1 Тимофейлӧ 2 - Бур Юӧр 2019

¹ Медодз кора тіянӧс: кеймиканыт корӧ, кеймисьӧ да буркывтӧ Енсӧ быд морт понда.

² Кеймӧ юраліссез да веськӧтліссез понда, медбы миянлӧ овны лӧня, отиркӧт лӧсялӧмӧн, Енлӧ юрбитӧмӧн да асьнымӧс бура видзӧмӧн.

³ Сідз керӧмыс бур, Мездӧтісь Еннымлӧ сьӧлӧмви.

⁴ Сылӧ колӧ, медбы быд мортыс мезмис да пондіс тӧдны быльсӧ.

⁵ Еныс эд ӧтік. Ӧтік и Ен да отир коласын Сулалісьыс ─ Морт, Кристос Исус.

⁶ Сія Асьсӧ сетіс быдӧннысӧ небӧм понда. Сідз Еныс мыччаліс: мездан кадыс локтіс.

⁷ Сійӧн Еныс менӧ сувтӧтіс Бур Юӧр висьтасисьӧн да апостолӧн. Быд кыв вылын баитісь отирсӧ ме велӧта быляс да вайӧта веритӧмӧдз. Этӧ ме веськыта висьтала, ог бӧбӧт.

Инькаэзӧс да ай отирӧс велӧтӧм

⁸ Меным колӧ, медбы ай отир быдлаын кеймиканыс лэбтывлісӧ киэзнысӧ сӧстӧм сьӧлӧмӧн, лӧгтӧг да етшасьтӧг.

⁹ Да и инькаэсӧ велӧт овны видзсьӧмӧн, бур мывкыдӧн, сӧстӧма, пасьтасьны бытшӧма. Сідз олӧмыс нійӧ баситӧ. Нылӧн баситчӧмныс ась оз ло басӧка чикись кыйӧм, зарни да жемчуггез ӧшлӧм, дона паськӧм.

¹⁰ Ась бурсӧ керӧмныс баситӧ нійӧ. Сідз колӧ керны Ен сьӧрті олісь инькаэзлӧ.

¹¹ Инькаэз ась велӧтчӧны чӧлӧмӧн да кывзісьӧмӧн.

¹² Инькалӧ велӧтны да юравны ай морт вылын ог лэдз. Сія ась олӧ лӧня.

¹³ Одзжык эд вӧлі аркмӧтӧм Адамыс, сэсся Еваыс.

¹⁴ Адамыс эз вӧв ылӧтӧм. Инькаыс эд ылалӧмыссянь керӧм умӧльсӧ.

¹⁵ Но инька мезмас кага вайӧмӧн, пондас кӧ веритны, радейтны, овны сӧстӧма, вежа оланӧн да бур мывкыдӧн.