Zaburi 91 - Bibiliya Yera

¹ Uba mu rwihisho rw'Isumbabyose, Azahama mu gicucu cy'Ishoborabyose.

² Ndabwira Uwiteka nti “Uri ubuhungiro bwanjye n'igihome kinkingira, Imana yanjye niringira.”

³ Kuko ari we uzagukiza ikigoyi cy'umugoyi, Na mugiga irimbura.

⁴ Azakubundikiza amoya ye, Kandi uzajya uhungira munsi y'amababa ye, Umurava we ni ingabo n'icyuma kigukingira.

⁵ Igiteye ubwoba cya nijoro ntikizagutinyisha, Cyangwa umwambi ugenda ku manywa,

⁶ Cyangwa mugiga igendera mu mwijima, Cyangwa kurimbura gutsemba ku manywa y'ihangu.

⁷ Abantu igihumbi bazagwa iruhande rwawe, Abantu inzovu bazagwa iburyo bwawe, Ariko ntibizakugeraho.

⁸ Uzabirebesha amaso yawe gusa, Ubone ibihembo by'abanyabyaha.

⁹ Kuko ari wowe buhungiro bwanjye Uwiteka, Wagize Isumbabyose ubuturo,

¹⁰ Nuko nta kibi kizakuzaho, Kandi nta cyago kizegera ihema ryawe.

¹¹ Kuko azagutegekera abamarayika be, Ngo bakurindire mu nzira zawe zose.

¹² Bazakuramira mu maboko yabo, Ngo udakubita ikirenge ku ibuye.

¹³ Uzakandagira intare n'impoma, Uzaribata umugunzu w'intare n'ikiyoka.

¹⁴ “Kuko yankunze akaramata ni cyo nzamukiriza, Nzamushyira hejuru kuko yamenye izina ryanjye.

¹⁵ Azanyambaza nanjye mwitabe, Nzabana na we mu makuba no mu byago, Nzamukiza muhe icyubahiro.

¹⁶ Nzamuhaza uburame, Kandi nzamwereka agakiza kanjye.”