Zaburi 82 - Bibiliya Yera

¹ Zaburi ya Asafu. Imana ihagarara mu iteraniro ryayo, Icira abigira “imana” urubanza iti

² “Muzageza he guca imanza zibera, Zita ku cyubahiro cy'abanyabyaha? Sela.

³ Muce imanza zikwiriye uworoheje n'impfubyi, Muce imanza zirenganura umunyamubabaro n'umutindi.

⁴ Mutabare uworoheje n'umukene, Mubakize amaboko y'abanyabyaha.

⁵ “Abo mbwiye nta cyo bazi, nta cyo bamenya, Bagendagenda mu mwijima, Imfatiro zose z'isi ziranyeganyega.

⁶ Ni jye wababwiye nti ‘Muri imana, Mwese muri abana b'Isumbabyose.’

⁷ Ariko muzapfa nk'abantu, Muzagwa nk'umwe mu bakomeye.”

⁸ Mana, haguruka ucire isi urubanza, Kuko uzagira amahanga yose umwandu wawe.