Ап. керӧммез 13 - Бур Юӧр 2019

¹ Антиокия вичкуын вӧлісӧ Енсянь юӧртіссез да велӧтіссез: Варнава, Симеон, шуны мӧд нимнас кӧ, Нигер, Киринеяись Луций, Савл да Манаил. Манаилыс Ирод ӧксукӧт вон туйӧ тшӧтш быдмӧм.

² Нія кысъялісӧ Дӧсвидзисьлӧ да кӧслуналісӧ. Сэтӧн нія кылісӧ Вежа Ловлісь тшӧктӧм: «Янсӧтӧ Меным Варнавасӧ Савлыскӧт удж вылӧ, кӧдӧ керны Ме нійӧ кори».

³ Сэк нія ӧтлаын кӧслуналісӧ да кеймисӧ, Варнава да Савл вылӧ пуктылісӧ киэзнысӧ, сэсся иньдісӧ нійӧ туйӧ.

Апостоллэз Кипрын

⁴ Сідз Варнаваыс да Савлыс, Вежа Лолӧн ыстӧммез, локтісӧ Селевкияӧ. Сэтчинсянь иньдӧтчисӧ саридз шӧрись Кипр му вылӧ.

⁵ Нія вовлісӧ Саламинӧ. Сэтӧн висьтасисӧ Енлісь кывсӧ синагогаэзын. Ныкӧт ӧтлаын вӧлі Иоан, кӧда отсасис нылӧ.

⁶ Кипр мусӧ шуч мунӧм бӧрын нія локтісӧ Паф карӧдз. Сэтӧн нія панталісӧ тӧдісьӧс ─ асьсӧ Енсянь юӧртісьӧ пуктісьӧс. Сія вӧлӧм Варисус нима иудей.

⁷ Варисусыс оліс Сергий-Павел дынын. Сергий-Павелыс вӧлі бур мывкыда морт, Кипр муӧн юралісь. Сія корис Варнавасӧ Савлыскӧт гортас. Мӧдіс кывзыны Енлісь Кывсӧ.

⁸ Варисуслӧн грек кыв вылын нимыс вӧлӧм Елима ─ «тӧдісь». Сія апостоллэслӧ паныт сувтіс, мӧдіс падмӧтны юралісьсӧ Енлӧ веритӧмсис.

⁹ Савлыс, мӧдмоз кӧ шуны, Павелыс, Вежа Лолӧн тырӧм видзӧтіс тӧдісьыс вылӧ.

¹⁰ Сія Варисусыслӧ висьталіс: «Кульлӧн зон! Тэись дорӧн петӧ ылӧтлӧм-бӧбӧтлӧмыт, лёк керӧмыт! Тэ быд бурыслӧ паныт сувтан! Кӧр тэ дугдан чуклявны Дӧсвидзисьлісь веськыт туйесӧ?

¹¹ Дӧсвидзисьыс ӧні лэбтіс кисӧ тэ вылӧ. Тэ синтӧмсялан, он понды адззыны шондісӧ кытшӧмкӧ кадӧдз». Сэтӧн са кодь пемытыс лэдзчисис тӧдісьыс вылӧ. Варисусыс ӧтӧрись-мӧдӧрись пондіс кошшыны новйӧтісьӧс.

¹² Быдӧс лоӧмыс вӧлі юралісьыс син одзын. Сійӧ диво кутіс Дӧсвидзисьлӧн велӧтӧмсянь, и сія пондіс веритны.

Павел да Варнава Писидия муын

¹³ Павелыс мӧдіккезкӧт Пафсис уйис Памфилия муись Пергия карӧ. Иоаныс ныкӧт эз мун, а бӧр бертіс Ерусалимӧ.

¹⁴ А мӧддэс Пергиясис мунісӧ Писидия муын Антиокия карӧ. Шоччисян лунӧ пырисӧ синагогаӧ да пуксисӧ.

¹⁵ Сэтӧн сы коста лыддьӧтісӧ Моисейлӧн Туйдӧтісь да Енсянь юӧртіссезлӧн гижӧттэзісь. Сыбӧрын синагогаын веськӧтліссес ыстісӧ юавны нылісь: «Воннэз, эм кӧ тіян отирыслӧ велӧтан-вынсьӧтан кыв, баитӧ».

Павеллӧн юӧртӧм

¹⁶ Павел чеччис, лэбтыштіс кисӧ да висьталіс: «Израиль отир да Енсис поліссез, кывзӧ:

¹⁷ Израильлӧн Еныс бӧрйӧм вӧлі миянлісь айезнымӧс. Миян отирным олӧмась Египет муын. Сэтӧн овтӧн Еныс содтӧм этӧ отирсӧ, сэсся Аслас вына киӧн петкӧтӧм нійӧ сія муись.

¹⁸ Нёльдас во сьӧрна Еныс вердӧм нійӧ кушмуын.

¹⁹ Ханаан мусис Сія орӧтӧм сизим отирпӧлӧс, а нылісь мусӧ янсӧтӧм Израиль отир коласын.

²⁰ Чулалӧм нёльсё витдас во гӧгӧр. Сыбӧрын Еныс сетлӧм нылӧ судитіссезӧс. Сідз вӧлӧм Енсянь юӧртісь Самуилӧдз.

²¹ Сэсся отирыс пондӧм корны ӧксуӧс. Еныс нылӧ сетӧм Саулӧс. Сія мортыс вӧлӧм Вениамин увтырись Кислӧн зон. Сія юралӧм нёльдас во сьӧрна.

²² Еныс Саулсӧ вежӧм, нылӧ сувтӧтӧм Давидӧс. Еныс Давидыс йылісь висьталӧм сідз: "Аслам сьӧлӧм сьӧрті Ме адззи мортӧс, Иессейлісь Давид зонӧс. Сія быдӧс керас сідз, кыдз Меным колӧ".

²³ Аслас кӧсйӧм сьӧрті Давидыс увтырись Еныс сувтӧтіс Израиль отирлӧ Мездӧтісьӧс ─ Исусӧс.

²⁴ Исуслӧн отир одзӧ петтӧдз велӧтіс Иоан. Быд Израиль мортӧс сія тшӧктіс кольны умӧль керӧммезнысӧ да пыртчыны.

²⁵ Сетӧм уджсӧ ештӧтікӧ Иоаныс висьтавліс: "Кин туйӧ тійӧ менӧ пуктат, ме абу сія. Ме абу туяна морт нельки пӧрччавны кӧмкӧт бердсис воньсӧ Ме сьӧрын Локтісьлісь".

²⁶ Воннэзӧ, Авраам увтырись челядь да Енсис поліссез! Тіянлӧ ыстӧм эта мездан юӧрыс.

²⁷ Ерусалимын оліссес веськӧтліссескӧт Сійӧ эзӧ тӧдӧ. Нія Сійӧ судитісӧ. Нылӧн керӧмныс лоис Енсянь юӧртіссезлӧн висьтавлӧм сьӧрті. Нійӧ кыввесӧ мийӧ лыддьӧтам быд шоччисян лунӧ.

²⁸ Нія умӧльсӧ эзӧ адззӧ Сы сайись, медбы Сійӧ позис вийны. Сэк Сійӧ вийны тшӧктісӧ Пилатсӧ.

²⁹ Сы йылісь быдӧс гижӧмсӧ нія керисӧ. Лэдзисӧ Сійӧ пу вывсис да пуктісӧ дзебсянінӧ.

³⁰ Но Еныс Сійӧ ловзьӧтіс.

³¹ Уна лун сьӧрна Сія мыччасьліс Галилеясянь Ерусалимӧ Сыкӧт тшӧтш локтіссезлӧ. Нія ӧні Исусыс йылісь висьтасьӧны Израиль отирлӧ.

³² Мийӧ висьтасям тіянлӧ Бур Юӧр. Миян айезлӧ кӧсйӧмсӧ Еныс сетіс миянлӧ ─ челядьныслӧ. Кӧсйӧмсӧ Сія сетіс Исуссӧ ловзьӧтӧм пыр.

³³ Мӧдік псаломын тай гижӧм: ─ Тэ Менам Зон, Ме талун Тэнӧ чужті.

³⁴ Еныс Исуссӧ ловзьӧтіс. Сідзкӧ, Сія оз ни берт сісьманас. Эта йылісь висьтавлӧм сідз: ─ Мый Ме кӧсйи Давидыслӧ, сійӧ сета тіянлӧ. Кӧсйӧмӧ вежа, оз вежсьы.

³⁵ Вежа Гижӧтас эд мӧдіклаын висьталӧм: ─ Он лэдз Аслат Вежалӧ адззывны сісьмӧмсӧ.

³⁶ Давидыс аслас кадӧ керӧм Ен шуӧм сьӧрті. Сэсся кулӧм. Сійӧ дзебӧмась айез дынӧ. Сылӧн шойыс сісьмис.

³⁷ А Кӧдӧ Еныс ловзьӧтіс, Сылӧн вывтырыс эз сісьмы.

³⁸ Воннэзӧ, тӧдӧ: умӧль керӧммез проститӧм йылісь Еныс тіянлӧ юӧртӧ Исус пыр.

³⁹ Исус отсӧтӧн Сылӧ быд веритісьыс мезмӧ быд умӧль керӧмись. Мезмӧ и ныись, кӧднаись Моисейлӧн Туйдӧтыс эз вермы мездыны. И морт лоӧ Ен сьӧрті веськыта олісьӧн.

⁴⁰ Видзӧтӧ, медбы эз лок тіян вылӧ Енсянь юӧртіссезлӧн висьтавлӧмныс:

⁴¹ ─ Видзӧтӧ, абутӧм туйӧ пуктіссез, дивуйтчӧ да ӧшӧ! Ме кера Ассим уджӧс тіян луннэзӧ. Кылітӧ бы тійӧ кинсянькӧ Менам вына керӧм йылісь, эдӧ бы веритӧ».

Кыв висьталӧм бӧрын

⁴² Синагогаись петӧм коста Павелсӧ да Варнавасӧ корисӧ мӧд шоччисян лунас бӧра баитны эта йылісь.

⁴³ Синагогасис отирыс петісӧ. Иудейес да мӧдік отирись локтӧммес, кӧдна пондӧмась овны Моисейлӧн Туйдӧт сьӧрті, унаӧн мунісӧ Павелкӧт да Варнавакӧт. Апостоллэз баитісӧ ныкӧт. Велӧтісӧ-мывкыдсьӧтісӧ отирсӧ дугдывтӧг видзсьыны Енлӧн бурсетӧм бердӧ.

⁴⁴ Мӧд шоччисян лунас карас оліссес чуть не быдӧнныс ӧксисӧ кывзыны Енлісь кывсӧ.

⁴⁵ Отирсӧ казялікӧ, иудейесӧ завидныс кутіс. Павеллӧн баитӧмлӧ паныт нія лӧгувьяныс уна умӧльсӧ висьтавлісӧ.

⁴⁶ Сэк Павел да Варнава повтӧг висьталісӧ: «Енлісь Кывсӧ медодз коліс юӧртны тіянлӧ. Тійӧ тай миянӧс эдӧ пондӧ кывзыны, пырся оланас пырны асьнытӧ пуктат нетуяна отирӧ. Ӧні мийӧ мунам ентӧдтӧм отир дынӧ.

⁴⁷ Сідз миянӧс тшӧктіс Медвылісьыс: ─ Ме Тэнӧ сувтӧті югдӧтны ентӧдтӧм отирсӧ, медбы Тэ пыр мезмисӧ му пасьта оліссес».

⁴⁸ Ентӧдтӧм отирыс сэтшӧмсӧ кылӧмсянь гажӧтчисӧ. Нія ошкисӧ Дӧсвидзисьлісь Кывсӧ. Веритісӧ быдӧнныс, кӧдналӧ шуӧм пырны пырся оланӧ.

⁴⁹ Дӧсвидзисьлӧн Кылыс сія муын паськаліс.

⁵⁰ Но иудейес ызйӧтісӧ лэбтісьны Павел да Варнава вылӧ Енлӧ юрбитісь бурӧ пуктӧм инькаэсӧ да карсис юраліссесӧ. Нія апостоллэсӧ вашӧтісӧ асланыс муись.

⁵¹ Сэк Павел да Варнава пыркӧтісӧ ны ладорӧ коккезсиныс буссӧ да мунісӧ Иконияӧ.

⁵² А Антиокияас велӧтчиссес тырисӧ Вежа Лолӧн да ёна гажмисӧ.