Zaburi 83 - Bibiliya Yera

¹ Iyi ndirimbo ni Zaburi ya Asafu.

² Mana, ntuceceke, Mana, ntuhore ntiwirengagize,

³ Kuko abanzi bawe bagira imidugararo, Abakwanga babyukije umutwe.

⁴ Bagambirira imigambi y'uburiganya ngo bagirire nabi ubwoko bwawe, Bagire inama abo urindira mu rwihisho.

⁵ Baravuze bati “Nimuze tubarimbure bataba ishyanga, Kugira ngo izina ry'Abisirayeli ritibukwa ukundi.”

⁶ Kuko bahuje umutima wo kujya inama, Ni wowe basezeraniye.

⁷ Ni bo banyamahema ba Edomu n'Abishimayeli, Kandi n'Abamowabu n'Abahagari,

⁸ N'Abagebalu n'Abamoni n'Abamaleki, N'Abafilisitiya n'abatuye i Tiro.

⁹ Abashuri na bo bafatanije na bo, Batabaye bene Loti. Sela.

¹⁰ Ubagirire nk'ibyo wagiriye Abamidiyani, Nk'ibyo wagiriye Sisera na Yabini ku mugezi Kishoni.

¹¹ Barimbukiye Endoru, Bahindutse ifumbire ry'ubutaka.

¹² Uhindure abatware babo nka Orebu na Zēbu, Imfura zabo zose uzihindure nka Zeba na Zalumuna,

¹³ Kuko zavuze ziti “Twiyendere Ubuturo bw'Imana.”

¹⁴ Mana yanjye, ubahindure nk'umukungugu ujyanwa na serwakira, Nk'umurama utumurwa n'umuyaga.

¹⁵ Nk'uko umuriro utwika ishyamba, Nk'uko ibirimi by'umuriro bitwika imisozi,

¹⁶ Abe ari ko ubahigisha umuyaga wawe, Ubateze ubwoba umuyaga wawe w'ishuheri.

¹⁷ Wuzuze mu maso habo ipfunwe ry'igisuzuguriro, Kugira ngo bashake izina ryawe, Uwiteka.

¹⁸ Bakorwe n'isoni batinye iteka ryose, Bamware barimbuke,

¹⁹ Kugira ngo bamenye yuko uwitwa UWITEKA, Ko ari wowe wenyine Usumbabyose utegeka isi yose.