Zaburi 95 - Bibiliya Yera

¹ Nimuze turirimbire Uwiteka, Tuvugirize impundu igitare cy'agakiza kacu.

² Tujye mu maso ye tumushima, Tumuvugirize impundu n'indirimbo.

³ Kuko Uwiteka ari Imana ikomeye, Ni Umwami ukomeye usumba ibigirwamana byose.

⁴ Ikuzimu hari mu kuboko kwe, Kandi impinga z'imisozi na zo ni ize.

⁵ Inyanja ni iye, ni we wayiremye, Intoki ze ni zo zabumbye ubutaka.

⁶ Nimuze tumuramye twunamye, Dupfukamire Uwiteka Umuremyi wacu.

⁷ Kuko ari we Mana yacu, Natwe turi abantu b'icyanya cye, Turi intama zo mu kuboko kwe. Uyu munsi icyampa mukumva ijwi rye,

⁸ Ntimwinangire imitima, Nk'uko mwayinangiriye i Meriba, No ku munsi w'i Masa mu butayu,

⁹ Ubwo ba sekuruza wanyu bangeragezaga, Bakantata bakabona umurimo wanjye.

¹⁰ Narakariye ab'icyo gihe imyaka mirongo ine, Ndavuga nti “Ubu ni ubwoko buhora buyoba mu mitima yabwo, Kandi ntibamenya inzira zanjye.”

¹¹ Ni cyo cyatumye ndahirana umujinya nti “Ntibazinjira mu buruhukiro bwanjye.”