1 Фессалоникаын оліссезлӧ 3 - Бур Юӧр 2019

¹ Мийӧ сэсся эгӧ ни вермӧ видзчисьтӧн кыскыны кадсӧ, сійӧн шуим: «Буржык лоас, кольччам кӧ мийӧ Афинас ӧтнаным,

² а Тимофей воннымӧс ыстам тіян дынӧ». Сія миян моз Енлӧ уджалӧ, висьтасьӧ Кристослісь Бур Юӧрсӧ. Тимофейыс вынсьӧтас тіянлісь веритӧмнытӧ, кокньӧтас сьӧлӧмнытӧ,

³ медбы тіян коласісь некин эз повзьы-падмы эта сьӧкыт кадӧ. Тійӧ эд асьныт тӧдат: пессьӧм-мырсьӧмыс ─ миян олан пайным.

⁴ Тіян дынӧ одзжык вовлӧмным коста мийӧ баитлім одзланьсяыс йылісь. Тіянлӧ висьтавлім: уна пессьӧм-мырсьӧмыс усяс миян вылӧ. Ӧні сідз и лоис, тійӧ асьныт тӧдат.

⁵ Ме эг ни вермы видзсьыны, сійӧн ысті Тимофейсӧ тӧдны тіян веритӧм йылісь. Ме полі, ылӧтлісьыс эз жӧ бы ылӧт тіянӧс, да миян уджным эз ло весись.

Фессалоникаись локтӧм бур юӧр

⁶ Ӧні Тимофейыс бертіс тіян дынсянь. Сія миянлӧ вайис радейтӧмныт да веритӧмныт йылісь бур юӧр. Миянӧс пӧ тійӧ видзат тӧдвыланыт да миян моз ӧддьӧн мӧдат адззисьлыны миянкӧт.

⁷ Эта сьӧкыт кадӧ, кӧр миянӧс вашӧтлӧны, тіян веритӧм йылісь кылӧмсянь мийӧ вынсялім.

⁸ Тійӧ бура видзсят Дӧсвидзиськӧт ӧтлаасьӧмӧн. Эта юӧрыс кокньӧтіс миянлісь сьӧлӧммезнымӧс.

⁹ Кытшӧм кылӧн мийӧ вермам буркывтны Енсӧ тіян понда да гажным понда? Эта гажным Еныс одзын тіян кузя.

¹⁰ Ой и лун сьӧлӧмсянь кеймам, медбы вермим тіянкӧт адззисьлыны. Сэк вермам вынсьӧтны тіянлісь веритӧмнытӧ да велӧтны, мыйӧ эшӧ колӧ.

¹¹ Ась Ачыс Ен Айным да Дӧсвидзись Кристос Исусным лӧсьӧтасӧ миянлӧ туйсӧ тіян дынӧ.

¹² Дӧсвидзисьыс ась унапӧв содтас тіянлӧ радейтӧмсӧ радейтны ӧтамӧднытӧ да и быд мортсӧ. Мийӧ эд асьным сідз радейтам тіянӧс.

¹³ Сія ась вынсьӧтас тіянлісь сьӧлӧммезнытӧ, медбы вӧліт сӧстӧммезӧн да вежаэзӧн Ен Айным одзын, кӧр миян Дӧсвидзись Кристос Исусным локтас быдӧс вежаэскӧт. Аминь.