Zaburi 88 - Bibiliya Yera

¹ Iyi ndirimbo ni Zaburi ya bene Kōra, yahimbiwe umutware w'abaririmbyi babwirisha inanga ijwi ryitwa “Mahalati Leyanoti.” Ni indirimbo yahimbishijwe ubwenge ya Hemani Umwezerahi.

² Uwiteka, Mana y'agakiza kanjye, Ntakira imbere yawe ku manywa na nijoro.

³ Gusenga kwanjye kwinjire imbere yawe, Utegere ugutwi gutaka kwanjye,

⁴ Kuko umutima wanjye wuzuye imibabaro, Kandi ubugingo bwanjye bwegereye ikuzimu.

⁵ Bambarana n'abamanuka bajya muri rwa rwobo, Meze nk'udafite gitabara.

⁶ Nasizwe mu bapfuye, Meze nk'abishwe baryama mu gituro, Abo utacyibuka ukundi, Kandi batandukanye n'ukuboko kwawe.

⁷ Wanshyize mu rwobo rwo hasi, Ahantu h'umwijima h'ikuzimu.

⁸ Umujinya wawe uranshikamiye, Kandi wambabarishije umuraba wawe wose. Sela.

⁹ Wantandukanije n'abamenyi banjye ubanshyira kure, Wangize uwo banga urunuka, Ndakingiranywe simbasha gusohoka.

¹⁰ Mu maso hanjye hananurwa n'umubabaro. Uwiteka, njya ngutakira uko bukeye, Nkakuramburira amaboko.

¹¹ Mbese uzereka abapfuye ibitangaza? Ibicucu bizazuka bigushime? Sela.

¹² Imbabazi zawe zizavugirwa ikuzimu? Cyangwa se umurava wawe uzavugirwa mu irimbukiro?

¹³ Ibitangaza byawe bizamenyekanira mu mwijima? Gukiranuka kwawe kuzamenyekanira mu gihugu cyibagiza?

¹⁴ Ariko Uwiteka ni wowe ntakira, Kandi mu gitondo gusenga kwanjye kuzajya kugusanganira.

¹⁵ Uwiteka, ni iki gituma uta ubugingo bwanjye? Ni iki gituma umpisha mu maso hawe?

¹⁶ Nahereye mu buto mbabazwa ndwana n'umutima, Ngitewe n'ibiteye ubwoba byawe mpagarika umutima.

¹⁷ Umujinya wawe w'inkazi urandengeye, Ibiteye ubwoba byawe biratsembye.

¹⁸ Byangose nk'amazi umunsi urīra, Byanzengurukiye byose icyarimwe.

¹⁹ Abakunzi banjye n'incuti zanjye wabatadukanirije kure yanjye, Abamenyi banjye bagiye mu mwijima.