1 Иоан 4 - Бур Юӧр 2019

¹ Донаэзӧ, быд ловлӧ эд веритӧ. Ловвесӧ тӧдмалӧ-видзӧтӧ, Енсянь я нія. Му вылас уна лоисӧ асьнысӧ Енсянь юӧртіссезӧ пуктіссес.

² Ен Ловсӧ тӧдны позьӧ сідз: висьтасьӧ кӧ кин Кристос Исусыс йылісь ─ Сія локтіс пӧ морт вывтырын, то сія лолыс Енсянь.

³ Морт вывтырын локтӧм Кристос Исус йылісь лолыс оз кӧ висьтась, сія абу Енсянь, сія Кристос вылӧ лэбтісись антикристсянь. Тійӧ сы йылісь кывліт ни, сія пӧ локтас. Ӧні сія му вылас ни.

⁴ Челядь, тійӧ Енсянь. Тійӧ вермит нійӧ, кӧдна асьнысӧ пуктӧны Енсянь юӧртіссезӧ. Тіян пытшкын Олісьыс эд вынажык му вылісьысся.

⁵ Нія му вылісьыссянь. Сійӧн и баитӧны му выліссес сьӧрті и му выліссес кывзӧны нійӧ.

⁶ А мийӧ Еныссянь. Енсӧ тӧдіссес миянӧс кывзӧны. Абу кӧ кин Енсянь, сія оз кывзы миянӧс. Сы сьӧрті позьӧ тӧдны быльыслісь ловсӧ да ылӧтлісьыслісь ловсӧ.

Енлӧн радейтӧм

⁷ Донаэзӧ, пондам радейтны ӧтамӧднымӧс. Радейтӧмыс эд локтӧ Енсянь. Быд радейтісьыс шогмис Енсянь, тӧдӧ Енсӧ.

⁸ Оз кӧ кин радейт, сія оз тӧд Енсӧ. Еныс эд и эм радейтӧмыс.

⁹ Еныс миянлӧ мыччаліс Ассис радейтӧмсӧ. Сія ыстіс му вылас Ассис ӧтка Зонсӧ, медбы Сы пыр сетны миянлӧ олан.

¹⁰ Енсӧ миян радейтӧмным абу радейтӧм. Былись радейтӧмыс то мыйын: Еныс миянӧс радейтӧ. Сія ыстіс Ассис Зонсӧ вештісьны миян умӧль керӧммез понда.

¹¹ Донаэзӧ, Еныс кӧ сідз радейтӧ миянӧс, и миянлӧ колӧ радейтны ӧтамӧднымӧс.

¹² Енсӧ некӧр некин эз адззыв. Радейтам кӧ ӧтамӧднымӧс, сэк Еныс олӧ миян пытшкын. Сэк и Сылӧн радейтӧмыс поздісьӧм ни миян пытшкын.

¹³ Олӧ я Еныс миян пытшкын, а мийӧ Сы пытшкын, тӧдам Лолыс сьӧрті. Еныс миянлӧ сетіс Ассис Ловсӧ.

¹⁴ Мийӧ адззылімӧ да висьталамӧ: Айыс ыстіс Зонсӧ мездыны отирсӧ.

¹⁵ Мортыс шуӧ кӧ Исуссӧ Енлӧн Зонӧн, сэк Еныс олӧ сія морт пытшкын, а сія ─ Еныс пытшкын.

¹⁶ Мийӧ пондім тӧдны да веритны: Еныс миянӧс радейтӧ. Еныс ─ радейтӧм. Радейтӧмын олісьыс олӧ Еныс пытшкын, а Еныс олӧ сы пытшкын.

¹⁷ Радейтӧмыс миян пытшкын поздісис. Сідзкӧ, мийӧ повтӧг панталамӧ Суд Лунсӧ. Мийӧ эд эстӧн му вылас вачкисям Кристосыс вылӧ.

¹⁸ Радейтӧмын абу полӧмыс. Вынася-вына радейтӧмыс вашӧтӧ полӧмсӧ. Мортыс кӧ полӧ мыжйӧмись, радейтӧмыс абу на поздісьӧм сыын.

¹⁹ Пондам радейтны Енсӧ, одзжык эд Сія пондіс радейтны миянӧс.

²⁰ Баитӧ кӧ кин, ме пӧ радейта Енсӧ, а ачыс тай синӧн оз вермы видзӧтны воныс вылӧ, сія мортыс бӧбӧтчись. Сія оз радейт син одзас олісь вонсӧ. Вермас я сія радейтны адззывлытӧм Енсӧ?

²¹ Миян эм Сылӧн сэтшӧм тшӧктӧм: Енсӧ радейтісьыс ась радейтӧ и вонсӧ.