Ап. керӧммез 14 - Бур Юӧр 2019

¹ Иконияын Павел Варнавакӧт пырисӧ синагогаӧ да висьтасисӧ Бур Юӧрсӧ. Висьтасьӧмныссянь иудейез да мӧдік отир ӧддьӧн унаӧн пондісӧ веритны.

² Сэтӧн вӧлісӧ иудейез, кӧдна эзӧ веритӧ. Нія ентӧдтӧм йӧзсӧ ызйӧтісӧ лэбтісьны веритіссес вылӧ.

³ Апостоллэс дыркодь вӧлісӧ сэтӧн. Повтӧг висьтасисӧ Дӧсвидзись йылісь. Дӧсвидзисьыс ны пыр аркмӧтіс пассэсӧ да адззывлытӧммесӧ. Сідз Сія вынсьӧтіс висьтасьӧмсӧ Аслас бурсетӧм йылісь.

⁴ Отирыс карас янсӧтчисӧ: ӧтіккез вӧлісӧ иудейез дор, а мӧдіккез ─ апостоллэз дор.

⁵ Иудейес веськӧтліссезныскӧт да мӧдік йӧзкӧт лӧсьӧтчисӧ уськӧтчыны апостоллэс вылӧ. Нійӧ мӧдісӧ умӧльтны да шупкавны иззэзӧн.

⁶ Апостоллэс эта йылісь кылісӧ да сэтісь пышшисӧ. Нія локтісӧ Ликаония муӧ. Сэтчин Листра, Дервия каррезын да сы гӧгӧр муэзын

⁷ висьтасисӧ Бур Юӧрсӧ.

Павел да Варнава Листраын да Дервияын

⁸ Листраас вӧлі коккезнас шогалісь морт. Сія шогмӧмсянь абу вермӧм ветлӧтны.

⁹ Мортыс кывзіс Павеллісь баитӧмсӧ. Павелыс видзӧтӧв-керис сы вылӧ да казяліс: мортыслӧн эм веритӧмыс, медбы веськавны.

¹⁰ Павелыс горӧн висьталіс: «Тэныт шуа: Дӧсвидзись Кристос Исус нимӧн сувт аслат коккез вылӧ». Сія чепӧссис-чеччис да пондіс ветлӧтны.

¹¹ Отирыс адззылісӧ лоӧмсӧ. Нія горӧн пондісӧ баитны ликаония кыв вылын: «Еннэс морттэз моз лэдзчисӧ миян дынӧ».

¹² Варнавасӧ шуисӧ Зевсӧн, а Павелсӧ шуисӧ Ермийӧн сійӧн, мыля сія унажык висьтасис кывсӧ.

¹³ Карӧ пыранінас вӧлӧм Зевс енлӧ юрбитанін. Зевсыслӧ езъялансӧ ваялісьыс сэтчӧ вайӧтӧм пороззэзӧс да вайӧм юркытшшез. Ӧтлаын отиркӧт сія мӧдӧм вайны езъялан козин апостоллэслӧ.

¹⁴ Апостоллэс кылісӧ эта йылісь. Варнава да Павел косялісӧ ассиныс паськӧмнысӧ да уськӧтчисӧ отирыс коласӧ. Апостоллэс горӧтӧмӧн висьталісӧ:

¹⁵ «Мый тійӧ керат? Мийӧ эд тіян кодьӧсь жӧ морттэз. Бур Юӧр мийӧ тіянлӧ висьтасям, медбы тійӧ ковтӧм еннэзныт дынісь бергӧтчитӧ ловья Енлань. Сія аркмӧтіс енӧжсӧ мунас, саридзсӧ да быдӧс ны пытшкисьсӧ.

¹⁶ Сія одзза каддэзӧ олісь отирпӧлӧссӧ быдӧннысӧ лэдзис ветлӧтны асланыс туйезӧт.

¹⁷ Но Еныс эта коста эз дугдыв висьтасьны отирыслӧ Ас йывсис бурсӧ керӧммез пыр: енӧжсянь зэр сетӧмӧн, нянь да карч воӧмӧн, сёянӧн вердӧмӧн да гажнас сьӧлӧммезнымӧс тыртӧмӧн».

¹⁸ Сідз баитӧмнаныс нія ӧдва вермисӧ ӧвны отирсӧ, эзӧ лэдзӧ вайны нылӧ езъялан козинсӧ. Нія быдӧннысӧ тшӧктісӧ мунны горттэзӧ. Павел да Варнава кольччисӧ Листраас да велӧтісӧ отирсӧ.

¹⁹ Апостоллэз повтӧг висьтасисӧ Бур Юӧрсӧ. Сы коста Антиокия да Икония каррезісь локтісӧ иудейез. Нія велӧтісӧ отирсӧ янсӧтчыны апостоллэс дынісь. Иудейес висьталісӧ: «Нылӧн баитӧмыс абу быль, нія бӧбӧтчӧны». Иудейес ызйӧтісӧ отирсӧ лэбтісьны апостоллэс вылӧ. Павелсӧ шупкалісӧ иззэзӧн. Сэсся кыскисӧ кар сайӧ, чайтісӧ кулӧмӧн да.

²⁰ Но кӧр велӧтчиссес ӧксисӧ Павел гӧгӧрӧ, сія чеччис да пырис карас. Мӧд лунас Варнавакӧт сія муніс Дервияӧ.

²¹ И сія карын нія висьтасисӧ Бур Юӧрсӧ. Сэтӧн адззисӧ уна виль велӧтчисьӧс. Сэсся Павел да Варнава бӧра мунісӧ Листра, Икония да Антиокия каррезӧт.

Сирияись Антиокияӧ бертӧм

²² Сэтчинісь веритіссесӧ нія вынсьӧтісӧ, велӧтісӧ нійӧ видзсьыны веритӧмас. Нія висьталісӧ: «Уна пессьӧм-мырсьӧм пыр эд колас мунны, медбы пырны Енлӧн Юраланінӧ».

²³ Быд вичкуын нія сувтӧтісӧ веськӧтліссезӧс. Кӧслуналӧм да кеймӧм бӧрын веритіссес сетісӧ нійӧ Дӧсвидзись киӧ. Сылӧ эд нія и пондісӧ веритны.

²⁴ Сэсся Писидия муӧт мунӧм бӧрын локтісӧ Памфилия муӧ.

²⁵ Пергия карын Бур Юӧрсӧ висьтасьӧм бӧрсянь лэдзчисӧ Атталияӧ.

²⁶ Сэсся бертісӧ Антиокия карӧ. Сэтчинсянь и иньдылӧмась вӧлі нійӧ воннэзныс Еныс отсӧтӧн керны уджсӧ. Ӧні сія уджыс керсис.

²⁷ Сэтчин локтӧм бӧрын ӧктісӧ вичкусӧ. Нія висьтасисӧ быдӧс, мый ны пыр аркмӧтіс Еныс да кыдз мӧдік отирыслӧ осьтіс ыбӧссӧ веритӧмас.

²⁸ Сэтӧн Павел да Варнава дыркодь олісӧ ӧтлаын велӧтчиссескӧт.