1 Иоан 1 - Бур Юӧр 2019

Кристос Исусыс ─ Олан Кыв

¹ Мийӧ висьтасям сы йылісь, мый вӧлі одззасянь, мый мийӧ кылім, мый адззылім асланым синнэзӧн, мый видзӧтім, мый бердӧ киэзнаным павкӧтчылім. Висьтасям Олан Кыв йылісь.

² Оланыс мыччасис. Сійӧ мийӧ адззылім. Ӧні сія пырся Олан йылісь висьтасям тіянлӧ. Сія вӧлӧм Айыскӧт. Ӧні Сія мыччасис миянлӧ.

³ Адззылӧмным да кылӧмным йылісь мийӧ висьтасям тіянлӧ, медбы и тійӧ вӧліт миянкӧт ӧтвыв. Мийӧ эд ӧтвыв Айнымкӧт да Сылӧн Кристос Исус Зонкӧт.

⁴ Мийӧ этӧ гижам тіянлӧ, медбы и тіян вӧлі ыджытся-ыджыт гаж.

Югытын овны тшӧктӧм

⁵ Этӧ Бур Юӧрсӧ мийӧ кылімӧ Кристос Исуссянь. Ӧні сійӧ висьтасям тіянлӧ: Еныс ─ югытыс, Сыын некытшӧм пемыт абу.

⁶ Шуам кӧ, мийӧ пӧ Сыкӧт ӧтвылісь, а асьным олам пемытінас, сэк мийӧ бӧбӧтчам, огӧ олӧ быльыс сьӧрті.

⁷ Еныс олӧ югытас. Сы моз олам кӧ югытас, сэк мийӧ ӧтамӧднымкӧт ӧтвылісь. Ен Зон Кристос Исуслӧн вирыс сӧстӧмтӧ миянӧс быдкодь умӧль керӧмись.

⁸ Шуам кӧ, абу пӧ миян некытшӧм умӧль керӧм, сідз баитӧмнаным мийӧ асьнымӧс ылӧтлам. Быльыс сэк абу миян пытшкын.

⁹ Висьталам кӧ Еныслӧ ассиным умӧль керӧммезнымӧс, нійӧ Сія проститас, миянӧс весӧтас быд умӧль керӧмись. Сія эд веськыта керӧ, оз вежлы кывсӧ.

¹⁰ Шуам кӧ, мийӧ эгӧ керӧ умӧльсӧ, сэк Енсӧ пуктам бӧбӧтчисьӧ. Сылӧн кылыс миян пытшкын абу.