Ап. керӧммез 15 - Бур Юӧр 2019

¹ Антиокия вичкуӧ кынымкӧ морт локтісӧ Иудея муись. Нія велӧтісӧ: одӧ кӧ лоӧ пӧ вудныштыштӧмӧсь Моисейлӧн Туйдӧт сьӧрті, сэк одӧ вермӧ мезмыны.

² Павел да Варнава сувтісӧ нылӧ паныт, уна вермасисӧ мӧдмоза велӧтӧмныс кузя. Сэк Павелсӧ Варнаваыскӧт да ас колассиныс мукӧдсӧ иньдісӧ Ерусалимӧ. Сэтчин тшӧктісӧ эта йылісь баитны апостоллэзкӧт да вичкуын веськӧтліссезкӧт.

³ Антиокия вичкусис веритіссес нійӧ кольлалісӧ. Финикия да Самария муэзӧт мунтӧн Павел да Варнава висьтасисӧ мӧдік отирлісь Енлань бергӧтчӧмнысӧ. Сія юӧрсянь веритіссес быдӧнныс ёна гажмисӧ.

⁴ Ерусалимӧ локтӧм бӧрын вичкусис апостоллэс, веритіссес да веськӧтліссес бура панталісӧ нійӧ. Локтіссес висьтасисӧ ны пыр Енлісь керӧмсӧ. Нія висьтасисӧ, кыдз мӧдік отирлӧ Еныс осьтіс ыбӧссӧ веритӧмас.

⁵ Сэк лэбтісисӧ мукӧд воннэз, кӧдна вӧлісӧ фарисейез. Нія баитісӧ: мӧдік отир коласісь веритіссесӧ пӧ колӧ вундыштыштны да тшӧктыны овны Моисейлӧн Туйдӧт сьӧрті.

⁶ Апостоллэз да вичкуын веськӧтліссез ӧксисӧ баитны эта йылісь.

⁷ Нія дыркодь баитісӧ. Сэк Петраыс чеччис да висьталіс нылӧ: «Воннэзӧ, тійӧ тӧдат: миян коласісь важынсянь ни Еныс бӧрйис менӧ висьтасьны Бур Юӧрсӧ мӧдік отирлӧ, медбы и нія кылісӧ да пондісӧ веритны.

⁸ Мортлісь сьӧлӧмсӧ тӧдісь Ен козьналіс нылӧ Вежа Ловсӧ миянлӧ моз. Сідз Еныс мыччаліс: мӧдік отирыс Сылӧ туянаӧсь.

⁹ Сія миянӧс ны дынісь немӧн эз янсӧт. Нылісь сьӧлӧммезнысӧ сӧстӧмтіс веритӧмныс пыр.

¹⁰ Мый тійӧ ӧні Енсӧ лӧгӧтлат? Мӧдат велӧтчиссес вылӧ пуктыны сьӧкыт сийӧссӧ. Сійӧ нӧбӧтны айезнымлӧн и миян вынным эз тырмы.

¹¹ Мийӧ эд веритам: Дӧсвидзись Кристос Исуслӧн бурсетӧмсянь мийӧ мезмам. Миян моз и мӧдік отирыс мезмас».

¹² Сэк ӧксьӧммес лӧньсисӧ. Пондісӧ кывзыны Павелсӧ да Варнавасӧ. Нія висьтасисӧ, кытшӧм пассэз да адззывлытӧммез аркмӧтіс Еныс ны пыр мӧдік отир коласын.

¹³ Нія дугдісӧ баитны. Сэсся пондіс баитны Яков. Сія висьталіс: «Воннэз! Кывзӧ менӧ.

¹⁴ Симоныс вежӧртӧтіс: Еныс ӧні медодззаись видзӧтӧм мӧдік отирыс вылӧ, медбы ны коласісь ӧктыны Аслыс отирсӧ.

¹⁵ Енсянь юӧртіссезлӧн кыввезныс сэтшӧмӧсь жӧ. Гижӧм сідз:

¹⁶ ─ Сыбӧрын Ме берта да лэбта Давидлісь усьӧм керкусӧ. Лӧсьӧта сійӧ, сэтісь разьсьӧмсӧ вились кера.

¹⁷ Сэк пондасӧ кошшыны Дӧсвидзисьсӧ и мӧдік отирыс, быдпӧлӧс йӧзыс. Ме нійӧ шуа Аслам отирӧн. Сідз баитӧ быдӧс Аркмӧтісь Дӧсвидзисьыс,

¹⁸ Кӧда висьталіс эта йылісь кӧркӧсянь ни.

¹⁹ Сійӧн ме и баита: оз ков сьӧкытсӧ тэчны быдпӧлӧс отир коласісь Ен дынӧ локтӧммез вылӧ.

²⁰ Нылӧ гижам: Ась озӧ сёйӧ киӧн керӧм еннэзлӧ вайӧмсянь сэрпӧсьмӧм сёян, вирись керӧм сёян да джагалӧм подалісь яй. Ась озӧ лэдзчисьӧ кыскасьны да отирлӧ озӧ керӧ сійӧ, мый аслыныс оз ков.

²¹ Моисейлісь Туйдӧтсӧ висьтасиссес кӧркӧсянь эд эмӧсь быд карын. Быд шоччисян лунӧ сійӧ Туйдӧтсӧ лыддьӧтӧны синагогаэзын».

Воннэзлӧ гижӧт

²² Сэк апостоллэс вичкуын веськӧтліссескӧт да ӧксьӧммескӧт баитчисӧ Антиокия карӧ ыстыны воннэзнысӧ. Нія ас колассиныс бӧрйисӧ Иудаӧс, шуны мӧд нимнас кӧ, Варсаваӧс, да Силаӧс. Воннэз коласын нія вӧлісӧ веськӧтліссез. Нійӧ ыстісӧ ӧтлаын Павелкӧт да Варнавакӧт.

²³ Гижисӧ да иньдісӧ ныкӧт сэтшӧм гижӧт: «Пым юӧр тіянлӧ! Мийӧ ─ апостоллэз, вичкуын веськӧтліссез да веритіссез ─ гижам Антиокияись, Сирияись да Киликияись воннэзлӧ, быд отирись веритіссезлӧ.

²⁴ Мийӧ кылімӧ: миянсянь локтӧммес мукӧдыс асланыс баитӧмӧн тіянӧс ӧштӧтӧмась, тӧждісьӧмӧдз воштӧмась. Нія баитӧмась, быдӧннытлӧ колӧ пӧ керны вундыштыштан пас да овны Моисейлӧн Туйдӧт сьӧрті. Сідз баитны нылӧ мийӧ эгӧ тшӧктӧ.

²⁵ Сэк мийӧ ӧксимӧ да баитчимӧ: бӧрйӧм морттэсӧ ыстім тіян дынӧ ӧтлаын Павел да Варнава дона ёрттэзнымкӧт.

²⁶ Павелыс да Варнаваыс эд ловнысӧ пуктӧны миян Дӧсвидзись Кристос Исус ним понда.

²⁷ Мийӧ ыстім Иудаӧс да Силаӧс. Нія сійӧ жӧ висьталасӧ тіянлӧ асьныс.

²⁸ Вежа Лолыслӧ да и миянлӧ оз ков тіян вылӧ унажык сьӧкытсӧ пуктӧмыс. Дзир эта колана:

²⁹ эд сёйӧ киӧн керӧм еннэзлӧ вайӧмсянь сэрпӧсьмӧм сёян, вирись керӧм сёян да джагалӧм подалісь яй. Видзсьӧ лэдзчисьӧм-кыскасьӧмись. Мӧдіккезлӧ эд керӧ сійӧ, мый аслыныт оз ков. Сідз кӧ пондат керны, бур лоас. Быдӧс бурсӧ тіянлӧ!»

³⁰ Ыстӧммес локтісӧ Антиокия карӧ. Ӧктісӧ веритіссесӧ да сетісӧ гижӧтсӧ.

³¹ Мӧддэс лыддьӧтісӧ да велӧтӧмсяняс гажмисӧ.

³² Иудаыс да Силаыс вӧлісӧ Енсянь юӧртіссез. Нія уна баитісӧ: воннэзнысӧ вынсьӧтісӧ да сьӧлӧммезнысӧ бурмӧтісӧ.

³³ Иудаыс да Силаыс мымдакӧ олыштісӧ сэтӧн. Сэсся веритіссес нійӧ лӧнь олан вылӧ бласлӧвитӧмӧн бӧр ыстісӧ апостоллэз дынӧ.

³⁴ Силалӧ юрас пырис кольччыны сэтчин, а Иуда бертіс Ерусалимӧ.

³⁵ Павел да Варнава олісӧ Антиокия карын. Нія мӧдік веритіссезкӧт унакӧт велӧтісӧ да висьтасисӧ Дӧсвидзисьлісь Кывсӧ.

Павеллӧн Варнавакӧт янсӧтчӧм

³⁶ Чулаліс мымдакӧ кад. Павелыс шуис Варнаваыслӧ: «Мунам каррезӧт, кытӧн висьтасим Дӧсвидзисьлісь Кывсӧ, пантасьлам воннэзнымкӧт да видзӧтам нылісь олансӧ».

³⁷ Варнаваыс сьӧрас мӧдіс босьтны Иоанӧс, шуны мӧд нимнас кӧ, Маркӧс.

³⁸ Сія кӧркӧ янсӧтчис ны дынісь Памфилияын, эз мун ӧтлаын сетӧм удж вылӧ. Сійӧн Павелыс Иоансӧ эз мӧд босьтны сьӧраныс.

³⁹ Сідз Иоаныс кузя Павел да Варнава лӧгасисӧ да янсӧтчисӧ. Варнаваыс босьтіс Марксӧ да сыкӧт уйис Кипрӧ.

⁴⁰ А Павелыс сьӧрас босьтіс Силаӧс. Воннэз сетісӧ Павелсӧ бурсӧ сетан Ен киӧ, и сія Силаыскӧт иньдӧтчис.

⁴¹ Нія мунісӧ Сирия да Киликия муэзӧт. Сэтчин вичкуэзісь веритіссесӧ вынсьӧтісӧ-велӧтісӧ.