1 Иоан 2 - Бур Юӧр 2019

¹ Менам челядьӧ! Этӧ гижа тіянлӧ, медбы умӧльсӧ эд керӧ. Но кинкӧ керис кӧ умӧльсӧ, миян эд эм Ен Айным одзын Дорйись ─ Кристос Исус, веськыта Олісь.

² Сія эд миян умӧль керӧммезным понда вештісис ─ сетіс Ассис олансӧ. Эз дзир миян понда, а и быдӧс отирлӧн умӧль керӧммезныс понда вештісис.

³ Тӧдам я мийӧ Сійӧ, тӧдчӧ эд. Олам кӧ Сы тшӧктӧммез сьӧрті, сэк Сійӧ тӧдам.

⁴ Кин баитӧ, ме пӧ Сійӧ тӧда, а ачыс тай оз ов Сы тшӧктӧммез сьӧрті, сія мортыс бӧбӧтчись. Сы пытшкын абу быльыс.

⁵ Ен кыв сьӧрті олісь мортын Еныслӧн радейтӧмыс поздісьӧм ни. Сідз мийӧ тӧдамӧ: мийӧ Сыкӧт ӧтлаасим.

⁶ Кин баитӧ, ме пӧ Сыкӧт ӧтлааси, мортыслӧ сэк и овны колӧ Кристосыс моз.

Виль тшӧктӧм

⁷ Донаэзӧ! Ме ог гиж тіянлӧ виль тшӧктӧм. Эта тшӧктӧмыс важся-важ. Миянсянь кылӧм кылыс и эм сія важ тшӧктӧмыс. Сійӧ важ тшӧктӧмсӧ тійӧ тӧдіт одззасянь ни.

⁸ Тіянлӧ гижӧмӧ ӧтлаын и виль тшӧктӧм. Сія тшӧктӧмыс былись эм и Кристослӧн оланын, и тіян оланын. Пемытыс вешшӧ, былись югытыс югдӧтӧ ни.

⁹ Мортыс асьсӧ пуктӧ югытын олісьӧ, а ачыс воныс вылӧ синӧн оз вермы видзӧтны. Сія сэк ӧнӧдз пемытын олӧ.

¹⁰ Мортыс радейтӧ кӧ вонсӧ, сэк сія олӧ югытын. Сы пытшкын абу ни умӧльыс, мыйсянь бы мӧдік ылаліс.

¹¹ Мортыс синӧн оз кӧ вермы видзӧтны воныс вылӧ, сэк сія олӧ пемытын. Сія оз тӧд ассис туйсӧ, пемытын ветлӧтӧ. Пемытыс куньӧм сылісь синнэсӧ.

Айезлӧ да томмезлӧ висьталӧм

¹² Гижа тіянлӧ, челядь. Тіян умӧль керӧммезныт Кристос ним понда проститӧмӧсь.

¹³ Гижа тіянлӧ, айез. Тійӧ пондіт тӧдны Сійӧ, Кӧда одззасянь вӧлі ни. Гижа тіянлӧ, том зоннэз. Тійӧ вермитӧ умӧльсӧ. Гижа тіянлӧ, челядь. Тійӧ пондіт тӧдны Айнытӧ.

¹⁴ Ме гижи тіянлӧ, айез. Тійӧ эд пондіт тӧдны Сійӧ, Кӧда пыр вӧлі. Ме гижи тіянлӧ, зонкаэз. Тійӧ эд вынаӧсь. Еныслӧн кылыс олӧ тіян пытшкын. Тійӧ вермит ылӧтлісьсӧ.

Эд радейтӧ му вылісьсӧ

¹⁵ Эд радейтӧ му вылісьсӧ да сійӧ, мый эстӧн керсьӧ. Му вылісьсӧ радейтісьыс оз радейт Айсӧ.

¹⁶ Му вылас керсьӧмыс: вывтырлӧн ӧзйӧтчӧм, синнэзлӧ колӧм, асьӧс лэбтӧм, нія абу Ен Айсянь, а отирсянь.

¹⁷ Быдӧс, мый эм му вылас, сія ӧшӧ. Ӧшӧны и му вылісь отирлӧн ӧзйӧтчӧммезныс. А Енлӧ колӧм сьӧрті керисьыс олӧ пыр.

Антикрист, Кристос вылӧ лэбтісись

¹⁸ Челядь! Ӧні бӧрья кад. Тійӧ кылітӧ, Кристос вылӧ лэбтісись, антикрист, пӧ локтас. Ӧні ни адззамӧ, Сы вылӧ унаӧн лэбтісисӧ. Сы сьӧрті и тӧдамӧ медбӧрья кадсӧ.

¹⁹ Нія петісӧ миян дынісь, а миянкӧт ӧтдор нія эзӧ вӧлӧ. Вӧлісӧ бы нія мияніссезӧн, сэк кольччисӧ бы миянкӧт. Ны петӧм сьӧрті казялім: абу быдӧнныс миянкӧт ӧтвылісь.

²⁰ Тіянӧс Вежаыс мавтіс, и тійӧ быдӧс тӧдат.

²¹ Ме тіянлӧ гижа не сійӧн, жыв тійӧ одӧ тӧдӧ быльсӧ. Тійӧ быльсӧ тӧдат, сійӧн и гижи. Тійӧ тӧдат: быльыссянь оз пет бӧбӧтчӧмыс.

²² Бӧбӧтчисьыс сія, кӧда Исуссӧ оз пукты Кристосӧ ─ кӧсйӧм Мездӧтісьӧ. Сія Кристосыс вылӧ лэбтісьлӧ. Сія Айсӧ да Зонсӧ абутӧм туйӧ пуктӧ.

²³ Кристоссӧ мортыс оз кӧ пукты Ен Зонӧ, сылӧн абу и Ен Айыс. Кристоссӧ Ен Зонӧ пуктісьыслӧн эм и Айыс.

²⁴ Сідзкӧ, мый тійӧ кыліт одззасянь, сійӧ видзӧ юраныт. Одззасянь кылӧмсӧ пыр пондат кӧ видзны юраныт, сэк тійӧ пыр лоат ӧтлаасьӧмӧсь Зоныскӧт да Айыскӧт.

²⁵ Миянлӧ Сія кӧсйис сетны пырся олан.

²⁶ Одзас ме гижи тіянӧс ылӧтліссез йылісь.

²⁷ Кристосыслӧн мавтӧмыс тіян пытшкын. Сійӧн тіянлӧ озӧ колӧ мӧдік велӧтіссез. Сія мавтӧмыс тіянӧс быдӧсӧ велӧтӧ. Сія и эм бӧбӧтчытӧг быляс велӧтісьыс. Кыдз сія тіянӧс велӧтіс, сідз и олӧ Кристоскӧт ӧтлаасьӧмӧн.

Мийӧ ─ Енлӧн челядь

²⁸ Челядь, сідзкӧ олӧ Кристоскӧт ӧтлаасьӧмӧн, медбы Сы локтӧм коста мийӧ вермим повтӧг сувтны Сы одзӧ и Сы одзын эз ковсьы гӧрдӧтны.

²⁹ Тійӧ тӧдат Сійӧ веськыта олісьӧн. Тӧдӧ и этӧ: Быд веськыта керись шогмис Сысянь.