тіянлӧ висьтася».

⁴ Отирыс коласісь мукӧдыс пондісӧ веритны да ӧтлаасисӧ Павелкӧт да Силакӧт. Ны коласын унаӧн вӧлісӧ грек кыв вылын баитіссез. Унакодь вӧлісӧ и вылына пуктӧм инькаэз.

⁵ Но мукӧд иудейес эзӧ веритӧ да ӧддьӧн лӧгасисӧ. Нія босьтісӧ ӧксянінсис умӧль морттэзӧс да карсис отирсӧ ызйӧтісӧ лэбтісьны апостоллэс вылӧ. Чукӧртчӧммес локтісӧ Ясон керку дынӧ. Нія мӧдісӧ Павелсӧ да Силасӧ петкӧтны отирыс дынӧ,

⁶ но нійӧ эзӧ адззӧ. Сэк Ясонсӧ кынымкӧ веритіськӧт нуӧтісӧ карын юраліссез дынӧ. Отирыс горӧтлісӧ: «Этна быдлаын зык лэбтіссес и татчӧдз локтісӧ!

⁷ А Ясоныс нійӧ гортас лэдзис. Рим ӧксулӧн тшӧктӧммезлӧ нія паныт сувтӧны. Ӧксунас пуктӧны мӧдікӧс, Исусӧс».

⁸ Сідз баитӧмнаныс нійӧ кывзісь отирсӧ да карсис юраліссесӧ тӧждісьӧмӧдз вайӧтісӧ.

⁹ Ясонсӧ да мӧдіккесӧ лэдзисӧ, кӧр нія вештісӧ, мымда коліс.

Павел да Сила Верияын

¹⁰ Воннэз тэрмасьӧмӧн ойнас Павелсӧ да Силасӧ ыстісӧ Верияӧ. Сэтчин нія локтісӧ да пырисӧ иудейезлӧн синагогаӧ.

¹¹ Сэтӧн олісь иудейес вӧлісӧ мывкыдажыкӧсь Фессалоникаын оліссезся. Нія бура кывзісӧ Кывсӧ. Быд лун висьталӧмсӧ видзӧтісӧ Вежа Гижӧттэз сьӧрті, былись я сідз гижӧм.

¹² Вериясис иудейес унаӧн пондісӧ веритны. Уна веритіссез вӧлісӧ и грек кыв вылын баитіссез коласісь: вылына пуктӧм инькаэз да ай отир.

¹³ Фессалоникаас иудейеслӧ кывсьӧм: Павелыс пӧ Верия карас юӧртӧ Ен Кывсӧ. Нія локтісӧ сэтчӧ да ызйӧтісӧ отирсӧ лэбтісьны Павелыс вылӧ.

¹⁴ Сэк веритіссес иньдісӧ Павелсӧ саридз дорӧ. Верияас кольччисӧ Сила да Тимофей.

¹⁵ Кольлаліссес Павелсӧ вайӧтісӧ Афинӧдз да бертісӧ. Силалӧ да Тимофейлӧ нія вайисӧ юӧр: нылӧ пӧ падмӧтчытӧг колӧ локны Павел дынӧ.

Павел Афинын

¹⁶ Афинас Павелыс видзчисис Силасӧ да Тимофейсӧ. Сія карын вӧлісӧ унася-уна киӧн керӧм еннэз. Сысянь Павелыс пондіс тӧждыны, сьӧлӧм вылас лоис сьӧкыт.

¹⁷ Сія быдлаын сёрнитіс отиркӧт. Иудейескӧт да мӧдік отир коласісь Енсӧ тӧдіссезкӧт пантасьліс синагогаын. Пантасьліс и ӧтӧрын ӧксьӧм отиркӧт.

¹⁸ Мукӧдыс Павелыскӧт кутчисьлісӧ етшасьны. Нія вӧлісӧ философфез, «Эпикур» да «Стоик» велӧтӧммез сьӧрті оліссез. Ӧтіккез баитісӧ: «Мый мӧдӧ висьтавны эта абутӧмсӧ баитісьыс?» Мӧдіккез шуисӧ: «Тыдалӧ, сія висьтасьӧ йӧз еннэз йылісь». Павелыс эд нылӧ висьтасис Исусыс йылісь да ловзьӧм йылісь.

¹⁹ Сійӧ вайӧтісӧ Ареопагӧ. Нія юалісӧ: «Позьӧ я миянлӧ тӧдны, кытшӧм виль велӧтӧм тэ висьтасян?

²⁰ Мыйкӧ тэ вӧвлытӧмӧ баитан миянлӧ. Висьтав миянлӧ, мый сія сэтшӧмыс?»

²¹ Афинын оліссес да ны дынӧ мӧдік муэзісь локтӧм отир каднысӧ унажык чулӧтлісӧ ӧтлаӧ ӧксьӧмӧн. Нія ёна радейтісӧ кывзыны мыйкӧ вильӧ.

²² Павелыс сувтіс Ареопаг шӧрӧ да висьталіс: «Афинын оліссез! Быдӧсын ме адзза, тійӧ ӧддьӧн юрбитісь йӧз.

²³ Ме ветлӧтікам видзӧті копрасяніннэзнытӧ да адззи езъяланін, кӧда вылын гижӧм: "Тӧдтӧм Енлӧ". Тійӧ Сійӧ тӧдтӧг пуктат Енӧ. Ме Сы йылісь тіянлӧ и висьтася.

²⁴ Миян гӧгӧрисьсӧ быдӧс аркмӧтіс Еныс. Сія енӧжыслӧн да муыслӧн Дӧсвидзись, Кӧда оз ов киӧн керӧм копрасяніннэзын.

²⁵ Сылӧ оз ков морт киэзӧн отсасьӧмыс, Сылӧн эд быдӧс эм. Сія Ачыс сетӧ быдӧнлӧ олан, лолалӧм да быдӧс коланасӧ.

²⁶ Ӧтік мортсянь Сія аркмӧтіс быдӧс морт увтырсӧ му пасьта олӧм понда. Ачыс сетіс нылӧ, мымда овны да кытӧн овны.

²⁷ Сія быдӧс керис, медбы отирыс кошшисӧ Енсӧ. Поди, кималасӧн моз кошшӧмӧн адззасӧ Сійӧ. Сія эд абу ылын быдӧнным дынсянь.

²⁸ Мийӧ Сыкӧт ӧтлаасьӧмӧн олам, ветлӧтам да лолалам. Тіян коласісь мукӧд кывбур гижиссес висьталісӧ: "Мийӧ быдӧнным Сы увтырись".

²⁹ Сідзкӧ, мийӧ ─ Ен увтырись. Оз ков видзны юрын: Енсӧ пӧ позьӧ керны кужана киэзӧн да морт мывкыдӧн мыйкӧ вылӧ вачкисянаӧ зарниись, эзысись, изісь я.

³⁰ Еныс дыр терпитіс отирыслісь Енсӧ тӧдтӧм олӧмнысӧ. Ӧні Еныс быдлаын да быд мортлӧ тшӧктӧ бергӧтчыны умӧль керӧммезныс дынісь Сыланьӧ.

³¹ Сія сувтӧтіс Судитан Лун, кӧр пондас веськыта бӧрйисьны быдӧс му вылісь отиркӧт. Судитісьӧн лоас Сылӧн сувтӧтӧм Мортыс. Сійӧ Мортсӧ быдӧнныслӧ мыччаліс, кӧр Сійӧ ловзьӧтіс».

³² Кулӧммезісь ловзьӧм йылісь кылікӧ, ӧтіккез пондісӧ серавны. Мӧдіккез висьталісӧ: «Эта йылісь тэнӧ кывзам мӧдпырись».

³³ Сэк Павелыс ны дынісь петіс.

³⁴ Но мукӧдыс локтісӧ Павелыс дынӧ да пондісӧ веритны. Ны коласын вӧлісӧ Ареопагын уджалісь Дионисий да Дамар нима инька.