Zaburi 85 - Bibiliya Yera

¹ Zaburi iyi yahimbiwe umutware w'abaririmbyi. Ni Zaburi ya bene Kōra.

² Uwiteka, wagiriye igihugu cyawe imbabazi; Wagaruye Abayakobo bajyanywe ho iminyago.

³ Wababariye gukiranirwa k'ubwoko bwawe, Watwikiriye ibyaha byabo byose. Sela.

⁴ Wakuyeho umujinya wawe wose, Waretse uburakari bwawe bukaze urabworoshya.

⁵ Mana y'agakiza kacu utwigarurire, Kandi ushire umujinya wawe utugirira.

⁶ Uzaturakarira iteka? Uzakomeza uburakari bwawe ibihe byose?

⁷ Ntuzagaruka ubwawe ngo utuzure, Kugira ngo ubwoko bwawe bukwishimire?

⁸ Uwiteka, utwereke imbabazi zawe, Uduhe agakiza kawe.

⁹ Reka numve ibyo Imana Uwiteka izavuga, Kuko izabwira ubwoko bwayo n'abakunzi bayo amahoro, Ariko be kugarukira ubupfu.

¹⁰ Ni ukuri agakiza kayo kari bugufi bw'abayubaha, Kugira ngo ubwiza bwayo bube mu gihugu cyacu.

¹¹ Imbabazi n'umurava birahuye, Gukiranuka n'amahoro birahoberanye.

¹² Umurava umeze mu butaka, Gukiranuka kurebye mu isi kuri mu ijuru.

¹³ Kandi Uwiteka azatanga ibyiza, Igihugu cyacu kizera umwero wacyo.

¹⁴ Gukiranuka kuzamubanziriza, Kandi kuzahindura intambwe ze inzira yanyurwamo.