1 Иоан 3 - Бур Юӧр 2019

¹ Видзӧтӧ, кытшӧм ёна радейтӧ миянӧс Айным. Сія миянӧс пуктіс Аслас челядьӧ. Миянӧс и шуӧны Енлӧн челядьӧн. Му выліссес озӧ тӧдӧ Сійӧ, сійӧн и миянӧс озӧ тӧдӧ.

² Донаэзӧ, мийӧ ӧні Енлӧн челядь, а кытшӧмӧсь лоам, ӧні огӧ на тӧдӧ. Тӧдам дзир ӧтікӧ: Сы локтӧм коста асьным лоам Сы кодьӧсь. Сэк асланым синнэзӧн казялам, кытшӧм Сія.

³ Быдыс, кин сідз надейтчӧ Сы вылӧ, асьсӧ сӧстӧмтӧ, медбы лоны Сы кодь сӧстӧмӧн.

⁴ Умӧльсӧ керисьыс Туйдӧт вылӧ лэбтісьӧ. Умӧльсӧ керӧмыс ─ Туйдӧт вылӧ лэбтісьӧм.

⁵ Тійӧ эд тӧдат, Ачыс Кристосыс эз кер нем умӧльсӧ. Сія локтіс босьтны миянлісь умӧль керӧммезнымӧс.

⁶ Быдыс, кин Сыкӧт ӧтлаасис, оз кер умӧльсӧ. Умӧльсӧ быд керисьыс Сійӧ эз адззыв, оз тӧд Сійӧ.

⁷ Челядь, асьнытӧ ылӧтны некинлӧ эд лэдзӧ. Кин веськыта керӧ, сія мортыс Кристосыс моз Ен сьӧрті веськыта олісь.

⁸ Умӧльсӧ керисьыс кульсянь. Медодз кадсянь ӧнӧдз сія керӧ умӧльсӧ. А Ен Зон локтіс, медбы разьны сылісь уджсӧ.

⁹ Енсянь шогмӧмыс оз кер умӧльсӧ. Еныслісь кӧдзӧмсӧ эд сія видзӧ пытшкас. Оз вермы сія керны умӧльсӧ, Енсянь шогмӧм да.

¹⁰ Мортыс оз кӧ кер веськыта да оз радейт вонсӧ, сія абу Енсянь. Сы сьӧрті позьӧ тӧдны кульыслісь да Еныслісь челядьсӧ.

Ӧтамӧдӧс радейтны тшӧктӧм

¹¹ Сідз эд тіянлӧ вӧлі висьталӧм: «Радейтӧ ӧтамӧднытӧ». Сійӧ висьталӧмсӧ тійӧ кывліт одззасянь ни.

¹² Эд лоӧ Каиныс кодьӧсь. Сія эд вӧлӧм умӧльыссянь да вийӧм вонсӧ. Мый понда нӧ вийӧм? Воныс сылӧн керӧм бурӧ, Каиныс умӧльӧ.

¹³ Воннэзӧ, тіянӧс ась диво оз кут, му вылісь отирыслӧ син вылӧ кӧ одӧ колӧ.

¹⁴ Мийӧ тӧдам: мийӧ кулӧмсис вуджим оланас. Мийӧ радейтам воннэзнымӧс. Мортыс оз кӧ радейт вонсӧ, сія кольччӧ кулан выныс кипод увтын.

¹⁵ Морт воныс вылӧ кӧ синӧн оз вермы видзӧтны, сэк сія морт вийись. Тӧдат эд: морт вийись пытшкын пырся оланыс абу.

¹⁶ Исусыс миян понда сетіс Ассис олансӧ. Сы сьӧрті мийӧ пондім тӧдны радейтӧмсӧ. Сідз и миянлӧ воннэзным понда колӧ сетны ассиным оланнымӧс.

¹⁷ Шуам, мортыслӧн быдӧс эм тырмӧмви. Сія воныслісь умӧль олансӧ адззӧ да куньӧ синнэсӧ, оз отсав сылӧ. Вермас разь сы сьӧлӧмын вӧвны Еныслӧн радейтӧмыс?

¹⁸ Менам челядьӧ! Пондам радейтны быльыс сьӧрті да асланым керӧммезӧн, а не дзир кывнаным баитӧмӧн.

^19-20 Сы сьӧрті тӧдам, мийӧ быльыслӧн. Ӧмалӧ кӧ миянӧс сьӧлӧмным, мийӧ вермам сійӧ лӧньсьӧтны Еныс одзын. Сія эд миян сьӧлӧмся ыджытжык, быдӧс тӧдӧ.

²¹ Донаэзӧ, сьӧлӧмным миянӧс оз кӧ ӧмав, мийӧ Еныс одзӧ вермам локны повтӧг.

²² И быдӧс, мый корам Еныслісь, Сія миянлӧ сетас. Мийӧ эд олам Сы тшӧктӧммез сьӧрті, Сы сьӧлӧм сьӧрті керам бурсӧ.

²³ Еныс тшӧктіс, медбы мийӧ веритім Сылӧн Кристос Исус Зонлӧ да радейтім ӧтамӧднымӧс.

²⁴ Мортыс олӧ кӧ Енлӧн тшӧктӧммез сьӧрті, сэк сія олӧ Енкӧт ӧтлаасьӧмӧн, а Еныс олӧ сы пытшкын. Олӧ я Еныс миян пытшкын, тӧдам Лолыссянь, Кӧдӧ миянлӧ сетіс Еныс.