1 Петра 3 - Бур Юӧр 2019

¹ Иннез, кывзісьӧ жӧниккезнытӧ. Мукӧдыслӧн жӧниккезныс озӧ кывзісьӧ Еныслісь Кывсӧ. Нія ась иннезныс вылӧ видзӧтӧмӧн, висьтавтӧг да велӧттӧг локтасӧ Кристосыс дынӧ.

² Нія эд пондасӧ адззыны тіянлісь Енісь полӧмӧн сӧстӧма олӧмнытӧ.

³ Эд тӧждісьӧ асьнытӧ баситны вевдӧрсяняс: басӧка юрсинытӧ лӧсьӧтӧмӧн, зарниись берсясӧ кышавлӧмӧн, дона паськӧмӧн я.

⁴ Еныслӧ эд дона мортыслӧн пытшкисьыс: рам сьӧлӧм да асьсӧ лӧня видзны кужӧм. Сія басӧкыс оз ӧш.

⁵ Сідз кӧркӧ асьнысӧ баситлӧмась вежа инькаэз. Нія жӧниккезнысӧ кывзісьӧмӧн надейтчӧмась дзир Ен вылӧ.

⁶ Сідз Сарраыс кывзісьӧм Авраамсӧ. Сійӧ шувлӧм: «Менам кӧзяинӧ». Тійӧ Сарралӧн ныввес, керат кӧ бурсӧ да немись одӧ полӧ.

⁷ Сідз и тійӧ, жӧниккез, олӧ иннезныткӧт бур мывкыдӧн, лебезнӧй дозкӧт моз, нія эд вынтӧмжыкӧсь. Нійӧ буррезӧ пуктӧ. Нылӧ эд тіянкӧт ӧтлаын сетӧны Енлісь лӧсьӧтӧм пайсӧ ─ бурсетӧмсӧ да олансӧ. Сідз кӧ олат, сэк кеймыны тіянӧс нем оз понды падмӧтны.

Бурсӧ керӧм да пессьӧм-мырсьӧм

⁸ Медбӧрын содта: тіян вежӧртӧмныт да юраныт видзӧмныт ась лоӧ ӧткодь. Ӧтамӧд понда тӧждӧ, ӧтамӧдӧс радейтӧ да бур мывкыдӧн кывзісьӧ, отсасьӧ да ас коласаныт лӧсялӧ.

⁹ Умӧльыс понда умӧльнас эд вештісьӧ. Тіянӧс видасӧ кӧ, эд видчӧ, а бласлӧвитӧ. Тійӧ эд сідз керны корӧмӧсь. Сэк и тіянлӧ Еныс сетас лӧсьӧтӧм пайсӧ ─ бласлӧвитӧмсӧ.

¹⁰ ─ Кин радейтӧ олансӧ да мӧдӧ адззывны бур луннэз, сія ась видзӧ ассис кывсӧ умӧльсис, ассис ӧмсӧ ылӧтлӧмӧн баитӧмсис.

¹¹ Ась оз кер умӧльсӧ, а керӧ бурсӧ, кошшӧ отиркӧт лӧсялӧмсӧ да быдӧс керӧ лӧнь олан понда.

¹² Дӧсвидзисьыслӧн синнэс видзӧтӧны Сы сьӧрті веськыта оліссес вылӧ. Сылӧн пеллес кывзӧны нылісь кеймӧмнысӧ. А лёк кериссес вылӧ Дӧсвидзисьыс лэбтісьӧ, медбы паздыны нійӧ, дзимлявны му вывсис.

¹³ Тійӧ кӧ пыр пондат кошшыны керны бурсӧ, кин сэк тіянлӧ керас умӧльсӧ?

¹⁴ Пессят-мырсят кӧ Ен сьӧрті веськыта олӧм понда, сэк тійӧ шудаӧсь. «Некинісь эд полӧ, и тіянӧс ась нем оз повзьӧт».

¹⁵ Асланыт сьӧлӧммезын Енсӧ лыддьӧ вежа Дӧсвидзисьӧн. Кин юалас кӧ надеяныт йылісь, пыр лоӧ лӧсьӧтчӧмӧсь мортыслӧ висьтавны очакыв. Баитӧ рама видзсьӧмӧн, Енсис полӧмӧн.

¹⁶ Пыр олӧ сӧстӧм сьӧлӧмӧн. Сэк тіян йылісь умӧля баитіссеслӧ ковсяс гӧрдӧтны асланыс кыввезсянь. Нія эд умӧльтӧны Кристоскӧт бытшӧма олӧмнытӧ.

¹⁷ Енлӧ колӧ кӧ, медбы мийӧ пессим-мырсим, буржык эд, бурсӧ керӧм понда кӧ пессям-мырсям. Абу бурыс, мийӧ кӧ лёк керӧмным понда пессям-мырсям.

¹⁸ Ачыс Кристосыс эд миян умӧль керӧммез понда ӧтпыр пессис-мырсис, медбы миянӧс вайӧтны Еныс дынӧ. Веськыта Олісьыс сетіс ловсӧ умӧльсӧ кериссез понда. Сылісь вывтырсӧ вийисӧ, но Енлӧн Лолыс ловзьӧтіс.

¹⁹ Ловнас Кристосыс лэдзчылӧм пемытінас йӧртӧм ловвес дынӧ, медбы нылӧ висьтасьны юӧрсӧ.

²⁰ Кӧркӧ нія Енсӧ абу кывзісьӧмась. Нойлӧн ыджыт пыжсӧ керӧм коста Еныс ыджыт мылаӧн видзсьӧм. Сэк етша кольччӧмась ловйӧн. Пыжас васис мезмӧмась дзир кыкьямыс морт.

²¹ Сія шогмӧмыс висьталӧ ӧнняся пыртчӧм йылісь. Сія абу нятьӧсь вывтыр миссьӧтӧм, а сӧстӧм сьӧлӧмӧн овны Енлӧ кӧсйисьӧм. Пыртчӧмным пыр мийӧ ӧні мезмам Кристос Исуслӧн ловзьӧм кузя.

²² Кристосыс лэбтісис енӧжас да Еныскӧт пуксис веськыт ладорас. Сійӧ кывзісьӧны ангеллэс, енӧжсис юраліссес да выннэс.