Zaburi 89 - Bibiliya Yera

¹ Indirimbo yahimbishijwe ubwenge ya Etani Umunyezerahi.

² Nzaririmba iteka imbabazi z'Uwiteka, Ab'ibihe byose nzabamenyesha umurava wawe n'akanwa kanjye.

³ Kuko navuze nti “Imbabazi zizakomezwa iteka, No mu ijuru ubwaho uzahashimangira umurava wawe.”

⁴ “Nasezeranye isezerano n'uwo natoranije, Narahiye Dawidi umugaragu wanjye

⁵ Nti ‘Nzashimangira urubyaro rwawe iteka, Intebe yawe y'ubwami nzayikomeza, Ukageza ibihe byose.’ ” Sela.

⁶ Uwiteka, ijuru rizashima ibitangaza byawe, Umurava wawe uzashimirwa mu iteraniro ry'abera.

⁷ Ni nde wo mu ijuru wagereranywa n'Uwiteka? Ni nde wo mu bana b'Imana uhwanye n'Uwiteka?

⁸ Ni we Mana iteye ubwoba bwinshi mu rukiko rw'abera, Ni iyo gutinywa kurusha abayikikije bose.

⁹ Uwiteka, Mana Nyiringabo, Ni nde munyambaraga uhwanye nawe, Uwiteka? Umurava wawe urakugose impande zose.

¹⁰ Ni wowe utegeka kwihinduriza kw'inyanja, Iyo umuraba wayo uhagurutse urawutūrisha.

¹¹ Ni wowe wamenaguye Rahabu imeze nk'uwishwe, Watatanishije ababisha bawe ukoboko kw'imbaraga zawe.

¹² Ijuru ni iryawe, isi na yo ni iyawe, Isi n'ibiyuzuye ni wowe wabishimangiye.

¹³ Ikasikazi n'ikusi ni wowe waharemye, I Taboru n'i Herumoni hishimira izina ryawe.

¹⁴ Ufite ukuboko kw'imbaraga, Ukuboko kwawe kurakomeye, Ukuboko kwawe kw'iburyo gushyizwe hejuru.

¹⁵ Gukiranuka no guca imanza zitabera ni imfatiro z'intebe yawe, Imbabazi n'umurava birakubanziriza.

¹⁶ Hahirwa ishyanga rizi ijwi ry'impundu, Uwiteka, rigendera mu mucyo wo mu maso hawe.

¹⁷ Bishimira izina ryawe umunsi ukīra, Kandi gukiranuka kwawe ni ko kubashyirisha hejuru.

¹⁸ Kuko uri icyubahiro cy'imbaraga zabo, Imbabazi zawe ni zo zizashyirisha hejuru ihembe ryacu.

¹⁹ Kuko ingabo idukingira ari Uwiteka, Umwami wacu ari Uwera wa Isirayeli.

²⁰ Cya gihe wabwiriye abakunzi bawe mu byo beretswe uti “Mpaye umunyambaraga gufasha kwanjye, Nshyize hejuru uwatoranijwe mu bantu.

²¹ Mbonye Dawidi umugaragu wanjye, Musīze amavuta yanjye yera.

²² Ikiganza cyanjye kizajya kibana na we, Ukuboko kwanjye kuzamukomeza.

²³ Umwanzi we ntazamutungura, Kandi umunyabyaha ntazamugirira nabi.

²⁴ Nanjye nzakubita ababisha be bagwe imbere ye, Nzakubita abamwanga.

²⁵ Ariko umurava wanjye n'imbabazi zanjye bizabana na we, Kandi izina ryanjye rizashyirisha hejuru ihembe rye.

²⁶ Nzashyira inyanja mu ntoki ze, N'inzūzi mu kuboko kwe kw'iburyo.

²⁷ Azantakira ati ‘Ni wowe Data, Imana yanjye, Igitare cy'agakiza kanjye.’

²⁸ Kandi nzamuhindura impfura yanjye, Asumbe abandi bami bo mu isi.

²⁹ Nzamubikira imbabazi zanjye iteka ryose, Isezerano ryanjye rizakomera kuri we.

³⁰ Kandi nzaramisha urubyaro rwe iteka ryose, Nzaramisha intebe ye y'ubwami nk'iminsi y'ijuru.

³¹ “Niba abana be bazareka amategeko yanjye, Ntibagendere mu byo nategetse,

³² Niba bazaca ku mateka yanjye, Ntibitondere amategeko yanjye,

³³ Ni bwo nzahōrēsha ibicumuro byabo inkoni, No gukiranirwa kwabo nzaguhōrēsha kubakubita.

³⁴ Ariko sinzamukuraho rwose imbabazi zanjye, Sinzivuguruza umurava wanjye.

³⁵ Sinzica isezerano ryanjye, Sinzahindura ijambo ryavuye mu kanwa kanjye.

³⁶ “Igihe kimwe narahiye kwera kwanjye, Sinzabeshya Dawidi.

³⁷ Urubyaro rwe ruzarama iteka, Intebe ye y'ubwami izarama nk'izuba imbere yanjye.

³⁸ Izakomezwa iteka ryose nk'ukwezi, Mu ijuru hariho ubihamya wo kwizerwa.” Sela.

³⁹ Ariko ubwawe wataye kure uwo wasīze uramureka, Wamugiriye umujinya.

⁴⁰ Wanze urunuka isezerano ry'umugaragu wawe, Wahumanishije ikamba rye kurijugunya hasi.

⁴¹ Wagushije inkike ze zose, Washenye ibihome bye.

⁴² Abahisi bose baramunyaga, Abaye igitutsi ku baturanyi be.

⁴³ Washyize hejuru ukuboko kw'iburyo kw'ababisha be, Wishimishije abanzi be bose.

⁴⁴ Ni koko usubiza inyuma ubugi bw'inkota ye, Kandi ntiwamuhaye guhagarara ashikamye mu ntambara.

⁴⁵ Wamazeho ubwiza bwe, Wajugunye intebe ye y'ubwami hasi

⁴⁶ Wagabanije iminsi y'ubusore bwe, Wamwambitse isoni. Sela.

⁴⁷ Uwiteka, uzageza he kwihisha iteka? Umujinya wawe uzageza he kwaka nk'umuriro?

⁴⁸ Ibuka ko ndi uw'igihe gito, Erega abana b'abantu bose wabaremeye ubusa!

⁴⁹ Ni nde uzarama ntapfe, Agakiza ubugingo bwe ukuboko kw'ikuzimu? Sela.

⁵⁰ Mwami, imbabazi zawe za kera ziri he, Warahiye Dawidi ku bw'umurava wawe?

⁵¹ Mwami, ibuka ibitutsi batuka abagaragu bawe, Uko niyumanganya mu mutima iby'amahanga yose uko ari menshi.

⁵² Uwiteka, ibuka ibitutsi by'abanzi bawe, Batutse intambwe z'uwo wasīze.

⁵³ Uwiteka ahimbazwe iteka ryose. Amen kandi Amen.