Zaburi 94 - Bibiliya Yera

¹ Uwiteka, Mana yo guhōra inzigo, Mana yo guhōra inzigo, rabagirana.

² Wa mucamanza w'abari mu isi we, wishyire hejuru, Witure abibone ibibakwiriye.

³ Uwiteka, abanyabyaha bazageza he, Abanyabyaha bazageza he kwishima?

⁴ Badudubiranya amagambo bavuga iby'agasuzuguro. Inkozi z'ibibi zose zirirarira.

⁵ Uwiteka, bamenagura ubwoko bwawe, Bababaza umwandu wawe.

⁶ Bica umupfakazi n'umunyamahanga, Bica n'impfubyi,

⁷ Bakavuga bati “Uwiteka ntari bubibone, Imana ya Yakobo ntiri bubyiteho.”

⁸ Mwa bameze nk'inka mwe bo mu bantu, mwite kuri ibi, Mwa bapfu mwe, muzagira ubwenge ryari?

⁹ Iyashyizeho ugutwi ntizumva? Iyaremye ijisho ntizareba?

¹⁰ Ihanisha amahanga ibihano ntizahana? Si yo yigisha abantu ubwenge?

¹¹ Uwiteka azi ibyo abantu bibwira, Ko ari iby'ubusa gusa.

¹² Uwiteka, hahirwa umuntu uhana, Ukamwigishisha amategeko yawe,

¹³ Kugira ngo umuruhure iminsi y'amakuba n'ibyago, Kugeza aho abanyabyaha bazacukurirwa ubushya,

¹⁴ Kuko Uwiteka atazata ubwoko bwe, Kandi atazareka umwandu we.

¹⁵ Kuko guca imanza kuzasubira ku kutabera, Kandi abafite imitima itunganye bose bazabishima.

¹⁶ Ni nde uzahaguruka akantabara kurwanya abanyabyaha? Ni nde uzahaguruka mu ruhande rwanjye kurwanya inkozi z'ibibi?

¹⁷ Iyo Uwiteka ataba umutabazi wanjye, Ubugingo bwanjye buba bwaratuye vuba ahacecekerwa.

¹⁸ Nkivuga nti “Ikirenge cyanjye kiranyereye”, Imbabazi zawe Uwiteka, zarandamiye.

¹⁹ Iyo ibyo nshidikanya byinshi bimpagaritse umutima, Ibyo umpumuriza byishimisha ubugingo bwanjye.

²⁰ Mbese intebe y'abanyarugomo izafatanya nawe? Bagira amategeko urwitwazo rw'igomwa,

²¹ Bateranira gutera ubugingo bw'umukiranutsi, Bagaciraho iteka amaraso atariho urubanza.

²² Ariko Uwiteka ni igihome kirekire kinkingira, Imana yanjye ni igitare cy'ubuhungiro bwanjye.

²³ Kandi izabagaruraho gukiranirwa kwabo, Izabarimburira mu byaha byabo, Uwiteka Imana yacu, izabarimbura.