Ап. керӧммез 1 - Бур Юӧр 2019

Вежа Лов йылісь

^1-2 Дона Феофил, одзза небӧгас ме тэныт гижи, мый Исусыс керис да мыйӧ велӧтіс пондӧтчӧмсянь енӧжӧ кайӧмӧдз. Исусыс лэбтісьӧм одзас Аслас бӧрйӧм апостоллэзлӧ Вежа Лов пыр сетіс тшӧктӧммез.

³ Кулӧм бӧрас Исусыс Аслас велӧтчиссезлӧ унаись мыччасьӧмнас сетіс тӧдны: Сія былись ловзис. Нёльдас лун сьӧрна мыччасьӧммес коста Исусыс висьтасис нылӧ Енлӧн Юралӧм йылісь.

⁴ Апостоллэскӧт ӧтлаын сёйӧм коста Исусыс висьталіс: «Ерусалимсис эд мунӧ. Сэтӧн видзчисьӧ Айӧлісь кӧсйӧмсӧ, кӧда йылісь тійӧ кыліт Месянь.

⁵ Иоаныс тіянӧс пыртіс ваӧн. Лун-мӧд бӧрті тійӧ пыртчатӧ Вежа Лолӧн».

⁶ Сэк ӧксьӧм апостоллэс юалісӧ Исусыслісь: «Дӧсвидзись, он я вились сувтӧт Израильыслӧ аслас ӧксулісь юралӧмсӧ эта кадӧ?»

⁷ Исусыс сэтчӧ висьталіс: «Айӧ Ачыс сувтӧтӧ колан кадсӧ. Тіянлӧ нійӧ каддэсӧ оз ков тӧдны.

⁸ Но тіян вылӧ лэдзчисяс Вежа Лов. Сысянь тійӧ вынсялат. Сэксянь Ерусалимын, Иудеяын, Самарияын да быдсӧн муыс пасьта пондат висьтасьны Ме йылісь».

Исуслӧн енӧжӧ лэбтісьӧм

⁹ Сідз висьталӧм бӧрын Исусыс ны син одзын лэбтісис енӧжӧ. Кымӧрыс сайӧвтіс Сійӧ, и Сія эз понды тыдавны.

¹⁰ Исуслісь енӧжӧ лэбтісьӧмсӧ видзӧттӧн ны одзӧ видзчисьтӧг сувтісӧ чочком паськӧма кык морт.

¹¹ Нія висьталісӧ: «Галилеяись отир! Мый сулалат да видзӧтат енӧжас? Тійӧ асьныт адззыліт Исусыслісь енӧжӧ лэбтісьӧмсӧ. Сія бӧр локтас сідз жӧ».

Апостоллэзлӧн ӧтлаын видзсьӧм

¹² Виягӧд керӧс вывсянь апостоллэз бертісӧ Ерусалим карӧ. Керӧс дынсянь карӧдззас вӧлі ӧтік верста гӧгӧр.

¹³ Локтӧм бӧрас нія ӧтлаын пырисӧ керкуӧ вылісь жырӧ да сэтчӧ кольччисӧ. Сэтӧн вӧлісӧ Петра да Яков, Иоан да Ӧндрей, Филип да Фома, Варфоломей да Матвей, Алфейлӧн Яков да Зилот Симон, да Яковлӧн Иуда воныс.

¹⁴ Апостоллэс Исуслӧн воннэзкӧт, Сылӧн Мария мамкӧт да мӧдік инькаэзкӧт пыр ӧксьывлісӧ кеймыны.

Даскыкӧт апостолӧс бӧрйӧм

^15-16 Ӧтік лунӧ ӧтлаӧ ӧксисӧ сё кыкдас гӧгӧр Исуслӧн велӧтчись. Сэк Петраыс сувтіс ны коласӧ да горӧтчис: «Воннэзӧ! Вежа Лов вынӧн Давидыс одзлань висьтавлӧм Иудаыс йылісь. Эта йылісь лыддьӧтам Вежа Гижӧтсис. Кыдз кӧркӧ висьталӧм Давидыс, ӧні сідз и лоис. Исуссӧ кутіссезлӧ туйсӧ мыччаліс Иудаыс.

¹⁷ Сія вӧлі миян коласісь, миян моз нуӧтіс сетӧм уджсӧ.

¹⁸ Сія аслас лёк керӧм понда босьтӧм сьӧм вылӧ небӧм му. Но сія онняюрӧн усьӧм, сылӧн кынӧмыс потӧм да гыркыс быдсӧн лэдзчисьӧм.

¹⁹ Ерусалимын быд олісь пондіс тӧдны лоӧмыс йылісь. Сы понда сійӧ мусӧ пондісӧ шуны "Акелдама", миян моз кӧ шуны, "вира му".

²⁰ Псалтырын гижӧм: Сылӧн оланіныс ась кушамӧ, ась оз ло сэтӧн олісьыс. Гижӧм и сідз: Сылісь уджсӧ ась босьтӧ мӧдік.

^21-22 Сідзкӧ, ӧні миянлӧ колӧ бӧрйыны ӧтікӧс сія отир коласісь, кӧдна быд кадӧ вӧлісӧ ӧтлаын миянкӧт да Дӧсвидзись Исусыскӧт Иоаныс пыртӧмсянь Исуслӧн лэбтісян лунӧдз. Сія мортыс сэсся миянкӧт ӧтлаын пондас висьтасьны отирыслӧ Исуслӧн ловзьӧм йылісь».

²³ Сувтӧтісӧ кыкӧс: Матфийӧс да Варсаваӧс, кӧдалӧн мӧд нимыс вӧлі Ӧсип, сійӧ шуисӧ эшӧ Иустӧн.

²⁴ Кеймиканыс висьталісӧ: «Дӧсвидзись, Тэ тӧдан быд сьӧлӧм. Кыкыс коласісь мыччав бӧрйӧмтӧ.

²⁵ Ачыт сувтӧт апостолсӧ, медбы сія нуӧтіс сетӧм уджтӧ. Сэтісь эд Иудаыс ылаліс да муніс сэтчӧ, кытӧн сылӧ и колӧ лоны».

²⁶ Нійӧ бӧрйисӧ кыскӧм сьӧрті. Шедіс Матфийлӧ, кӧда и лоис даскыкӧт апостолӧн.